Ezekiel 21

Lahu Bible Edited © Thailand Bible Society and Bible Society of Myanmar, 2010, 2020.

1Gʼuiˬsha ngaˬ hta‸ chi hkʼe kʼaw‸ kʼoˆ laˇ ve yoˬ.

2Chaw yaˇ-oˬ, Yeˍruˆsaˍlehnˍ venˇ hta‸ hkeu piˇ-oˆ. Chaw yaˇ hui oˉ kʼoˍ pui chehˇ ve chehˇ kuiˬ teˇ hpaˍ hta‸ htawˇ hkeu piˇ-oˆ.

3Ngaˬ kʼoˆ chehˇ ve tawˇ chi teˇ hpaˍ Iˉsaˍreˍlaˆ mvuhˇmiˬ hta‸ kʼoˆ piˇ-oˆ. Ngaˬ lehˬ nawˬ hui ve canˇ paˍ hpeh‸ ve yoˬ. Ngaˬ ve aˉhtaw hta‸ gʼawˬ tawˆ leh, da‸ ve chaw hta‸ maˇ kʼoˆ, haiˬ ve chaw hta‸ maˇ kʼoˆ, tiˇ pehˍ laˇ tuˬ yoˬ.

4Awˬ na hpawˇ lo chehˇ ve chaw hui hta‸ te leh awˬ hawˉ hpawˇ lo chehˇ taˍ ve chaw hkʼa peu-eˬ hta‸ tiˇ pehˍ piˇ tuˬ yoˬ.

5Ngaˬ ve aˉhtaw hta‸ gʼawˬ tawˆ leh awˬ hpui hkʼaw maˇ kʼaw‸ hkʼaw‸ keu ve hta‸ chaw hkʼa peu-eˬ gʼa shiˍ tuˬ yoˬ.

6Chaw yaˇ-oˬ, nawˬ nyi ma luˬ chehˇ ve hkʼe te leh hkʼanˇ chehˇ-oˆ. Chaw teˇ gʼaˇ le le nawˬ hta‸ mawˬ hpeh‸ ve chehˇ kuiˬ lo chehˇ taˍ leh, dawˇ haˍ ve hkʼaw hkʼanˇ chehˇ-oˆ.

7Aˬ hto‸ ma te nawˬ hkʼanˇ chehˇ ve awˬ lawn yawˇ hui na nyi laˇ ve kʼo, gaˬ la chehˇ ve awˬ nyi awˬ lawn sha tanˇ hta‸ pa taw hkʼanˇ chehˇ ve yoˬ, teh‸ yawˇ hui hta‸ kʼoˆ piˇ-oˆ. Awˬ ceuˬ oˇ ve gaˬ la ve teˇ yanˇ, yawˇ hui ve nyi ma hkʼaw kawˆ tuˬ hkʼa biˇ cawˬ la leh, yawˇ hui ve la‸ sheh deu lehˍ hpeh‸ kʼai tuˬ yoˬ. Yawˇ hui ha‸ hanˉ ve nyi ma mehˉ kʼai leh, yawˇ hui ve hkui tcuhˉ kʼu teˇ hpaˍ cheˇ cheˇ veˆ veˆ hpeh‸ kʼai tuˬ yoˬ. Awˬ yanˇ gaˬ la peuˬ. Choˬ kaˬ lo chehˇ taˍ ve yoˬ, teh‸ Gʼuiˬsha kʼoˆ ve yoˬ.

8Gʼuiˬsha ngaˬ hta‸ chi hkʼe kʼoˆ laˇ ve yoˬ.

9Chaw yaˇ-oˬ, tcuh kaˍ paˍ ve tawˇ hta‸ yaw leh, ngaˬ Gʼuiˬsha kʼoˆ chehˇ ve tawˇ chi teˇ hpaˍ chaw yaˇ hui hta‸ kʼoˆ piˇ-oˆ. Aˉhtaw teˇ taˬ hta‸ hkʼa deh‸ shiˍ leh shiˆ taˍ peuˬ.

10Tiˇ pehˍ tuˬ hkʼa deh‸ gu shiˍ taˍ leh, mvuhˇ tiˉ po-e‸ hkʼa shuˍ awˬ gʼeuˆ ba tuˬ shiˆ taˍ ve yoˬ. Ha lehˬ tuˬ maˇ kʼaw‸ cawˬ. Awˬ lawn kʼo, ngaˬ ve chaw teˇ hpaˍ lehˬ, shaˍ ti‸ piˇ taˍ ve tawˇ leh ciˍ yanˍ piˇ tuˬ ve hta‸ maˇ na yuˬ ve pa taw yoˬ.

11Aˉhtaw hta‸ la‸ haˉ yehˇ hpeh‸ tuˬ hkʼa deh‸ gu shiˆ taˍ peuˬ. Oˇ ve hta‸ tiˇ pehˍ shehˍ hpaˇ teˇ gʼaˇ ve la‸ sheh hkʼaw keu piˇ tuˬ hkʼa deh‸ gu shiˍ leh shiˆ taˍ peuˬ.

12Chaw yaˇ-oˬ, dawˇ haˍ ve hkʼaw kuˬ chehˇ-oˆ. Aˉhtaw chi ve lehˬ ngaˬ ve chaw teˇ hpaˍ leh Iˉsaˍreˍlaˆ chaw awˬ hoˉ awˬ naˬ hkʼa peu-eˬ awˬ pon hpeh‸ ve yoˬ. Yawˇ hui lehˬ awˬ nu ve ngaˬ ve chaw teˇ hpaˍ geh teˇ geh tiˇ pehˍ ve hta‸ gʼa hkanˍ tuˬ yoˬ. Nyi ma luˬ ve hkʼaw nawˬ hui ve nyi ma pui hta‸ hta chehˇ-oˆ.

13Ngaˬ lehˬ ngaˬ ve chaw teˇ hpaˍ hta‸ lawˇ nyi chehˇ ve yoˬ. Yawˇ hui venˇbaˆ dawˇ hpfuhˆ tuˬ gʼawˬ hkʼaˆ chehˇ ve kʼo, awˬ ceuˬ chi teˇ hpaˍ yawˇ hui awˬ hkʼoˆ gaˬ la piˇ tuˬ yoˬ.

14Chaw yaˇ-oˬ, chi beu‸ tcuh kaˍ paˍ ve tawˇ hta‸ yaw-o. Nawˬ ve la‸sheh hta-o. Aˉhtaw lehˬ teˇ pawˆ peuˬ teˇ pawˆ chaw tuˬ yoˬ. Oˇ ve lehˬ tiˇ pehˍ ve aˉhtaw leh kawˆ piˇ lawˬ ve aˉhtaw hpeh‸ ve yoˬ.

15Oˇ ve lehˬ, ngaˬ ve chaw teˇ hpaˍ ve ha‸ hanˉ ve nyi ma hta‸ mehˉ kʼai piˇ leh, hkui htiˇ poˬ piˇ ve yoˬ. Ngaˬ lehˬ aˉhtaw teˇ taˬ hta‸ cuˇ leh yawˇ hui ve venˇ teˇ hpaˍ hta‸ ho piˇ chehˇ ve yoˬ. Aˉhtaw oˇ ve lehˬ, mvuhˇ tiˉ po-e‸ hkʼa shuˍ ba chehˇ leh tiˇ pehˍ tuˬ gu taˍ ve yoˬ.

16Tcuhˆ jaˇ ve aˉhtaw-oˬ, la‸ sha paˉ la‸ mehˍ paˉ lo chaw keu-o. Nawˬ hkʼa kʼai kuiˬ lo chaw keu-o.

17Ngaˬ htawˇ la‸ sheh hta leh, ngaˬ ve nyi ma zuhˆ ve peuˬ kʼai tuˬ yoˬ. Ngaˬ Gʼuiˬsha chi hkʼe kʼoˆ taˍ peuˬ, teh‸ kʼoˆ ve yoˬ.

18Gʼuiˬsha ngaˬ hta‸ chi hkʼe kʼaw‸ kʼoˆ laˇ ve yoˬ.

19Chaw yaˇ-oˬ, Baˍbuˍlonˍ jawˇmawˇ yawˇ ve aˉhtaw geh teˇ geh laˬ hpeh‸ ve ya‸ kʼaw nyiˇ caˆ hta‸ maiˉ taˍ-o‸. Oˇ ve nyiˇ caˆ caˆ hta‸ teˇ mvuhˇmiˬ tiˉ hkʼaw gʼa tanˬ ve yoˬ. Ya‸ kʼaw ceh da‸ kuiˬ lo yehˬ hkuiˉ daw awˬ heˆ teˇ hpaˍ ti taˍ-o‸.

20Teˇ caˆ lehˬ jawˇmawˇ hta‸ Aˍmawˇniˆ chaw hui ve Raˍbaˆ venˇ lo kʼai ve ya‸ kʼaw hta‸ beˆ maˍ piˇ leh, awˬ nu ve teˇ caˆ lehˬYuˇda‸ mvuhˇmiˬ, hkʼa deh‸ caw ko taˍ ve Yeˍruˆsaˍlehnˍ venˇ hta‸ beˆ maˍ piˇ tuˬ yoˬ.

21Baˍbuˍlonˍ jawˇmawˇ lehˬ, ya‸ kʼaw ceh lo cawˬ ve yehˬ hkuiˉ daw awˬ heˆ paˇ lo huˉ taˍ ve yoˬ. Hkʼaˬ ve teˇ caˆ hta‸ gʼa kʼai cawˇ ve hta‸ dawˇ nyi tuˬ, yawˇ lehˬ hkaˆ yoˬ kʼoˍhta‸ hiˆ nyi ve yoˬ. Yawˇ lehˬ yawˇ ve shaˉ ho‸ teˇ hpaˍ geh jehˬ da‸ leh, tuˉ tanˇ taˍ ve to nuˇ to shaˆ teˇ hkeh ve awˬ shehˍ hta‸ nyi ve yoˬ.

22Chi beu‸ yawˇ ve la‸ sha paˉ la‸ sheh, Yeˍruˆsaˍlehnˍ teh‸ maiˉ taˍ ve hkaˆ ce hta‸ yuˬ ve yoˬ. Hkaˆce oˇ ve yawˇ hta‸ oˇ kaˬ lo kʼai leh ta‸ kʼoˍ duˇ tuˬ, ma‸ bawˆ hkawˇ kuˬ tuˬ, taˍ meu‸ hpe‸ teˇ hpaˍ paˇ lo ta‸ kʼoˍ duˇ leh je‸ kawˍ taˆ-e tuˬ leh gʼuiˬ hkʼaˇ duˇ tuˬ maˍ piˇ ve yoˬ.

23Yeˍruˆsaˍlehnˍ venˇ yaˇ teˇ hpaˍ lehˬ yawˇ hui te da‸ taˍ ve ka ti‸ shaˉ caˆ hta‸ pa taw, chi ve hta‸ yonˍ tuˬ ve maˇ heˆ. Ya‸ hkʼaˇ, chi hkʼe kʼoˆ taˍ ve tawˇ lehˬ yawˇ hui ve venˇbaˆ yawˇ hui hta‸ kʼaw‸ dawˇ nawˇ piˇ tuˬ leh, yawˇ hui shu hpeh yuˬve hta‸ gʼa hkanˍ tuˬ ve yawˇ hui hta‸ shaˍ ti‸ piˇ tuˬ awˬ pon hpeh‸ ve yoˬ.

24Chi ve lehˬ, ngaˬ Gʼuiˬsha kʼoˆchehˇ ve tawˇ hpeh‸ ve yoˬ. Nawˬ hui ve venˇbaˆ teˇ hpaˍ hta‸ hpeu‸ tawˆ la piˇ peuˬ. Nawˬ hui hkʼaˬ ma venˇbaˆ uiˍ jaˇ ve hta‸ chaw teˇ gʼaˇ le le shiˍ ve yoˬ. Nawˬ hui hkʼa te ve kanˉ teˇ ceuˬ le le awˬ hkʼaw lo, nawˬ hui ve venˇbaˆ hta‸ hpeu‸ maˍ piˇ chehˇ ve yoˬ. Nawˬ hui lehˬ, huˉ taˍ leh ciˍ yanˍ ve hta‸ gʼa hkanˍ leh, ngaˬ nawˬ hui hta‸ canˇ paˍ teˇ hpaˍ ve la‸ sheh hkʼaw chiˇ a‸ piˇ tuˬ yoˬ.

25Cha‸ chiˆ leh maˇ da‸ kehˬ ve Iˉsaˍreˍlaˆ hui ve uˉ peunˍ shehˍ hpaˇ teˇ hpaˍ-oˬ, nawˬ hui hta‸ awˬ leh meuˇ ciˍ yanˍ piˇ tuˬ ve awˬ nyi gaˬ la chehˇ ve yoˬ.

26Ngaˬ Gʼuiˬsha kʼoˆ taˍ peuˬ. Nawˬ hui ve shi uˉ tcuhˍ leh uˉ nyiˉ hta‸ yuˬ baˬ-o‸. Teˇ ceuˬ ka‸ hkʼa shuˍ kʼaw‸ hpeh‸ la tuˬ ve maˇ heˆ. Haˍ gʼawˇ ve chaw hta‸ chiˇ taˆ piˇ-oˆ. Uˉ peunˍ chehˇ ve chaw hui hta‸ yuˬ baˬ-o‸.

27Ngaˬ lehˬvenˇ hta‸ luˬ kʼai piˇ tuˬ yoˬ. Ya‸ hkʼaˇ, venˇ hta‸ ciˍ yanˍ piˇ tuˬ ngaˬ leuˆ yuˬ taˍ ve chaw teˇ gʼaˇ maˇ gaˬ la sheˍve ceh ceh, chi hkʼe hpeh‸ la tuˬ ve maˇ heˆ. Oˇ ve hkʼaw‸ nawˉ, ngaˬ yawˇ hta‸ oˇ hkʼe te tcuh tuˬ yoˬ.

28Chaw yaˇ-oˬ, tcuh kaˍ paˍ ve tawˇ hta‸ yaw-o. Iˉsaˍreˍlaˆ chaw hta‸ hkʼa mvuhˇ hkʼa na kʼoˆ chehˇ ve Aˍmawˇniˆ chaw hui hta‸ ngaˬ Gʼuiˬsha kʼoˆ chehˇ ve tawˇ chi teˇ hpaˍ kʼoˆ maˍ piˇ-oˆ. Yawˇ hui hta‸ kʼoˆ piˇ-oˆ. Te luˬ te sheˆ piˇ tuˬ aˉhtaw teˇ taˍ gu taˍ peuˬ. Tiˇ pehˍ tuˬ leh mvuhˇ tiˉ po-e‸ hkʼa shuˍ ba tuˬ, hkʼa deh‸ gu shiˍ taˍ peuˬ.

29Awˬ ha hkʼaw nawˬ hui gʼa mawˬ ve teˇ hpaˍ lehˬ maˇ cawˇ. Nawˬ hui kʼoˆ taˍ ve tawˇ teˇ hpaˍ htawˇ heˍ hkawˇ tiˉ yoˬ. Nawˬ hui lehˬ cha‸ chiˆ leh haiˬ ve yoˬ. Nawˬ hui hta‸ awˬ leh meuˇ ciˍ yanˍ piˇ tuˬ ve awˬ nyi gaˬ la chehˇ ve yoˬ. Aˉhtaw lehˬ, nawˬ hui ve kʼawˍ peˍ hkʼoˆ lo ce la tuˬ yoˬ.

30Aˉhtaw hta‸ teh taˍ-o‸. Nawˬ hui hta‸ te hpanˍ kuiˬ, nawˬ hui paw la kuiˬ mvuhˇmiˬ hkʼaw lo ngaˬ nawˬ hui hta‸ suhˉ jehˬ laˇ tuˬ yoˬ.

31Ngaˬve nyi ma zuhˆ ve awˬ ceuˬ hta‸ aˬ miˍ ha hkʼa shuˍ nawˬ hui awˬ hkʼoˆ lo peu laˇ ve hta‸ nawˬ hui gʼa leh‸ nyi tuˬ yoˬ. Ngaˬ nawˬ hui hta‸ te luˬ te sheˆ puiˉ jaˇ ve chaw hui ve la‸ sheh hkʼaw chiˇ a‸ piˇ tuˬ yoˬ.

32Nawˬ hui lehˬ aˬ miˍ te luˬ te sheˆ ve hta‸ gʼa hkanˍ tuˬ yoˬ. Nawˬ hui ve awˬ suhˍ nawˬ hui ve mvuhˇmiˬ hkʼaw gʼa sheˆ leh, chaw teˇ gʼaˇ ka‸ nawˬ hui hta‸ kʼaw‸ dawˇ nawˇ tuˬ ve maˇ heˆ, teh‸ yawˇ hui hta‸ kʼoˆ piˇ-oˆ, teh‸ Gʼuiˬsha kʼoˆ ve yoˬ.

← Chapter 20 Jump to: Chapter 22 →