Ezekiel 46

Lahu Bible Edited © Thailand Bible Society and Bible Society of Myanmar, 2010, 2020.

← Chapter 45 Jump to: Chapter 47 →

1Gʼuiˬsha kʼoˆ ve, Awˬ hkʼaw hpawˇ ve koˇ caˉ lo kʼai ve mvuhˇ nyi tawˆ hpawˇ ve taˍ meu‸ hpe‸ hta‸, kanˉ te caˇ ve hkaw‸ nyi hkʼa gaˬ gʼa hoˆ taˍ ve yoˬ. Ya‸ hkʼaˇ, oˇ ve hta‸ shinˉ nyi htaˇ leh, ha pa tawˬ htaˇ te ve pawehˇ gaˬ ve teˇ yanˇ gʼa hpaw piˇ taˍ ve yoˬ.

2Uˉ peunˍ chehˇ ve jawˇmawˇ yaˇ lehˬ, awˬ baˬ hpawˇ ve kʼoˇ caˉ lo te leh bawehˇ lonˉ hkʼaw lo‸-e leh, paw hkuˇ teˇ hpaˍ aˬ miˍ tuˉ tanˇ ve tanˇ tuˬ leh, awˬ chawˇ te da‸ ve tanˇ tuˬ hta‸ tanˇ piˇ chehˇ htaˇ, yehˬmiˉhpe‸ paˇ lo gʼa huˉ taˍ ve yoˬ. Oˇ kaˬ yehˬmiˉhpe‸ lo yawˇ oˉ kʼoˍ pui taˉ peuˬ hkʼaw‸ nawˉ, gʼa kʼaw‸ tawˆ kʼai ve yoˬ. Taˍ meu‸ hpe‸ oˇ ve hta‸ mvuhˇ maˇ hpeu‸ la sheˍ ve ceh ceh maˇ gʼa hoˆ taˍ.

3Shinˉ nyi htaˇ leh ha pa tawˬ ve pawehˇ te htaˇ teˇ pawˆ le le, chaw yaˇ teˇ hpaˍ htawˇ yehˬmiˉhpe‸ paˇ lo boˆ taˍ leh, Gʼuiˬsha hta‸ oˉ kʼoˍ gʼa pui ve yoˬ.

4Shinˉ nyi gaˬ htaˇ, jawˇmawˇ yaˇ lehˬ Gʼuiˬsha hta‸ aˬ miˍ tuˉ tanˇ piˇ tuˬ awˬ pon, te‸ chiˉ awˬ kuiˉ awˬ haiˇ maˇ cawˬ ve yawˬ ehˉ hkaw‸ hkeh leh yawˬ paˍ lonˉ teˇ hkeh gʼa yuˬ laˬ ve yoˬ.

5Yawˬ paˍ lonˉ teˇ hkeh geh caˬ hkʼa meu-e shehˆ panˇ gʼa yuˬ laˬ leh, yawˬ ehˉ teˇ hkeh le le geh yawˇ piˇ gaˇ ve awˬ ceuˬ gʼa yuˬ laˬ piˇ ve yoˬ. Awˬ shiˍ awˬ nu tuˉ tanˇ tuˬ chi teˇ hpaˍ geh shaˍlonˍ chu teˇ kaw hta‸ htawˇ gʼa yuˬ laˬ ve yoˬ.

6Ha pa tawˬ ve pawehˇ te htaˇ, yawˇ lehˬ te‸ chiˉ awˬ kuiˉ awˬ haiˇ maˇ cawˬ ve nuˇ paˍ lonˉ teˇ hkeh, yawˬ ehˉ hkaw‸ hkeh leh yawˬ paˍ lonˉ teˇ hkeh gʼa tanˇ piˇ ve yoˬ.

7Nuˇ paˍ lonˉ leh yawˬ paˍ lonˉ geh teˇ geh caˬ hkʼa meu-e shehˆ panˇ gʼa yuˬ laˬ leh, yawˬ ehˉ teˇ hkeh le le geh teˇ geh jawˇmawˇ yaˇ yawˇ piˇ gaˇ ve awˬ ceuˬ teˇ ceuˬ ceuˬ hta‸ gʼa yuˬ laˬ piˇ ve yoˬ. Awˬ shiˍ awˬ nu tanˇ tuˬ oˇ ve teˇ hpaˍ geh teˇ geh shaˍlonˍ chu teˇ kaw hta‸ htawˇ gʼa yuˬ laˬ piˇ ve yoˬ.

8Jawˇmawˇ yaˇ lehˬ, yawˇ laˬ ve ya‸ kʼaw hkʼaˇ suh bawehˇ lonˉ hta‸ hpaˍ leh gʼa kʼaw‸ tawˆ kʼai ve yoˬ.

9Bon pawehˇ te htaˇ, Gʼuiˬsha hta‸ oˉ kʼoˍ ca pui la ve chaw teˇ hpaˍ lehˬ, awˬ na hpawˇ ve taˍ meu‸ hpe‸ hkʼaw lo‸ la taˍ ve kʼo, yawˇ hui oˉ kʼoˍ pui taˉ peuˬ hkʼaw‸ nawˉ, awˬ hawˉ hpawˇ ve taˍ meu‸ hpe‸ hkʼaw gʼa kʼaw‸ tawˆ-e ve yoˬ. Chaw teˇ gʼaˇ ka‸ yawˇ laˬve taˍ meu‸ hpe‸ hkʼaw maˇ gʼa tawˆ-e. Maˇ laˬ ve teˇ hpawˇ lo gʼa tawˆ-e ve yoˬ.

10Chaw yaˇ teˇ hpaˍ laˬ chehˇ ve teˇ yanˇ, jawˇmawˇ yaˇ htawˇ gʼa lo‸ la leh, chaw yaˇ teˇ hpaˍ tawˆ kʼai ve teˇ yanˇ, yawˇ htawˇ gʼa tawˆ kʼai ve yoˬ.

11Hti caˇ hti dawˬ htaˇ leh bon pawehˇ te htaˇ, nuˇ paˍ lonˉ leh yawˬ paˍ lonˉ geh teˇ geh caˬ hkʼa meu-e shehˆ panˇ gʼa yuˬ laˬ leh, yawˬ ehˉ teˇ hkeh le le geh teˇ geh oˉ kʼoˍ ca pui la ve chaw oˇ ve piˇ gaˇ ve awˬ ceuˬ teˇ ceuˬ ceuˬ yuˬ laˬ hpeh‸ ve yoˬ. Awˬ shiˍ awˬ nu tuˉ tanˇ kuiˬ lo shaˍlonˍ chu htawˇ teˇ kaw gʼa yuˬ veu laˇ ve yoˬ.

12Uˉ peunˍ chehˇ ve jawˇmawˇ yaˇ lehˬ, yawˇ hkʼaˇ yawˇ dawˇ tawˆ ve hkʼe, Gʼuiˬsha hta‸ aˬ miˍ tuˉ tanˇ ve tanˇ tuˬ, maˇ heˆ kʼo awˬ chawˇ te da‸ ve tanˇ tuˬ tanˇ piˇ gaˇ ve kʼo, mvuhˇ nyi tawˆ hpawˇ ve taˍ meu‸ hpe‸ hta‸ yawˇ awˬ pon hpaw piˇ tuˬ yoˬ. Shinˉ nyi htaˇ te ve hkʼe, tanˇ tuˬ oˇ ve teˇ hpaˍ hta‸ gʼa tanˇ piˇ leh, yawˇ tawˆ-e peuˬ ve teˇ yanˇ, taˍ meu‸ hpe‸ oˇ ve hta‸ gʼa kʼaw‸ hoˆ taˍ ve yoˬ, teh‸ Gʼuiˬsha kʼoˆ ve yoˬ.

13Gʼuiˬsha kʼoˆ ve, Teˇ shawˉ le le te‸ chiˉ awˬ kuiˉ awˬ haiˇ maˇ cawˬ ve teˇ hkʼaw‸ gaˬ peuˬ ve yawˬ ehˉ hta‸ yuˬ leh, Gʼuiˬsha hta‸ aˬ miˍ gʼa tuˉ tanˇ piˇ ve yoˬ. Tanˇ tuˬ chi hta‸ teˇ shawˉ le le gʼa tanˇ piˇ ve yoˬ.

14Chi hkʼoˆ ka‸, teˇ shawˉ le le caˬ hkʼa meu-e teˇ cawehˬ hta‸ shaˍlonˍ chu teˇ kaw geh teˇ geh gʼa tanˇ piˇ ve yoˬ. Chi ve lehˬ, teˇ co peuˬ teˇ co gʼa te kʼai tuˬ ve awˬ liˇ hpeh‸ ve yoˬ.

15Yawˬ ehˉ, caˬ hkʼa meu-e, leh shaˍlonˍ chu chi teˇ hpaˍ hta‸ teˇ shawˉ le le Gʼuiˬsha hta‸ gʼa tuˉ tanˇ piˇ ve yoˬ, teh‸ Gʼuiˬsha kʼoˆ ve yoˬ.

16Gʼuiˬsha kʼoˆ ve, Jawˇmawˇ yaˇ lehˬ yawˇ ve miˬguiˬ yawˇ ve yaˇ paˍ teˇ gʼaˇ hta‸ la‸ shawnˍ kʼaw‸ te piˇ ve kʼo, miˬguiˬ oˇ ve lehˬ yawˇ yaˇ paˍ ve miˬguiˬ hpeh‸ kʼai ve yoˬ.

17Ya‸ hkʼaˇ, uˉ peunˍ chehˇ ve jawˇmawˇ yaˇ lehˬ, yawˇ ve miˬguiˬ hta‸ yawˇ ve kanˉ te paˍ teˇ gʼaˇ gʼaˇ hta‸ piˇ ve kʼo, kʼaw‸ hkʼaw‸ piˇ ve awˬ hkʼaw‸ gaˬ la ve teˇ yanˇ, miˬguiˬ oˇ ve jawˇmawˇ yaˇ ve miˬguiˬ kʼaw‸ hpeh‸ la tuˬ yoˬ. Miˬguiˬ oˇ ve jawˇmawˇ leh yawˇ ve yaˇ teˇ hpaˍ ve mawˇ hpeh‸ la tuˬ yoˬ.

18Uˉ peunˍ chehˇ ve jawˇmawˇ yaˇ lehˬ, shu ve mawˇ jeˬ hkʼaˬ ve teˇ ceuˬ hta‸ maˇ kʼoˆ, yuˬ maˇ hpeh‸. Yawˇ ve yaˇ teˇ hpaˍ hta‸ piˇ ve miˬguiˬ lehˬ, yawˇ gʼa taˍ ve miˬguiˬ hkʼaw ve ceh tiˉ gʼa hpeh‸ piˇ ve yoˬ. Oˇ hkʼe te ve kʼo, yawˇ hui lehˬ ngaˬ ve chaw teˇ hpaˍ hta‸ fawˉ mehˍ leh, yawˇ hui ve miˬguiˬ hta‸ hiˉ yuˬ ve hkʼe hpeh‸ ve yoˬ, teh‸ Gʼuiˬsha kʼoˆ ve yoˬ.

19Oˇ ve hkʼaw‸ nawˉ, chaw oˇ ve ngaˬ hta‸ awˬ hkʼaw hpawˇ ve koˇ caˉ awˬ hawˉ hpawˇ lo cawˬ ve taˍ meu‸ hpe‸ awˬ na paˉ teˇ hkʼaˇ hteˇ lehˍ lo cawˬ ve bawehˇ teˇ hpaˍ hkʼaw lo‸-e kuiˬ yehˬmiˉhpe‸ lo shiˍkʼai laˇ ve yoˬ. Bawehˇ oˇ ve teˇ hpaˍ lehˬ, paw hkuˇ teˇ hpaˍ awˬ pon da‸ kehˬ ve bawehˇ hpeh‸ ve yoˬ. Bawehˇ oˇ ve teˇ hpaˍ mvuhˇ nyi kʼehˬ hpawˇ lo cawˬ ve chehˇ kuiˬ yawˇ ngaˬ hta‸ beˆ maˍ laˇ leh kʼoˆ ve,

20Chehˇ kuiˬ oˇ ve lehˬ, da‸ kehˬ ve awˬ ceuˬ teˇ ceuˬ ka‸ awˬ baˬ hpawˇ ve koˇ caˉ lo yuˬ tawˆ-e leh, chaw yaˇ teˇ hpaˍ hta‸ maˇ gʼa dawˇ haˍ piˇ lawˬ tuˬ, paw hkuˇ teˇ hpaˍ venˇbaˆ hpehˇ ve tuˉ tanˬ tuˬ leh, kʼaw‸ hkʼaw‸ piˇ ve tanˇ tuˬ shaˍ teˇ hpaˍ hta‸ keu caˉ kuiˬ leh, tuˉ tanˇ tuˬ ve caˬ hkʼa meu-e hta‸ gu tuˬ ve chehˇ kuiˬ hpeh‸ ve yoˬ, teh‸ ngaˬ hta‸ kʼoˆ laˇve yoˬ.

21Oˇ ve hkʼaw‸ nawˉ, yawˇ ngaˬ hta‸ awˬ baˬ hpawˇ ve koˇ caˉ lo shiˍ kʼai laˇ leh, koˇ caˉ oˇ ve awˬ ceˍ kʼaweh‸ awˇ hpawˇ hpawˇ lo zuhˬ hpawˇ awˇ chi ngaˇ shaw‸, kʼehˬ hpawˇ shehˆ chi nyiˇ shaw‸ cawˬ ve koˇ caˉ ehˉ teˇ hpaˍ cawˬ taˍ ve ngaˬ hta‸ maˍ laˇ ve yoˬ.

23Koˇ caˉ ehˉ oˇ ve teˇ hpaˍ hkʼa caw zuhˇ lo, haˉ pui ko taˍ ve gʼo‸ pa cawˬ leh, gʼo‸ pa oˇ ve awˬ paˇ lo hkʼaˇ ciˇ pehˬ cawˬ taˍ ve yoˬ.

24Oˇ htaˇ chaw oˇ ve lehˬ, Chaw yaˇ teˇ hpaˍ tanˇ laˇ ve tuˉ tanˇ tuˬ teˇ hpaˍ hta‸, bon yehˬ hkʼaw kanˉ te paˍ hui hkʼaˇ ciˇ pehˬ chi teˇ hpaˍ hkʼaw keu caˉ ve yoˬ, teh‸ ngaˬ hta‸ kʼoˆ laˇ ve yoˬ.

← Chapter 45 Jump to: Chapter 47 →