2 Chronicles 32

Romani Sinte 2024 (O Debleskro Lab 2024 (Sinte-Manouche))

← Chapter 31 Jump to: Chapter 33 →

1Har o Hiskiya kova lauter kras, oun yaake sikras, te rikrell lo pes peskro tselo djiyeha ap o Debleste, koy vas o Sanherib, ko baro ray pral o them Assour, oun peras peskre lourdentsa an o them Youda dren. Oun yon čivan pen troul i zorele forya, te lenn le len penge dren.

2Oun har o Hiskiya dikas, kay o Sanherib peskre lourdentsa vas, te kourell lo pes o foreha Yerusalem,

3rakras lo kol pralstunentsa an peskro them oun kol zorele kourepangren, oun poučas lendar, te vals gar mishto, te čakrenn le kol tsele tikne panya, hoy vin glan o foro hi; oun yon dikan kova ninna yaake.

4Oun yaake van boud menshe khetne oun čakran kol tsele tikne panya oun ninna ko lengsto pani, hoy nashas tel i phoub. Yon penan penge: “Te venn kol bare raya dran o them Assour, nay hatsenn le kek pani kate pash mende.”

5Oun o Hiskiya rikras pes mishto oun moukas kol massurya troul o foro, kote kay le tele phagedo his, neves te krell. Oun kol turme kras lo bareder, oun moukas vin i douyti massouri pre te čivell. Ninna moukas lo o Millo zorleder te krell an o Davideskro foro, oun moukas boud vitsepaskre čourya oun shilte te krell.

6Oun yob čivas pralstoune morshen pral i tsele kourepangre, oun das len khetne gole pash peste ap i platsa glan o foreskro voudar, oun rakras lenge an o dji oun penas:

7“Avenn zorelo, oun ma trashenn! Ma darenn či! Ma trashenn o baro rayestar dran o them Assour oun leskre tsele lourdendar, kay pash leste hi! Mentsa hi i bareder har leha hi.

8O baro ray dran Assour rikrell pes ap i menshengri zoor. Pash mende hi o baro Devel, kay maro Devel hi. Yob vell menge ap i rig oun kourell pes menge.” Oun i menshe rikran pen ap kol laba, hoy lengro baro ray, o Hiskiya, lenge penas.

9Pal i tsiro, har his ko baro ray pral o them Assour, o Sanherib, peskre lourdentsa pash o foro Lakish tardo, bičras lo peskre pralstoune morshen an o foro Yerusalem pash o Hiskiya, ko baro rayeste pral o them Youda, oun moukas leske oun kol tsele menshenge dran Youda, kay an Yerusalem his, te penell:

10Kava penell o Sanherib, ko baro ray pral o them Assour: “T'mer, kay han an Yerusalem, mire lourde hi troul t'maro foro tardo! Koon, patsenn t'mer, nay vell t'menge ap i rig?

11O Hiskiya penell t'menge rhorhene laba, te penell lo t'menge: O baro Devel hi maro Devel, yob lell men vin dran o vast o baro rayestar pral o them Assour. Čačepah, yob moukell t'men i bokatar oun i troushatar te merell.

12O Hiskiya hi kova, kay moukas kol mangepaskre platse oun rhačepangre krik te lell, kay leskro Debleske firhe rhačedo van. Oun ap t'mende an o them Youda oun an o foro Yerusalem penas lo: Kokres glan yek rhačepaskri djan ap i čanga, oun rhačrenn firhen o Debleske!

13Djinenn t'mer gar, hoy me oun mire phoure kram i menshentsa an i vavar themma? Nay lan lengre debla pengro them vin dran miro vast?

14Kek kol tsele deblendar an kol themma, hoy dan mire phoure khetne, nay las peskre menshen dran miro vast. Har nay penenn t'mer, kay t'maro Devel t'men dran miro vast nay lella?

15Ma moukenn t'men o Hiskiyestar te rhorhell oun dinelo koova dren te rakrell! Patsenn leske kek lab! Kek devel dran kol tsele vavar themma nay las peskro them vin dran mire phourengre vasta oun dran miro vast. Palle nay lell vitar gar t'maro Devel t'men dran miro vast.”

16Oun kol bičepangre penan boudeder čilače laba pral o baro Debleste, kay o čačo Devel hi, oun pral o Hiskiya, kay leskro Debleske koy his.

17Ninna činas o Sanherib i liil, kay lo o baro Debles, ko Devel pral Israel, praasas, oun penas: Yaake har i debla an i vavar themma pengre menshen gar dran miro vast nay lan, yaake nay lell o Devel foun o Hiskiya peskre menshen vitar gar dran miro vast.

18Oun i bičepangre dan i bari gole an o rakepen har lo an o them Youda rakedo vell, ap i menshende, kay an o foro Yerusalem djivan, oun ap o foreskri massouri tardo his, te krenn le len traashnes oun darenes. Oun yaake kaman le o foro dren te lell.

19Oun yon rakran djoungele laba pral o Debleste, kay an o foro Yerusalem djivell, har te vals lo i devel har kolla, kay i menshengre vastentsa kerdo hi, oun kolen i menshe an vavar themma an-mangenn.

20Oun o baro ray, o Hiskiya, oun o Debleskro rakepaskro, o Yesaya, koleskro dad o Amoz his, dan gole ap o baro Debleste an o bolepen, te vell lo lenge ap i rig.

21Kote bičras o baro Devel i bolepaskres. Kova maras i tsele lourden, ninna lengre pralstunen oun bare lourden ap i lourdengri platsa o baro rayestar dran o them Assour. Oun i ladjatar djas lo pale an peskro them. Har yob an o kheer leskro deblestar vas, maran les leskre čave o rhareha.

22Oun yaake las o baro Devel o Hiskiya oun kolen kay an o foro Yerusalem djivan dran o vast o baro rayestar dran Assour – leskro lab his Sanherib – oun dran o vast i tsele vavarendar. Oun i menshe nay djivan an o lačepen kolentsa, kay an i themma troul lende djivenn.

23Boud menshe anan čomone o baro Debleske an o foro Yerusalem oun shoukar oun kouč koova o baro rayeske an Youda, o Hiskiya. Kava tsirestar his lo bares an-diklo kol menshendar an i tsele vavar themma.

24An kol divessa vas i merepaskro nasslepen ap o Hiskiya; oun yob mangas o baro Debles. Oun kova rakras leha oun das les i sikepen, te vell lo sasto.

25Har o Hiskiya sasto vas, vas lo pre-phourdo oun das o baro Debleste ko lačepen gar pale, hoy kova ap leste kras. Doleske vas o baro Devel rhoyedo pral leste oun pral o them Youda oun pral o foro Yerusalem.

26Koy khaytas o Hiskiyes, kay phourdas lo pes pre. Yob oun i menshe an Yerusalem dikan pengri doosh dren. Doleske vas koy rholi o baro Deblestar gar pral lende yaake rah, har o Hiskiya djivas.

27O Hiskiya his lačes an-diklo, oun les vas boud oun boudeder bravlepen. Oun yob kras peske khera, kay vas pre-hadedo leskro roup, sonakay, kouč barra, soungepaskro djet, shilte, oun vavar kouč koova.

28Oun yob kras djobengre khera, ninna khera i molyake oun o djeteske, oun stanye hake firhenge oun platse, kay i bakre dren pandlo his.

29Oun yob kras peske forya. Oun les his boud bakre oun groumya. Ko tselo bravlepen das les halauter o Baro Devel.

30O Hiskiya his kova, kay moukas o pralstouno kotar o panyestar Gihon te čakrell, oun o pani doureder tel i phoub te nashell an o Davideskro foro, ap koy rig, kay o kham tele djal. Halauter, hoy o Hiskiya kras, djas leske mishto.

31An ko tsiro, kay bičran i pralstoune dran o them Babilonia bičepangren pash o Hiskiya, te poučenn le lestar, hoy an o them djas, har o Devel savo baro koova kras, hoy kek vavar nay krella, kote moukas les o Devel kokres, te dikell lo, hoy an leskro dji hi, oun hoy krals lo.

32Ko tselo vavar koova, hoy pral o Hiskiya penepaske hi, oun har rikras lo pes ap o Debleste, kova hi činlo an o liil, hoy o Debleskro rakepaskro, o Yesaya, činas, koleskro dad o Amoz hi, oun an o liil i bare rayendar pral Youda oun Israel.

33Oun o Hiskiya meras, oun yon paskran les ap yek kol feteder platse an o moulengro kheer, kay i bare raya dran o Davideskro kheer paskedo his. Oun i tsele menshe an o them Youda oun an o foro Yerusalem, sharan les pash peskro paskepen. Oun leskro čavo, o Manasse, vas o baro ray pal leste.

← Chapter 31 Jump to: Chapter 33 →