2 Chronicles 1

Romani Sinte 2024 (O Debleskro Lab 2024 (Sinte-Manouche))

Jump to: Chapter 2 →

1Oun o Davideskro čavo, o Salomo, vas i zorelo ray. Oun o baro Devel, kay leskro Devel his, his leha, oun kras les baro oun bareder.

2I dives vas, kay moukas o Salomo i tsele pralstoune Israelitaryen pash peste te kharell: i pralstoune pral yek zero lourdende, i pralstoune pral yek sheel lourdende, i čačepangre morsha, i pralstoune pral kol deesh-te-douy bare khera, kay venna o Yakobeskre deesh-te-douy čavendar, oun i pralstoune pral bare familye.

3Khetne lentsa djas o Salomo ap i mangepaskri platsa pash o foro Gibeon. Kote his o Debleskro plarhteno kheer tardo. Ko kheer moukas o Mose, koles o baro Debleskro vast his, an o moulo tato them te krell.

4[Ko morhton, kay o Debleskre deesh laba dren hi, moukas o David i tsiro glan kova dran o foro Kiryat-Yearim te lell, oun anas les an o foro Yerusalem, oun moukas ko morhton kote an i plarhteno kheer te čivell, hoy moukas yob koleske te krell.]

5Glan o baro Debleskro plarhteno kheer an o foro Gibeon his ninna koy rhačepaskri dran lolo saster tardo, hoy o Bezalel kras, koleskro dad o Ouri his, oun koleskro dad o Hour his. Kote djas o Salomo, oun khetne leha i Israelitarya.

6Oun o Salomo rhačras yek zero firhen o baro Debleske ap i rhačepaskri dran lolo saster, hoy glan o Debleskro plarhteno kheer tardo his.

7An koy rati moukas pes o Devel o Salomeske te dikell, oun penas leske: “Tou nay poučeh man, hoy kameh mandar!”

8Kote penas o Salomo ap o Debleste: “Baro lačepen kral tou miro dadeske, o Davideske, oun kral, te vom me baro ray pal leste.

9Baro Devel, miro ray, mouk tiro lab čačes te vell, hoy tou penal miro dadeske, o Davideske; tou čival man dren, te vom ray pral kal menshende, kay yaake boud hi, har i stauba ap kay phoub hi.

10De man kanna gosvepen, te djinap har te djap lentsa trouyel! Har nay dap hakeneste tire boud menshendar peskro čačepen, tou te deh man kova gar?”

11Oun o Devel penas ap o Salomo: “Tou nay mangals mandar bravlepen, kouč koova, an-dikepen, i lengsto djipen oun o merepen kolendar, kay kourenn pen touha. Kova kral gar. Tout hi an tiro dji, te mangal mandar gosvepen, te djiness, har te nay rakress o čačepen vin pral mire menshende, pral kolende me tout o ray krom.

12Doleske dau tout gosvepen, te djiness, hoy te kress. Koy pashel dau tout bravlepen, kouč koova oun an-dikepen, har kek baro rayes glan toute his, oun kek baro rayes pal toute vell.”

13Oun o Salomo moukas koy mangepaskri platsa, hoy pash o foro Gibeon čiddo hi, oun kay o Debleskro plarhteno kheer tardo hi, oun djas an o foro Yerusalem. Kote djivas lo, har his lo o baro ray pral Israel.

14Oun o Salomo moukas peskre tsele vourdya oun klissepangre khetne te vell. Oun kote his les 1.400 (yek sero-te-star-sheel) vourdya oun 12.000 (deesh-te-douy zerya) klissepangre. Kolen moukas lo an kol vourdyengre forya oun pash peste an o foro Yerusalem te anell.

15Oun o baro ray kras, te his an o foro Yerusalem yaake boud roup oun sonakay har barra. Oun i cedertikre rouka his yaake boud har i divye faygetikre rouka an o telstouno them.

16Oun o Salomo ginas graya an Egiptia oun an Cilicia, leskre parepangre ginan len oun playsran len kote.

17Oun yon anan vourdya dran o them Egiptia, yekeske playsran le 600 (shob-sheel) roupene beme. Oun yek grayeske playsran le 150 (sheel-te-paash) roupene beme. Oun palle bikran le lendar doureder ap i bare rayende pral i Hetarya oun ap i bare rayende pral o them Syria.

18Oun o Salomo penas peske, te kamell lo i kheer te krell o baro Debleske, te vell yob kote an-mangedo. Ninna kamas lo peske, o baro rayeske, i kheer te krell.

Jump to: Chapter 2 →