Ezekiel 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Gʼuiˬsha kʼoˆ ve, Chaw yaˇ-oˬ, li kiˉ shiˍ teˇmaˬ hta‸ nawˬ mehˆ gʼuˇ suhˍ yuˬ teh taˍ leh oˇ ve hta‸ Yeˍsuˆsaˍlehnˍ venˇ hkʼe shawˍ leh hkʼaiˇ kuiˉ piˇ-oˆ.

2Peuˬ hkʼaw‸ nawˉ, venˇ oˇ ve hta‸ shu ca bawˆ la chehˇ ve hkʼe shawˍ leh, li kiˉ shiˍ oˇ ve hkʼa caw zuhˇ lo, ta‸ kʼoˍ teˇ hpaˍ, ta‸ yehˬ teˇ hpaˍ, leh venˇ taˍ meu‸ hpe‸ hta‸ juˆ paˆ piˇ tuˬ ve suhˆ tcuhˉ pui teˇ hpaˍ te teh taˍ-o‸.

3Nawˬ leh venˇ oˇ ve awˬ kaˍ lo gʼo‸ pa ko taˍ ve hkʼe hpeh‸ la piˇ tuˬ sho baˉ teˇ maˬ hta‸ yuˬ ko taˍ leh, nawˬ ve mehˆ hpfuhˇ venˇ oˇ ve hpawˇ lo hpfuhˆ taˍ-o‸ Nawˬ lehˬ venˇ oˇ ve hta‸ ca bawˆ la chehˇ ve hkʼe hpeh‸ ve yoˬ. Chi ve lehˬ, Iˉsaˍreˍlaˆ chaw hui awˬ pon awˬ heˆ teˇ maˬ hpeh‸ ve yoˬ.

4Oˇ hkʼe te peuˬ hkʼaw‸ nawˉ, la‸ mehˍ paˉ hpawˇ lo hpfuhˆ zuh‸ taˍ-o‸. Iˉsaˍreˍlaˆ chaw hui ve venˇbaˆ ngaˬ nawˬ awˬ hkʼoˆ lo teh taˍ tuˬ yoˬ.

5390 nyi hkʼa gaˬ nawˬ lehˬ oˇ kaˬ lo chehˇ taˍ leh, yawˇ hui ve venˇbaˆ awˬ tan gʼa tu‸ gʼa hkanˍ chehˇ tuˬ yoˬ. Yawˇ hui gʼa hkanˍ tuˬ ve teˇ hkʼaw‸ ve awˬ yanˇ awˬ tan, ngaˬ nawˬ hta‸ teˇ nyi hkanˍ tcuh laˇ tuˬ yoˬ.

6Oˇ hkʼe te peuˬ ve kʼo, la‸ sha paˉ hpawˇ lo teˇ pawˆ kʼaw‸ hpfuhˆ zuh‸ leh, Yuˇda‸ chaw hui ve venˇbaˆ awˬ tan awˇ chi nyi kʼaw‸ hkanˍ-o‸. Chi ka‸ yawˇ hui gʼa hkanˍ tuˬ ve teˇ hkʼaw‸ ve awˬ yanˇ awˬ tan, nawˬ teˇ nyi gʼa hkanˍ ve yoˬ.

7Nawˬ ve mehˆ shiˍ shu ca bawˆ la chehˇ ve Yeˍruˆsaˍlehnˍ venˇ hta‸ nyi tcuhˉ taˍ-o‸. Venˇ oˇ ve hta‸ la‸ tsuhˆ pui te maˍ piˇ leh tawˇ yaw piˇ-oˆ.

8Venˇ oˇ ve hta‸ shu ca bawˆ la ve peuˬ kʼai htaˇ hkʼa gaˬ, nawˬ choˬ hpawˇ oˇ hpawˇ hpfuhˆ maˇ gʼa tuˬ ngaˬ nawˬ hta‸ hpeh tiˍ taˍ laˇ tuˬ yoˬ.

9Chi beu‸ caˬhkʼa, cho‸ shiˍ, nawˆ shiˍ, maˉ nawˆ shiˍ, leh sha ma teˇ hpaˍ hta‸ yuˬ-o‸. Oˇ ve teˇ hpaˍ hta‸ teˇ geh hkaw‸ da‸ leh hkaoˍmonˇ te-o. Oˇ ve lehˬ, 390 nyi hkʼa gaˬ, nawˬ la‸ mehˍ paˉ hpawˇ lo hpfuhˆ zuh‸ chehˇ htaˇ caˇ tuˬ awˬ pon hpeh‸ ve yoˬ.

10Nawˬ lehˬ hkaoˍmonˇ oˇ ve hta‸ teˇ nyi ve nyiˇ hkanˉ ceh tiˉ gʼa caˇ ve yoˬ.

11Chi hkʼoˆ ka‸, nawˬ lehˬ teˇ nyi ve iˉ kaˆ htawˇ nyiˇ kawˆ ceh tiˉ gʼa dawˬ ve yoˬ.

12Nawˬ lehˬ goˇ kʼai peuˬ ve chaw hkʼehˇ hta‸ gʼawˆ hpoˆ leh aˬ miˍ ceh peuˬ hkʼaw‸ nawˉ, hkaoˍmonˇ hta‸ gʼa chiˆ leh chaw yaˇ teˇ hpaˍ nawˬ hta‸ mawˬ hpeh‸ ve chehˇ kuiˬ lo gʼa caˇ maˍ piˇ ve yoˬ.

13Chi ve lehˬ, ngaˬ maˇ caˇ tcuh ve caˇ tuˬ hta‸ Iˉsaˍreˍlaˆ chaw teˇ hpaˍ shu ve mvuhˇmiˬ lo gaˬ htaˇ gʼa caˇ tuˬ ve awˬ heˆ hpeh‸ ve yoˬ, teh‸ ngaˬ hta‸ kʼoˆ laˇ ve yoˬ.

14Oˇ htaˇ ngaˬ kʼaw‸ yaw hkʼaw‸ leh, Gʼuiˬsha-oˬ, ngaˬ oˇ hkʼe te maˇ hpeh‸. Awˬ lawn kʼo, ngaˬ ve awˬ to hta‸ cha‸ chiˆ tuˬ teˇ pawˆ ka‸ maˇ te jaw. Ngaˬ yaˇ ehˉ hpeh‸ chehˇ sheˍ htaˇ ka‸ te leh ya‸ nyi hkʼa gaˬ, yawˇ hkʼaˇ yawˇ suh-e ve to nuˇ to shaˆ leh haiˬ ve to nuˇ to shaˆ che‸ caˇ taˍ ve awˬ shaˍ hta‸ ngaˬ teˇ pawˆ ka‸ maˇ caˇ jaw. Maˇ da‸ kehˬ ve caˇ tuˬ hta‸ ngaˬ teˇ pawˆ ka‸ maˇ caˇ jaw, teh‸ Gʼuiˬsha hta‸ kʼoˆ piˇ ve yoˬ.

15Gʼuiˬsha kʼoˆ ve, Oˇ hkʼe yoˬ kʼo, nawˬ nuˇ hkʼehˇ hta‸ kʼaw‸ yehˇ hpeh‸ ve yoˬ. Nuˇ hkʼehˇ hkʼoˆ lo nawˬ hkaoˍmonˇ gʼa chiˆ caˇ ve yoˬ.

16Chaw yaˇ-oˬ, Yeˍruˇsaˍlehnˍ venˇ hkʼaw cawˬ ve hkaoˍmonˇ hta‸ ngaˬ i kʼai yawnˇ kʼai piˇ tuˬ yoˬ. Oˇ kaˬ lo chehˇ ve venˇ yaˇ teˇ hpaˍ lehˬ, yawˇ hui ve hkaoˍmonˇ leh iˉ kaˆ hta‸ hkʼa deh‸ gʼa tsuh caˇ leh, dawˇ haˍ jaˇ tuˬ yoˬ.

17Yawˇ hui ve hkaoˍmonˇ leh iˉ kaˆ peuˬ kʼai tuˬ yoˬ. Yawˇ hui ve venˇbaˆ hta‸ pa taw, dawˇ haˍ jaˇ leh gʼaˇ nuˇ kʼai tuˬ yoˬ, teh‸ Gʼuiˬsha kʼoˆ ve yoˬ.

← Chapter 3 Jump to: Chapter 5 →