Ezekiel 44

Lahu Bible Edited © Thailand Bible Society and Bible Society of Myanmar, 2010, 2020.

← Chapter 43 Jump to: Chapter 45 →

1Chaw oˇ ve lehˬ, ngaˬ hta‸ bon yehˬ mvuhˇnyi tawˆ hpawˇ lo cawˬ ve taˍ meu‸ hpe‸ lo shiˍ kʼai laˇ ve yoˬ. Taˍ meu‸ hpe‸ oˇ ve hoˆ taˍ ve yoˬ.

2Oˇ htaˇ, Gʼuiˬsha ngaˬ hta‸ chi hkʼe kʼoˆ laˇ ve yoˬ. Taˍ meu‸ hpe‸ chi hta‸ hkʼaˬ htaˆ ka‸ hoˆ taˍ leh, teˇ pawˆ ka‸ kʼaw‸ hpaw tuˬ ve maˇ heˆ. Ngaˬ Iˉsaˍreˍlaˆ Gʼuiˬsha lehˬ, taˍ meu‸ hpe‸ chi hkʼaw lo‸ la taˍ ve pa taw, chaw teˇ gʼaˇ ka‸ taˍ meu‸ hpe‸ chi hta‸ gʼa yehˇ tuˬ ve maˇ heˆ. Hkʼaˬ htaˆ ka‸ gʼa hoˆ taˍ ve yoˬ.

3Ya‸ hkʼaˇ, uˉ peunˍ chehˇ ve jawˇmawˇ yaˇ lehˬ, ngaˬ mehˆ gʼuˇ suhˍ lo laˬ leh da‸ kehˬ ve caˇ tuˬ hta‸ ca caˇ la htaˇ, taˍ meu‸ hpe‸ chi hkʼaw lo‸ la hpeh‸ ve yoˬ. Yawˇ lehˬ bawehˇ lonˉ hta‸ hpaˍ leh, taˍ meu‸ hpe‸ chi hkʼaw lo‸-e hpeh‸, tawˆ-e hpeh‸ ve yoˬ, teh‸ ngaˬ hta‸ kʼoˆ laˇ ve yoˬ.

4Oˇ ve hkʼaw‸ nawˉ, chaw oˇ ve lehˬ awˬ na hpawˇ ve taˍ meu‸ hpe‸ hta‸ hpanˍ leh, ngaˬ hta‸ bon yehˬ gʼuˇ suhˍ lo shiˍ kʼai laˇ ve yoˬ. Ngaˬ nyi peu ve teˇ yanˇ, bon yehˬ hkʼaw Gʼuiˬsha ve awˬ gʼeuˆ hkʼa biˇ cawˬ taˍ ve hta‸ gʼa mawˬ ve yoˬ. Ngaˬ miˬ chaˇ hkʼoˆ lo boˆ taˍ leh,

5Gʼuiˬsha ngaˬ hta‸ chi hkʼe kʼoˆ laˇ ve yoˬ. Chaw yaˇ-oˬ, nawˬ gʼa kaˇ gʼa mawˬ ve teˇ hpaˍ hta‸ hkʼa deh‸ tawnˇ taˍ-o‸. Bon yehˬ ve awˬ liˇ awˬ hkʼaˇ teˇ hpaˍ ngaˬ nawˬ hta‸ kʼoˆ maˍ laˇ tuˬ yoˬ. Bon yehˬ hkʼaw a shu teˇ hpaˍ tawˆ tawˆ lo‸ lo‸ gʼa te leh, a shu teˇ hpaˍ maˇ gʼa te ve hta‸ nawˬ hkʼa deh‸ tawnˇ taˍ-o‸.

6Ngaˬ Gʼuiˬsha lehˬ, cha‸ chiˆ ve kanˉ hta‸ te ve chaw hui hta‸ kʼaw‸ yeunˇ hkanˍ laˇ tuˬ ve maˇ heˆ, teh‸ kʼaw‸ hpfuhˆ puiˉ ve Iˉsaˍreˍlaˆ chaw oˇ ve teˇ hpaˍ hta‸ kʼoˆ piˇ-oˆ.

7Tuˉ tanˇ tuˬ ve awˬchu leh awˬ suhˍ ngaˬ hta‸ tanˇ laˇ chehˇ ve teˇ yanˇ, yawˇ hui lehˬ ngaˬ ve tawˇ hta‸ maˇ na yuˬ leh, awˬ guiˬ meuˇ maˇ shoˍ ve awˬ nu ve mvuhˇmiˬ yaˇ teˇ hpaˍ hta‸ ngaˬ ve bon yehˬ hkʼaw shiˍ lo‸-e leh, ngaˬ ve bon yehˬ hta‸ cha‸ chiˆ tuˬ te ve yoˬ. Hkʼe te leh, ngaˬ ve chaw teˇ hpaˍ lehˬ cha‸ chiˆ ve kanˉ teˇ hpaˍ hta‸ te leh, ngaˬ ve ka ti‸ tawˇ hkawˇ hta‸ te luˬ ve yoˬ.

8Ngaˬ ve bon yehˬ hkʼaw da‸ kehˬ ve mawˇ teˇ hpaˍ hta‸ maˇ ha‸ shaˉ. Awˬ nu ve mvuhˇmiˬ yaˇ teˇ hpaˍ hta‸ ha‸ shaˉ tcuh taˍ ve yoˬ.

9Awˬ guiˬ meuˇ maˇ shoˍ ve awˬ nu ve mvuhˇmiˬ yaˇ teˇ hpaˍ, leh ngaˬ ve tawˇ hta‸ maˇ na yuˬ ve chaw hkʼaˬve teˇ gʼaˇ maˇ kʼoˆ, ngaˬ ve bon yehˬ hkʼaw maˇ gʼa lo‸-e, teh‸ ngaˬ Gʼuiˬsha kʼoˆ taˍ ve yoˬ. Iˉsaˍreˍlaˆ chaw hui geh chehˇ taˍ ve awˬ nu ve mvuhˇmiˬ yaˇ teˇ hpaˍ hta‸ ngaˬ ve bon yehˬ hkʼaw maˇ gʼa lo‸-e, teh‸ ngaˬ hta‸ kʼoˆ laˇ ve yoˬ.

10Gʼuiˬsha ngaˬ hta‸ chi hkʼe kʼoˆ laˇ ve yoˬ. Iˉsaˍreˍlaˆ chaw hui geh teˇ geh ngaˬ hta‸ baˬ taˉ leh shaˉ ho‸ hta‸ oˉ kʼoˍ pui ve Leˍviˆ chaw teˇ hpaˍ hta‸ ngaˬ ciˍ yanˍ piˇ chehˇ ve yoˬ.

11Yawˇ hui lehˬ, ngaˬ ve bon yehˬ hkʼaw lo‸-e kuiˬ taˍ meu‸ hpe‸ hta‸ shaw ve kanˉ leh, bon yehˬ hkʼaw te cawˇ ve kanˉ teˇ hpaˍ hta‸ te hpeh‸ ve yoˬ. Yawˇ hui lehˬ, aˬ miˍ tuˉ tanˇ tuˬ awˬ pon chaw yaˇ teˇ hpaˍ yuˬ veu laˇ ve to nuˇ to shaˆ teˇ hpaˍ hta‸ tiˇ pehˍ hpeh‸ leh, chaw yaˇ teˇ hpaˍ awˬ pon kanˉ te piˇ tuˬ oˇ kaˬ lo chehˇ taˍ hpeh‸ ve yoˬ.

12Ya‸ hkʼaˇ, yawˇ hui awˬ hoˉ te leh Iˉsaˍreˍlaˆ chaw hui shaˉ ho‸ hta‸ oˉ kʼoˍ pui tcuh piˇ leh, venˇbaˆ hkʼaw ce lo‸-e piˇ ve pa taw, yawˇ hui hta‸ gʼa ciˍ yanˍ piˇ tuˬ yoˬ, teh‸ ngaˬ Gʼuiˬsha hkanˍ taˍ peuˬ ve yoˬ.

13Yawˇ hui lehˬ paw hkuˇ gʼa kʼaw‸ te tuˬ ve maˇ heˆ. Ngaˬ ve da‸ kehˬ ve mawˇ teh taˍ kuiˬ lo gʼa kʼai tuˬ ve maˇ heˆ. Da‸ kehˬ jaˇ ve bawehˇ hkʼaw gʼa lo‸-e tuˬ ve ka‸ maˇ heˆ. Yawˇ hui cha‸ chiˆ ve kanˉ hta‸ te ve pa taw, chi lehˬ yawˇ hui gʼa tuˬ ve ciˍ yanˍ tuˬ awˬ ceuˬ hpeh‸ ve yoˬ.

14Bon yehˬ hkʼaw te tuˬ loˍ ve kanˉ ehˉ teˇ hpaˍ hta‸ ceh tiˉ ngaˬ yawˇ hui hta‸ kʼaw‸ te tcuh ve yoˬ, teh‸ Gʼuiˬsha kʼoˆ ve yoˬ.

15Gʼuiˬsha kʼoˆ ve, Zaˍdoˆ ve awˬ ceuˬ awˬ hkʼaˇ Leˍviˆ chaw teˇ hpaˍ lehˬ, awˬ nu ve Iˉsaˍreˍlaˆ chaw teˇ hpaˍ ngaˬ hta‸ baˬ taˉ peuˬ ve htawˇ, yawˇ hui ka ti‸ yeˬ ve hkʼaw, ngaˬ ve bon yehˬ hkʼaw kanˉ hkʼa deh‸ te chehˇ taˍ ve yoˬ. Chi hta‸ pa taw, chi beu‸ yawˇ hui lehˬ ngaˬ ve bon yehˬ hkʼaw kanˉ gʼa te leh, awˬ chu leh awˬ suhˍ ngaˬ hta‸ gʼa yuˬ tanˇ laˇ tuˬ ve yoˬ.

16Yawˇ hui ceh tiˉ ngaˬ ve bon yehˬ hkʼaw gʼa lo‸ la leh, ngaˬ ve tuˉ tanˇ kuiˬ lo kanˉ gʼa te leh, bon lawˬ kuiˬ lo gʼa sheh kʼai tuˬ yoˬ.

17Yawˇ hui taˍ meu‸ hpe‸ hkʼaw lo‸ la lehˬ, bon yehˬ awˬ hkʼaw hpawˇ ve koˇ caˉ lo gaˬ la ve teˇ yanˇ, yawˇ hui lehˬ pi‸ hpa hta‸ ceh tiˉ gʼa veu‸ deh taˍ ve yoˬ. Yawˇ hui lehˬ, awˬ hkʼaw hpawˇ ve koˇ caˉ lo maˇ kʼo, bon yehˬ hkʼaw maˇ kʼoˆ, kanˉ te chehˇ ve teˇ yanˇ, yawˬ mvuh yuˬ te taˍ ve veu‸ kʼaˇ hkʼaˬ hkʼe ve teˇ ceuˬ hta‸ maˇ kʼoˆ maˇ gʼa veu‸ deh.

18Yawˇ hui kuiˍ maˇ gʼa tawˆ tuˬ, pi‸ hpa yuˬ te taˍ ve uˉ nyiˉ leh haˍ htaw gʼa veu‸ deh taˍ ve yoˬ. Ya‸ hkʼaˇ, haˍ pi maˇ gʼa tsuh‸ taˍ.

19Chaw yaˇ hpoˆ chehˇ taˍ kuiˬ awˬ baˬ hpawˇ ve koˇ caˉ lo maˇ tawˆ kʼai sheˍ gʼuˇ suhˍ, yawˇ hui bon yehˬ hkʼaw kanˉ te chehˇ htaˇ veu‸ deh taˍ ve veu‸ kʼaˇ hta‸ kʼehˆ baˬ leh, da‸kehˬ ve bawehˇ hkʼaw gʼa teh taˉ ve yoˬ. Yawˇ hui veu‸ deh taˍ ve da‸ kehˬ ve veu‸ kʼaˇ oˇ ve teˇ hpaˍ, chaw yaˇ hui hta‸ maˇ gʼa dawˇ haˍ piˇ lawˬ tuˬ, awˬ nu ve veu‸ kʼaˇ hta‸ gʼa kʼaw‸ veu‸ tawˆ-e ve yoˬ.

20Paw hkuˇ teˇ hpaˍ lehˬ, a shu yawˇ ve uˉ hkeh mvuh hta‸ yiˬ lehˍ maˇ gʼa chiˇ baˬ. Uˉ hkeh mvuh zuhˬ zuhˬ ka‸ maˇ gʼa taˍ. Nyi sha law‸ ceh gʼa teh taˍ ve yoˬ.

21Awˬ hkʼaw hpawˇ ve koˇ caˉ lo lo‸-e htaˇ, paw hkuˇ teˇ gʼaˇ ka‸ a peuˉmeuˇ gʼuiˬ maˇ gʼa dawˬ lo‸-e.

22Paw hkuˇ teˇ gʼaˇ ka‸ shu baˬ taˍ ve yaˇ miˇ hta‸ maˇ gʼa heuˆ. Iˉsaˍreˍlaˆ yaˇ miˇ haˉ, maˇ heˆ kʼo paw hkuˇ teˇ gʼaˇ gʼaˇ ve mehˇchawˇma hta‸ gʼa heuˆ ve yoˬ.

23Paw hkuˇ teˇ hpaˍ lehˬ, ngaˬ ve chaw teˇ hpaˍ hta‸ awˬ ceuˬ hkʼaˬ ve teˇ hpaˍ da‸ kehˬ ve leh, hkʼaˬ ve teˇ hpaˍ maˇ da‸ kehˬ ve hta‸ gʼa fuiˍ da‸ maˍ piˇ ve yoˬ.

24Chaw yaˇ teˇ hpaˍ tawˇ gʼawˬ da‸ leh a muˆ te da‸ ve teˇ yanˇ, paw hkuˇ teˇ hpaˍ lehˬ ngaˬ ve awˬliˇtawˇhkawˇ hkʼaˇ suh hteˇ lehˍ suhˉ gʼa jehˬ piˇ ve yoˬ. Ngaˬ awˬ liˇ teh taˍ ve hkʼe, bon pawehˇ teˇ hpaˍ hta‸ hkʼa deh‸ gʼa te ve yoˬ. Yawˇ hui lehˬ, ngaˬ ve shinˉ nyi hta‸ da‸ kehˬ tuˬ gʼa te ve yoˬ.

25Paw hkuˇ teˇ gʼaˇ lehˬ, chaw suh hta‸ htawˇ leh a shu yawˇ awˬ to hta‸ cha‸ chiˆ tuˬ maˇ gʼa te. Ya‸ hkʼaˇ, yawˇ ve awˬ pa awˬ e, yawˇ ve yaˇ, yawˇ ve awˬ viˉ awˬ nyi teˇ gʼaˇ gʼaˇ suh-e ve kʼo, htawˇ hpeh‸ ve yoˬ.

26Yawˇ kʼaw‸ da‸ kehˬ la peuˬ hkʼaw‸ nawˉ, suhˍ nyi hkʼa gaˬ gʼa law taˍ ve yoˬ.

27Oˇ ve hkʼaw‸ nawˉ, bon yehˬ awˬ hkʼaw hpawˇ ve koˇ caˉ lo kʼai leh, yawˇ bon yehˬ hkʼaw kanˉ kʼaw‸ caˉ te hpeh‸ tuˬ, da‸ kehˬ tuˬ te ve tanˇ tuˬ hta‸ gʼa tanˇ piˇ ve yoˬ. Gʼuiˬsha chi hkʼe kʼoˆ taˍ peuˬ ve yoˬ.

28Paw hkuˇ teˇ hpaˍ lehˬ, ngaˬ Iˉsaˍreˍlaˆ chaw hui hta‸ teˇ co peuˬ teˇ co kʼoˆ piˇ taˍ peuˬ ve hkʼe, paw hkuˇ ve kanˉ hta‸ tiˉgʼa te ve yoˬ. Iˉsaˍreˍlaˆ mvuhˇmiˬ hkʼaw yawˇ hui ve mawˇ jeˬ maˇ gʼa cawˬ piˇ. Yawˇ hui loˍve awˬ ceuˬ hta‸ ngaˬ gu taˍ peuˬ.

29Awˬ shiˍ awˬ nu tanˇ tuˬ, venˇbaˆ hpehˇ ve tanˇ tuˬ leh kʼaw‸ hkʼaw‸ piˇ ve tanˇ tuˬ chi teˇ hpaˍlehˬ, paw hkuˇ hui ve caˇ tuˬ hpeh‸ve yoˬ. Iˉsaˍreˍlaˆ mvuhˇmiˬ hkʼaw ngaˬ awˬ pon hkʼa deh‸ fuiˍ teh taˍ ve mawˇ hkʼa peu-eˬ, yawˇ hui ve mawˇ hpeh‸ ve yoˬ.

30Paw hkuˇ teˇ hpaˍ lehˬ, da‸ jaˇ ve awˬ shiˍ awˬ nu awˬ suhˉ teˇ hpaˍ leh, ngaˬ hta‸ tanˇ laˇ ve mawˇ hkʼa peu-eˬ hta‸ yuˬ hpeh‸ ve yoˬ. Iˉsaˍreˍlaˆ chaw hui hkaoˍmonˇ te ve teˇ pawˆ le le, awˉ lawˉ peuˇ ve hkaoˍmonˉ teˇ diˬ paw hkuˇ hui hta‸ gʼa piˇ ve yoˬ. Oˇ htaˇ, ngaˬ ve awˬ bon yawˇ hui ve yehˬ kʼa hkʼoˆ gaˬ la tuˬ yoˬ.

31Paw hkuˇ teˇ hpaˍ lehˬ, yawˇ hkʼaˇ yawˇ suh-e ve, maˇ heˆ kʼo to nuˇ to shaˆ che‸ pehˍ taˍ ve ngaˆ leh to nuˇ to shaˆ ve awˬ shaˍ hta‸ maˇ gʼa caˇ, teh‸ Gʼuiˬsha ngaˬ hta‸ kʼoˆ laˇ ve yoˬ.

← Chapter 43 Jump to: Chapter 45 →