2 Chronicles 11

Romani Sinte 2024 (O Debleskro Lab 2024 (Sinte-Manouche))

← Chapter 10 Jump to: Chapter 12 →

1Oun o Roboam vas an o foro Yerusalem pale oun moukas kol morshen i menshendar Youda oun Benyamin khetne te vell, kay nay kourenn pen. Kolla his 180.000 (sheel-te-orhta-deesh zerya) morsha. Kolentsa kamas lo an o kourepen i Israelentsa te djal, te anenn yon lengro them pale pale pash o Roboam.

2Kote penas o baro Devel ap o Shemaya, ko Debleskro morsheste:

3Pen ap o Roboam, o Salomeskro čavo, o rayeste pral Youda, oun ap i tsele morshende dran Israel, kay djivenn an i themma Youda oun Benyamin:

4Yaake penell o baro Devel: “Ma djan pre, te kourenn t'men t'mare phralentsa! Djan pale khere, hakeno an peskro kheer. Kava tselo koova vas mandar.” Kote shounan yon ap o lab o baro Deblestar oun djan pale pale, oun djan gar an o kourepen o Yerobeameha.

5O Roboam djivas an o foro Yerusalem, oun leskre boudepangre kran massurya troul i forya an o them Youda, te krenn le len zorleder.

6Kal forya his: Betlehem, Etam, Tekoa,

7Bet-Sour Soko, Adullam,

8Gat, Maresha, Sif,

9Adorayim, Lakish, Aseka,

10Zora, Ayalon oun Hebron. Kolla his i zorele forya an i themma Youda oun Benyamin.

11Troul kal forya moukas lo zorele massurya te krell, oun čivas pralstoune lourden pral lende, oun moukas rhapen, djet oun mool, ninna shilte oun vitsepaskre čourya an kal tsele forya te anell, te venn le zorele forya. Yaake vas lo i zorelo ray pral i themma Youda oun Benyamin.

13Oun i rashaya oun i Levitarya, kay an o tselo them Israel his, van ap leskri rig oun rikran pen ap leste.

14I Levitarya moukan pengre forya oun halauter, hoy len his, oun van an o them Youda oun an o foro Yerusalem. An o them Israel moukas len o Yerobeam oun leskre morsh čave bouder gar rashaya te ačell, kay boudrenn o baro Debleske.

15O Yerobeam rodas peske rashayen vin, kay boudran ap i moulne platse i bengenge oun kol moule deblenge, hoy vin dikan har terne groumya, hoy yob moukas te krell.

16Oun kol menshe, kay rodan pengro tselo djiyeha o baro Debles, kay o Israeleskro Devel hi, yon kran yaake har i Levitarya kran, oun van dran o tselo them Israel oun djan an o foro Yerusalem, te rhačrenn le firhen o baro Debleske, kay o Devel lengre phourendar hi.

17Yaake kran le, te vas o them Youda zorelo. Oun triin bershenge dan le pengri zoor o baro rayeste pral Youda, o Roboam, koleskro dad o Salomo his. An kal triin bersha djivan le har ninna o David oun o Salomo djivan.

18Oun o Roboam romedineras i Mahalat, kolakro dad o Yerimot hi, koleskro dad o David his. Lakri day his i Abihayil, kolakro dad o Eliab hi, koleskro dad o Isay his.

19I Mahalat las triin čave: o Yehoush, o Shemarya oun o Saham.

20Pal late romedineras o Roboam i Maaka, kolakro dad o Abishalom his; koya anas o Abiya, o Attay, o Sisa oun o Shelomit ap kay phoub.

21O Roboam kamas i Maaka, kolakro dad o Abishalom his, boudeder har leskre tsele romyen oun vavar djouvyen. Les his 18 (deesh-te-orhta) romyen oun 60 (shob-deesh) vavar djouvyen. Oun yob vas o dad 28 (biish-te-orhta) morsh čavendar oun 60 (shob-deesh) čendar.

22Oun o Roboam čivas o Abiya, koleskri day i Maaka hi, pral leskre phralende, te vell yob o glanstouno lendar. Yob kamas, te vell o Abiya o baro ray pal leste.

23Oun yob kras i gosevo koova, oun čivas leskre tsele vavar morsh čaven an i vavar forya an i themma Youda oun Benyamin, an kol forya, hoy his zoreles kerde, oun das len boud rhapen oun boud romyen.

← Chapter 10 Jump to: Chapter 12 →