2 Chronicles 24

Romani Sinte 2024 (O Debleskro Lab 2024 (Sinte-Manouche))

← Chapter 23 Jump to: Chapter 25 →

1O Yoash his efta bersh, har vas lo baro ray. Oun yob his star-deesh bersha baro ray an o foro Yerusalem. Leskri day kharas Sibya, oun vas dran o foro Beersheba.

2Oun o Yoash kras, hoy glan o baro Debleskre yaka mishto hi yaake rah, har o rashay Yoyada djivas.

3Oun o Yoyada rodas leske douy djouvyen vin, te romedinerell lo len. Oun o Yoashes his čave oun ča lentsa.

4Pal i tsiro las peske o Yoash glan, te krell lo kova neves, hoy an o baro Debleskro kheer paash djas oun djoungelo vas.

5Oun yob moukas i rashayen oun i Levitaryen khetne te vell, oun penas ap lende: “Djan an i tsele forya an o them Youda, oun anenn love dran o tselo them Israel, te nay krah mer hako bersh kova pale neves, hoy ap o Debleskro kheer paash djas. Krenn kova sik!” I Levitarya lan penge boud tsiro oun kran kova gar.

6Kote moukas o baro ray o pralstouno rashayes, o Yoyada, te kharell, oun penas ap leste: “Hoske dal tou gar yak, te lenn i Levitarya kol menshendar an o them Youda oun an o foro Yerusalem kol love o Debleskro khereske dren, yaake har penas glan i rah tsiro o Mose, koles o baro Debleskro vast his, te anenn i Israelitarya love o baro Debleskro plarhteno kheer.

7I Atalya, koy djoungeli, oun lakre čave moukan o Debleskro kheer tele te vell. Oun halauter, hoy i menshe o baro Debleske leskro khereske dan, anan yon pash o moulo debleste Baal.”

8Oun o baro ray penas, te vell i morhton kerdo. Oun kova vas vin glan o voudar glan o baro Debleskro kheer čiddo.

9Oun yon moukan vin gole te dell an o them Youda oun an o foro Yerusalem, te anell hakeno kol love o baro Debleske, yaake har i Israelitarya kova kran an o moulo tato them, har penas lenge kova o Mose, koles o baro Debleskro vast his.

10Oun kava lab his shoukar i tsele menshenge oun lengre pralstunenge. Oun barhteles anan le love oun vitsran len an o morhton, bis te lo pherdo his.

11Hako dives anan i Levitarya ko morhton pash kol pralstunende o baro rayestar. Yon te dikan, kay boud love dren his, palle vas ko morsh, kay činas i lila o baro rayeske. Oun leha khetne vas o bičepaskro o baro rashayestar. Oun yon čoran kol love vin. Oun palle vas o morhton pale glan o baro Debleskro kheer anlo. Yaake anan le boud love khetne.

12Oun o baro ray oun o Yoyada dan kol love i pralstunende pral i boudepangre, kay boudran an o baro Debleskro kheer. Oun kolla lan penge boudepangre, kay činenn i barra, oun boudrenn o kashteha oun o sasteha oun o lolo sasteha, te vell kova neves kerdo, hoy paash his ap o baro Debleskro kheer.

13Oun kol pralstoune boudepangre dan yak koy pre, te nashell koy boudi mishto. Oun yaake kran le o Debleskro kheer pale yaake shoukar oun zorelo, har lo an o phouro tsiro his.

14Oun har yon halauter kran, hoy hounte vas kerdo, anan yon kol love, hoy pral ačan, o baro rayeske oun o rashayeste Yoyada. Kal loventsa kran le čare oun vavar roupene oun sonakangre koola i boudjake an o baro Debleskro kheer, te venn firhe rhačedo o Debleske. Oun yaake rah har o Yoyada djivas, anan le firhen o Debleske, hoy van leske tseles rhačedo.

15Oun o Yoyada his phouro, les his i lengsto djipen. 130 (yek-sheel-triyanda) bersha his lo, har lo meras.

16Oun doleske, kay lo boud lačo koova kras i Israelenge, o Debleske oun o Debleskro kheer, paskran le les an o Davideskro foro pash i bare rayende.

17Oun har o Yoyada moulo his, van i pralstoune dran o them Youda oun vitsran pen glan o baro rayeste ap i phoub. Koy shounas yob ap kova, hoy yon leske penan, te krell lo.

18Yaake vas, te djan i menshe an leskro them bouder gar an o kheer o baro Deblestar, kay o Devel lengre phourendar his. Yon mangan i figuren an, hoy i debletsa Ashera sikrenn oun vavar moule deblen. Yaake anan le doosh ap pende glan o baro Debleste. Oun leskri rholi vas pral o them Youda oun pral o foro Yerusalem.

19Oun o baro Devel bičras peskre rakepangren pash lende, te venn le pale pale pash o baro Debleste. Ninna te dan kolla len trad, shounan i menshe gar ap lende.

20Oun o Debleskro dourho vas pral o Zakarie, koleskro dad o rashay Yoyada his. Yob djas glan i menshende oun penas ap lende: “Kava penell o Devel: Hoske rikrenn t'men gar ap kova, hoy penom? Doleske djal kova gar mishto, hoy krenna. T'mer moukan o baro Debles. Doleske moukell yob t'men ninna.”

21Koy rakran le pen mank pende tele, te marenn le les, oun vitsran les i barrentsa moulo ap i glanstouni platsa glan o baro Debleskro kheer. Yaake penas les lenge o baro ray, o Yoash.

22Oun o Yoash bistras har boud lačepen o Yoyada ap leste kras, koleskro čavo o Zakarie his, koles yob moukas te marell. Har o Zakarie meras, penas lo: “O baro Devel dikell kova, oun yob dell pale pale, hoy le ap mande kran.”

23Oun har kava bersh trouyel djas, van i lourde dran o them Syria an o them Youda oun an o foro Yerusalem, oun maran o tsele pralstoune morshen an o them. Oun halauter, hoy yon čoran, bičran yon pash o baro rayeste an o foro Damaskus.

24Ninna te his gar boud lourde, kay van dran o them Syria, das o baro Devel boud boud lourden dran o them Youda an lengro vast. Kova kras lo doleske, kay moukan i menshe an o them Youda les, o baro Debles, ko Debles lengre phourendar. Oun yaake anan yon i phagi pral o Yoash.

25Har i Syrarya penge djan, moukan le o Yoashes bares doukedo pal pende. Kol pralstoune an leskro kheer kran vin, te marenn le les, te denn le les pale, hoy yob ap o čaveste o rashayestar Yoyada kras. Oun yon maran les an peskro čiben. Oun yob meras oun vas paskedo. Ninna te vas lo paskedo an o Davideskro foro, vas lo gar paskedo pash i vavar bare rayende.

26Oun kolla, kay kran pen čorrhanes khetne, te marenn le les his: o Yoashar, koleskri day i Shimat hi, koya his dran o them Ammon, oun o Yosabad, koleskri day i Shimrit hi, koya vas dran o them Moab.

27I laba leskre morsh čavendar, oun kitse love yob dren las i menshendar, oun havi boudi yob ap o baro Debleskro kheer kras, kova hi halauter pre-činlo an o liil i bare rayendar. Oun leskro čavo, o Amazya, vas o baro ray pal leste.

← Chapter 23 Jump to: Chapter 25 →