Ezekiel 23 — Lahu Bible Edited © Thailand Bible Society and Bible Society of Myanmar, 2010, 2020.

1Gʼuiˬsha ngaˬ hta‸ chi hkʼe kʼoˆ laˇ ve yoˬ.

2Chaw yaˇ-oˬ, teˇ pawˆ htaˇ awˬ viˉ awˬ nyi yaˇ miˇ nyiˇ gʼaˇ cawˬ ve yoˬ.

3Yawˇ huiˉ maˬ a sha‸ i sheˍ htaˇ, Eˇjiˇtu‸ mvuhˇmiˬ hkʼaw chehˇ leh meh maˬ lanˉ te ve yoˬ.

4Awˬ viˉ ma lehˬ, Aˍhawˇlaˆ meh ve yoˬ.(yawˇ lehˬ Saˍmaˍriˆ venˇ hta‸ kʼoˆ gaˇ ve yoˬ) Awˬ nyi ma lehˬ Aˍhawˇliˇbaˆ meh ve yoˬ.(Yawˇ lehˬ Yeˍruˆsaˍlehnˍ hta‸ kʼoˆ gaˇ ve yoˬ.) Ngaˬ yawˇ huiˉ maˬ nyiˇ gʼaˇ gʼaˇ hta‸ heuˆ leh, ngaˬ awˬ pon yaˇ teˇ hpaˍ paw la piˇ ve yoˬ.

5Aˍhawˇlaˆ lehˬ ngaˬ miˇ ma hpeh‸ ve htawˇ, yawˇ meh maˬ lanˉ kʼaw‸ te leh, Aˍsuˇriˆ hkʼaw chehˇ ve yawˇ ve chaw haˉ paˍ teˇ hpaˍ hta‸ hkʼawˇ faˍ jaˇ ve yoˬ.

6Yawˇ hui lehˬ, nyi naˆ meuˉ lehˍ ve veu‸ kʼaˇ hta‸ veu‸ deh taˍ ve ma‸ yaˇ teˇ hpaˍ hpeh‸ leh, chaw uiˍ, aˉ yaˇ uiˍ ve ma‸ poˍ teˇ hpaˍ hpeh‸ ve yoˬ. Yawˇ hui hkʼa peu-eˬ awˬ hkiˇ awˬ naˬ da‸ leh, a sha‸ i sheˍ ve ma‸ poˍ teˇ hpaˍ hpeh‸ ve yoˬ.

7Yawˇ lehˬ Aˍsuˇriˆ ma‸ poˍ oˇ ve teˇ hpaˍ ve meh maˬ lanˉ hpeh‸ leh, yawˇ hui hta‸ hkʼawˇ faˍ ve nyi ma lehˬ, yawˇ hta‸ Aˍsuˇriˆ chaw hui ve shaˉ ho‸ teˇ hpaˍ hta‸ oˉ kʼoˍ pui piˇ lawˬ leh, yawˇ ve awˬ to hta‸ cha‸ chiˆ kʼai piˇ lawˬ ve yoˬ.

8Eˇjiˇtu‸ mvuhˇmiˬ hkʼaw yaˇ miˇ haˉ ve awˬ me‸ awˬ hponˇ luˬ kʼai piˇ lawˬ ve meh maˬ lanˉ ve kanˉ hta‸ kʼaw‸ caˉ te chehˇ ve yoˬ. Yawˇ yaˇ miˇ haˉ tanˬ hpeh‸ la ve awˬ yanˇ hta‸ te leh, hawˉ hkʼaˆ teˇ hpaˍ yawˇ geh ca zuh‸ leh, yawˇ hta‸ meh maˬ lanˉ hkʼe shawˍ taˍ ve yoˬ.

9Hkʼe te leh, ngaˬ yawˇ hta‸ yawˇ ha‸ jaˇ ve Aˍsuˇriˆ chaw hui hta‸ chiˇ a‸ piˇ ve yoˬ.

10Yawˇ hui yawˇ ve veu‸ kʼaˇ hta‸ kʼehˆ baˬ leh, yawˇ ve yaˇ paˍ yaˇ miˇ teˇ hpaˍ hta‸ hpeh yuˬ peuˬ hkʼaw‸ nawˉ, yawˇ hta‸ aˉhtaw chaw pehˍ piˇ ve yoˬ. Hkʼa ti chi ti lo chehˇ ve yaˇ miˇ teˇ hpaˍ yawˇ awˬ lawn kʼoˆ da‸ ve yoˬ.

11Chi hkʼe hpeh‸ chehˇ ve hta‸ yawˇ ve awˬ nyi ma Aˍhawˇliˇbaˆ gʼa mawˬ ve htawˇ, yawˇ lehˬ awˬ viˉ ma Aˍhawˇlaˆ a‸ kehˉ haiˬ jaˇ ve meh maˬ lanˉ hpeh‸ ve yoˬ.

12Yawˇ htawˇ awˬ hkiˇ awˬ naˬ da‸ leh awˬ gʼeuˆ ba ve veu‸ kʼaˇ hta‸ veu‸ deh taˍ ve Aˍsuˇriˆ ma‸ poˍ oˇ ve teˇ hpaˍ hta‸ hkʼawˇ faˍ jaˇ ve yoˬ.

13Yawˇ lehˬ cha‸ chiˆ jaˇ leh, yawˇ ve awˬ viˉ ma hkʼa shuˍ haiˬ jaˇ ve hta‸ ngaˬ gʼa mawˬ ve yoˬ.

14Yawˇ lehˬ, shaˬ te shaˬ haiˬ jaˇ la ve yoˬ. Yawˇ lehˬ gʼo‸ pa hkʼoˆ lo htawˆ keu taˍ ve Baˍbuˍlonˍ ma‸ ponˍ lonˉ teˇ hpaˍ ve awˬ han hta‸ gʼa mawˬ leh hkʼawˇ faˍ jaˇ ve yoˬ. Ma‸ poˍ lonˉ oˇ ve teˇ hpaˍ lehˬ, nyiˉ-ehˍ ve veu‸ kʼaˇ veuˬ deh taˍ ve yoˬ. Yawˇ hui ve caw‸ cehˍ nyi lo hpa caˆ hpeh taˍ leh, oˉ kʼoˍ hkʼoˆ lo nyi sha ve uˉ nyiˉ nyiˉ taˍ ve yoˬ.

16Yawˇ yawˇ hui hta‸ gʼa mawˬ ve teˇ yanˇ hkʼawˇ faˍ jaˇ ve nyi ma cawˬ leh, Baˍbuˍlonˍ mvuhˇmiˬ lo chaw hta‸ hpehˇ leh yawˇ hui geh kʼai tcuh ve yoˬ.

17Baˍbuˍlonˍ chaw teˇ hpaˍ laˬ leh yawˇ geh haˉ chawˇ haˉ paˆ te ve yoˬ. Yawˇ hui yawˇ hta‸ te luˬ piˇ ve pa taw, awˬ leh meuˇ gaˬ htaˇ yawˇ yawˇ hui hta‸ nyi bawˬ la ve yoˬ.

18Hkʼe te leh, yawˇ meh maˬ lanˉ hpeh‸ ve awˬ lawn chaw hkʼa peu-eˬ hta‸ hpeu‸ maˍ piˇ ve yoˬ. Yawˇ ve awˬ viˉ ma hta‸ cha‸ naˬ ve hkʼe, yawˇ hta‸ htawˇ ngaˬ cha‸ naˬ jaˇ ve yoˬ.

19Yawˇ lehˬ ponˬ laˬ htaˇ a‸ kehˉ haiˬ ve meh maˬ lanˉ hpeh‸ la leh, Eˇjiˇtu‸ mvuhˇmiˬ hkʼaw yaˇ nehˬ htaˇ yawˇ hkʼa te jaw ve kanˉ hkʼa peu-eˬ hta‸ kʼaw‸ te chehˇ ve yoˬ.

20Yawˇ lehˬ piˉ laˬ hkʼe awˬ suhˍ awˬ shaˍ nyi hkʼaˇ suh tuˬ te gaˇ puiˉ ve hawˉ hkʼaˆ teˇ hpaˍ hta‸ hkʼawˇ faˍ jaˇ ve yoˬ.

21(Aˍhawˇliˇbaˆ-oˬ, nawˬ lehˬ Eˇjiˇtu‸ mvuhˇmiˬ hkʼaw yaˇ miˇ haˉ hpeh‸ chehˇ htaˇ, hawˉ hkʼaˆ paˍ teˇ hpaˍ nawˬ ve cuˉ hta‸ kʼa guiˇ leh, nawˬ ve awˬ me‸ awˬ hponˇ hta‸ te luˬ laˇ ve cha‸ chiˆ ve kanˉ oˇ ve teˇ hpaˍ hta‸ nawˬ kʼaw‸ caˉ te gaˇ chehˇ sheˍ ve yoˬ.)

22Chi beu‸ Aˍhawˇliˆbaˆ-oˬ, ngaˬ Gʼuiˬsha naw hta‸ chi hkʼe kʼoˆ laˇ ve yoˬ. Nawˬ lehˬ chaw haˉ paˍ oˇ ve teˇ hpaˍ hta‸ nyi bawˬ jaˇ peuˬ. Ya‸ hkʼaˇ, yawˇ hui nawˬ hta‸ nyi ma zuhˆ tuˬ ngaˬ te piˇ leh, nawˬ hta‸ ca hoˆ la tuˬ ngaˬ shiˍ veu laˇ tuˬ yoˬ.

23Baˍbuˍlonˍ chaw teˇ hpaˍ, Peˍkoˆ venˇ, Shawˆ venˇ, Kawˆ venˇ chi teˇ hpaˍ hkʼaw chehˇ ve Hkaˍlaˍdehˇ chaw teˇ hpaˍ leh, Aˍsuˇriˆ chaw hkʼa peu-eˬ ve hta‸ ngaˬ shiˍ veu laˇ tuˬ yoˬ. Awˬ hkiˇ awˬ naˬ da‸ leh, awˬ me‸ awˬ hponˇ cawˬ ve ma‸ poˍ teˇ hpaˍ hta‸ ngaˬ shaw hpoˆ tuˬ yoˬ

24Yawˇ hui lehˬ awˬ na hpawˇ lo chehˇ taˍ leh nawˬ hta‸ ca bawˆ la tuˬ yoˬ. Yawˇ hui lehˬ htanˬ tuˬ leh sho uˉ tcuhˍ hkʼawˆ taˍ leh, nawˬ hta‸ caw hoˆ tuˬ yoˬ. Ngaˬ nawˬ hta‸ yawˇ hui ve la‸ sheh hkʼaw lo chiˇ a‸ piˇ leh, yawˇ hui ve awˬ liˇ awˬ hkʼaˇ cawˬ ve hkʼe nawˬ hta‸ suhˉ jehˬ laˇ tuˬ yoˬ.

25Ngaˬ nawˬ hta‸ nyi ma zuhˆ ve pa taw, nawˬ hta‸ yawˇ hui nyi ma zuhˆ leh te guiˇ gaˇ ve hkʼe te guiˇ piˇ lawˬ tuˬ yoˬ. Yawˇ hui lehˬ nawˬ ve naˍ paw leh naˍ hkʼawˇ hta‸ shawˆ baˬ leh, nawˬ ve yaˇ teˇ hpaˍ hta‸ tiˇ pehˍ tuˬ yoˬ. Yoˬ, yawˇ hui lehˬ nawˬ ve yaˇ paˍ yaˇ miˇ teˇ hpaˍ hta‸ yuˬ leh awˬ te‸ te‸ aˬ miˍ tuˉ pehˍ piˇ tuˬ yoˬ.

26Yawˇ hui lehˬ nawˬ ve veu‸ kʼaˇ hta‸ tzuh‸ suhˍ leh, nawˬ ve shehnˉ shiˍ hta‸ yuˬ tuˬ yoˬ.

27Nawˬ Eˇjiˇtu‸ mvuhˇmiˬ hkʼaw chehˇ sheˍ htaˇ ka‸, hkʼawˇ faˍ leh te chehˇ ve cha‸ chiˆ ve kanˉ oˇ ve hta‸ ngaˬ tawˍ taˍ tuˬ yoˬ. Nawˬ lehˬ shaˉ ho‸ teˇ hpaˍ hta‸ kʼaw‸ hpfuhˆ nyi tuˬ ve maˇ heˆ. Eˇjiˇtu‸ mvuhˇmiˬ awˬ lawn hta‸ kʼaw‸ dawˇ nyi tuˬ ve maˇ heˆ, teh‸ Gʼuiˬsha kʼoˆ ve yoˬ.

28Gʼuiˬsha chi hkʼe kʼoˆ ve yoˬ. Ngaˬ nawˬ hta‸ nawˬ nyi bawˬ leh canˇ ve chaw hui hta‸ chiˇ a‸ piˇ tuˬ yoˬ.

29Yawˇ hui nawˬ hta‸ canˇ ve pa taw, nawˬ te gʼa taˍ ve mawˇ hkʼa peu-eˬ hta‸ yuˬ kʼai leh, meh maˬ lanˉ hkʼe awˬ kʼu nyi teh taˉ laˇ tuˬ yoˬ. Nawˬ meh maˬ lanˉ te leh, nawˬ ve hkʼawˇ faˍ puiˉ ve nyi ma lehˬ,

30nawˬ hta‸ chi hkʼe hpeh‸ la piˇ ve yoˬ. Nawˬ lehˬ chaw ceuˬ teˇ hpaˍ ve meh maˬ lanˉ hpeh‸ leh, yawˇ hui ve shaˉ ho‸ teˇ hpaˍ hta‸ pa taw cha‸ chiˆ kʼai taˍ peuˬ.

31Nawˬ lehˬ nawˬ viˉ ma ve hkui ha hta‸ gʼa‸ ve pa taw, nawˬ huiˉ maˬ hta‸ ciˍ yanˍ ve kawˆ ngaˬ hkʼa shuˍ shuˍ taw laˇ tuˬ yoˬ, teh‸ Gʼuiˬsha kʼoˆ ve yoˬ.

32Gʼuiˬsha kʼoˆ ve, Nawˬ lehˬ nawˬ viˉ ma ve kawˆ hta‸ gʼa dawˬ tuˬ yoˬ. Kawˆ oˇ ve lehˬ uiˍ leh naˉ ve yoˬ. Chaw teˇ gʼaˇ le le nawˬ hta‸ hkʼa mvuhˇ hkʼa na kʼoˆ tuˬ yoˬ. Kawˆ oˇ ve biˇ sheˆ chehˇ ve yoˬ.

33Kawˆ oˇ ve nawˬ hta‸ hkanˍ haˍ jaˇ piˇ lawˬ leh, bvuhˆ la piˇ tuˬ yoˬ. Nawˬ viˉ ma Saˍmaˍriˆ ve kawˆ oˇ ve lehˬ, kawˆ tuˬ leh luˬ ve sheˆ ve kawˆ hpeh‸ ve yoˬ.

34Nawˬ lehˬ kawˆ oˇ ve hkʼaw cawˬ ve awˬ gʼuiˬ hta‸ teˇ jaˆ ka‸ maˇ cawˬ taˉ htaˇ hkʼa gaˬ gʼa dawˬ peuˬ tuˬ yoˬ. Hkoˇ kʼai taˍ ve awˬ hkʼeh‸ lehˉ hta‸ yuˬ leh nawˬ ve cuˉ hta‸ gʼa shawˆ tuˬ yoˬ. Ngaˬ Gʼuiˬsha chi hkʼe kʼoˆ taˍ peuˬ ve yoˬ, teh‸ kʼoˆ ve yoˬ.

35Chi beu‸ Gʼuiˬsha chi hkʼe kʼoˆ chehˇ ve yoˬ. Nawˬ ngaˬ hta‸ leunˇ kʼai leh, ngaˬ hta‸ hpfuhˆ baˬ taˉ peuˬ ve pa taw, nawˬ haˉ chawˇ te leh hkʼawˇ faˍ puiˉ ve nyi ma awˬ tan chi hkʼe gʼa hkanˍ tuˬ yoˬ, teh‸ Gʼuiˬsha kʼoˆ ve yoˬ.

36Gʼuiˬsha ngaˬ hta‸ chi hkʼe kʼaw‸ kʼoˆ laˇ ve yoˬ. Chaw yaˇ-oˬ, Aˍhawˇlaˆ leh Aˍhawˇliˇbaˆ hta‸ suhˉ jehˬ piˇ tuˬ nawˬ gu taˍ peuˬ laˇ. Yawˇ huiˉ maˬ lehˬ cha‸ chiˆ jaˇ ve kanˉ hta‸ te peuˬ ve pa taw, yawˇ huiˉ maˬ hta‸ venˇbaˆ taˍ-o‸.

37Yawˇ huiˉ maˬ lehˬ shaˉ ho‸ teˇ hpaˍ hta‸ haˉ chawˇ te leh, ngaˬ awˬ pon paw la piˇ taˍ ve yaˇ teˇ hpaˍ hta‸ tiˇ pehˍ ve yoˬ. Yawˇ huiˉ maˬ lehˬ ngaˬ ve yaˇ paˍ teˇ hpaˍ hta‸ yuˬ leh, yawˇ hui ve shaˉ ho‸ teˇ hpaˍ hta‸ tuˉ tanˇ piˇ ve yoˬ.

38Yawˇ huiˉ maˬ te ve kanˉ oˇ hkʼe ceh tiˉ maˇ heˆ sheˍ. Yawˇ huiˉ maˬ lehˬ ngaˬ ve bon yehˬ hta‸ cha‸ chiˆ tuˬ te leh, ngaˬ teh taˍ ve shinˉ nyi hta‸ te ya‸ ve yoˬ.

39Yawˇ huiˉ maˬ ngaˬ ve yaˇ teˇ hpaˍ hta‸ yuˬ leh, yawˇ hui ve shaˉ ho‸ teˇ hpaˍ hta‸ tuˉ tanˇ piˇ ve teˇ nyi htaˇ, ngaˬ ve bon yehˬ hkʼaw laˬ leh cha‸ chiˆ tuˬ te ve yoˬ.

40Vuiˇ kuiˬ lo chehˇ ve chaw hui hta‸ yawˇ huiˉ maˬ teˇ hkui teˇ hkui chaw hta‸ hpehˇ leh ca kuˬ tcuh leh, yawˇ hui gaˬ la ve yoˬ. Awˬ viˉ awˬ nyi chi nyiˇ gʼaˇ iˉkaˆ hehˉ leh awˬ hkiˇ shawˍ peuˬ hkʼaw‸ nawˉ, shi caˆ pfuhˇ taˍ ve yoˬ.

41Yawˇ huiˉ maˬ lehˬ nyi sha ve mui hkʼawˇ hkʼoˆ lo mui taˍ leh, yawˇ hui gʼuˇ suhˍ lo hpui lawˇ hkʼa deh‸ gu taˍ leh, oˇ ve awˬ hkʼoˆ lo ngaˬ piˇ taˍ ve sha hawnˉ leh shaˍlonˍ chu teˇ hpaˍ teh taˍ ve yoˬ.

42Heh puiˉ hkʼaw lo laˬ taˍ ve chaw teˇmoˍ te toˇ chehˇ ve awˬ hkawˇ hta‸ gʼa kaˇ ve yoˬ. Yawˇ hui lehˬ yaˇ miˇ oˇ ve teˇ hpaˍ ve la‸ sheh hta‸ la‸ kawˬ tcuhˉ piˇ leh, yawˇ hui ve oˉ kʼoˍ hta‸ nyi sha ve shi uˉ tcuhˍ hkʼawˆ piˇ ve yoˬ.

43Yawˇ hui lehˬ haˉchawˇ haˉ paˆ te maw jaˇ peuˬ ve yaˇ miˇ hta‸ meh maˬ lanˉ hkʼa shuˍ shawˍ leh yehˇ chehˇ ve yoˬ, teh‸ ngaˬ ve awˬ to hta‸ ngaˬ kʼoˆ piˇ chehˇ ve yoˬ.

44Yawˇ hui lehˬ meh maˬ lanˉ oˇ ve teˇ hpaˍ geh teˇ pawˆ peuˬ teˇ pawˆ kʼai chehˇ ve yoˬ. Yawˇ hui lehˬ haiˬ ve yaˇ miˇ Aˍhawˇlaˆ leh Aˬhawˇliˇbaˆ geh kʼaw‸ kʼai ve yoˬ.

45Hteˇ ve cawˇ ve chaw teˇ hpaˍ lehˬ yawˇ huiˉ maˬ hta‸ haˉchawˇ te sheh ma leh chaw hta‸ tiˇ pehˍ shehˍ ma, teh‸ kʼoˆleh deˇ piˇ tuˬ yoˬ. Awˬ lawn kʼo, yawˇ huiˉ maˬ lehˬ haˉ chawˇ haˉ paˆ te leh, yawˇ hui ve la‸ sheh hta‸ awˬ suhˍ ngawˉ taˍ ve pa taw yoˬ, teh‸ Gʼuiˬsha kʼoˆ ve yoˬ.

46Gʼuiˬsha chi hkʼe kʼoˆ ve yoˬ. Yawˇ huiˉ maˬ hta‸ kawˆ piˇ lawˬ leh, yawˇ huiˉ maˬ ve mawˇ hta‸ hiˉ yuˬ piˇ tuˬ chaw teˇ moˍ hta‸ shiˍ veu laˇ-oˆ.

47Chaw moˍ oˇ ve yawˇ huiˉ maˬ hta‸ haˉ pui baˬ leh, aˉhtaw chaw hpehˇ tcuh-o. Yawˇ huiˉ maˬ ve yaˇ teˇ hpaˍ hta‸ tiˇ pehˍ leh, yawˇ hui ve yehˬ hta‸ aˬ miˍ tuˉ baˬ tcuh-o.

48Mvuhˇmiˬ hkʼaˬ ti chi ti lo chehˇ ve yaˇ miˇ teˇ hpaˍ, yawˇ huiˉ maˬ hkʼe haˉ chawˇ haˉ paˆ maˇ gʼa te leh sha ti‸ gʼa tuˬ, ngaˬ leh cha‸ chiˆ ve kanˉ chi teˇ ceuˬ hta‸ awˬ leh meuˇ gaˬ la piˇ tuˬ yoˬ.

49Nawˬ huiˉ maˬ awˬ viˉ awˬ nyi nyiˇ gʼaˇ-oˬ, nawˬ huiˉ maˬ lehˬ cha‸ chiˆ ve kanˉ hta‸ te leh, shaˉ ho‸ teˇ hpaˍ hta‸ oˉ kʼoˍ pui ve pa taw, ngaˬ nawˬ huiˉ maˬ hta‸ ciˍ yanˍ laˇ tuˬ yoˬ. Oˇ htaˇ, ngaˬ Gʼuiˬsha hpeh‸ ve hta‸ nawˬ huiˉ maˬ shiˍ la tuˬ yoˬ, teh‸ Gʼuiˬsha kʼoˆ ve yoˬ.