2 Chronicles 29

Romani Sinte 2024 (O Debleskro Lab 2024 (Sinte-Manouche))

← Chapter 28 Jump to: Chapter 30 →

1O Hiskiya his 25 (biish-te-panč) bersha, har lo baro ray vas; oun 29 (biish-te-enya) bersha his lo baro ray, oun djivas an kava tsiro an o foro Yerusalem. Leskri day kharas Abi, lakro dad his o Zakarie.

2Oun yob kras, hoy glan o baro Debleskre yaka mishto hi, har leskro phouro dad, o David, ninna kras.

3An o ersto bersh, har lo baro ray his, an o ersto čon kras yob i voudya an o baro Debleskro kheer pale pre, oun moukas len kote, kay his le paash, neves te krell.

4Oun yob moukas i rashayen oun i Levitaryen khetne te vell ap koy platsa pash o Debleskro kheer, hoy ap i rig his, kay o kham pre djala.

5Oun penas ap lende: “Morshale dran o kheer Levi, shounenn mire laba! Krenn t'men kanna djoudjo o baro Debleske, oun krenn leskro kheer pale djoudjo leske, kay o Devel t'mare phourendar hi! Oun vitsrenn ko tselo koova vin, hoy kras kava kheer pale-čiddo.

6Mare phoure moukan o baro Debleskro drom, oun kran, hoy glan i yaka maro Deblestar gar mishto hi, oun djivan bouder gar leha, oun sikran leske oun leskro khereske o doumo.

7Oun yon pandan i voudya glan i glanstouni halla, oun moukan i momlia vin te djal, oun rhačran kek soungepaskro koova, vitar kek firhen, o Debleske pral Israel.

8Doleske vas i rholi o baro Deblestar pral o them Youda oun o foro Yerusalem. Oun yob moukas mentsa savo koova te krell, te ačell kol vavar menshenge, kay kova dikenn, o rakepen krik i trashatar, oun yon rissrenn pengre yaka krik. Oun mer vam lenge sapaske, har t'mer t'mare yakentsa dikenna.

9Mare dada van o rhareha maredo, oun i djouvya oun čave oun ča van pandles an i vavar themma anlo.

10Kanna hi man an o shero, te pandap man ap o baro Debleste, ko Devel pral o Israel, te djal peske leskri rholi mendar, hoy yaake zorelo ap mende čiddo hi.

11T'mer, kay han har mire čave, ma nashrenn kek tsiro! Djan ap t'mari boudi! T'mer han kolla, kay o baro Devel vi-rodas, te venn glan leste tardo oun boudrenn leske oun anenn leske firhen oun soungepaskro koova.”

12Kote stan kal Levitarya glan: dran o kheer Kohat: o Mahat, koleskro dad o Amasay his, oun o Yoel, koleskro dad o Asarya his; dran o kheer Merari: o Kish, koleskro dad o Abdi his, oun o Asarya, koleskro dad o Yehallelel his; oun dran o kheer Gershon: o Yoa, koleskro dad o Simma his, oun o Eden, koleskro dad o Yoa his;

13dran o kheer Elizafan: o Shimri oun o Yehiel; dran o kheer Asaf: o Zakarie oun o Mattanya;

14dran o kheer Heman: o Yehiel oun o Shimi; dran o kheer Yedoutoun: o Shemaya oun o Usiel.

15Oun yon dan pengre phralen khetne gole, oun kran pen djoudjo o Debleske, oun djan an o baro Debleskro kheer, te krenn le les djoudjo, yaake har o baro ray les lenge penas, oun o baro Devel les kamas.

16Oun i rashaya djan an o baro Debleskro kheer dren, te krenn le les djoudjo, oun anan ko tselo koova, hoy pale-čiddo his, vin ap i glanstouni platsa. Oun kote lan i Levitarya kova oun anan les vin pash o pani Kidron.

17I rashaya oun i Levitarya kran pen ap i boudi ap o ersto dives an o ersto čon, te krenn le o Debleskro kheer djoudjo. Oun ap o orhtato dives an o ersto čon van yon an i glanstouni halla, oun boudran vavar orhta divessa. Ap o deesh-te-shobto dives his koy tseli boudi kerdo.

18Oun yon djan pash o baro rayeste, o Hiskiya, oun penan: “Mer kram o tselo kheer o baro Deblestar djoudjo, ninna i sasterni rhačepaskri oun i rhapaskri o Debleskre marenge, oun i tsele koola har pirya, roya, čare oun khore.

19Ninna kol tsele vavar čare, pirya oun vavar koova, hoy o Ahas vin vitsras, har yob o baro ray his, oun o baro Debleskro dromestar tele djas, kova halauter anam mer pale, oun kram les djoudjo, oun čivam les glan i rhačepaskri.”

20Oun o baro ray Hiskiya stas taysarlake sik pre oun moukas i pralstunen dran o foro khetne te vell, oun djas lentsa pral pash o baro Debleskro kheer.

21Oun yon anan efta terne gourma, oun efta morsh bakre oun efta terne bakre oun efta morsh bouzya, te marenn oun rhačrenn le len o baro Debleske, te nay vell i doosh krik lino o rayeskro kherestar, oun o Debleskro kherestar oun i tsele menshendar an o them Youda. Oun o Hiskiya penas ap i rashayende dran o kheer Aron, te rhačrenn le i firhen ap i rhačepaskri o baro Debleske.

22Oun yon maran kol groumya, oun i rashaya lan o rat oun vitsran les ap koy rhačepaskri. Palle maran le i morsh bakre, oun palle i terne bakre, oun hako kopo vitsran le lengro rat ap i rhačepaskri.

23Oun palle anan le i bouzya glan o baro rayeste oun glan kol Israelitarya, kay pashel his. Kolla čivan pengre vasta ap lengre sherya.

24Palle maran i rashaya kol bouzya, oun vitsran lengro rat ap i rhačepaskri, te vell i doosh i Israelendar krik lino. Kova kran le yaake, har lenge o baro ray penas: te marenn le firhen, kay tseles rhačedo venn oun vavar, te vell i doosh i tsele Israelendar krik lino.

25Oun yob penas, te čivenn pen i Levitarya pre an o baro Debleskro kheer oun lenn pengre bashepangre an o vast: kol cimbale, harfe oun vavar doryengre bashepangre. Yaake penas les o David, har leske penlo vas, kay o baro Devel kova yaake kamell. Kova penan leske o dikepaskro, o Gad, oun o Debleskro rakepaskro, o Natan.

26Oun i Levitarya his koy tardo. Oun kol bashepangre, hoy o David kras, his an lengre vasta. Oun i rashaya his koy tardo, oun len his phourdepangre an o vast.

27Oun o Hiskiya penas, te anenn le kanna i marede firhe, kay o Debleske tseles rhačedo venna, oun čivenn len ap i rhačepaskri. Oun an ko tsiro, kay o mass rhačedo vas, givan i Levitarya o baro Debleske, oun i phourdepangre phourdan an pengre bashepangre. Oun ninna vas bashedo ap i vavar bashepangre, hoy kras o David, ko baro ray pral Israel.

28Oun i tsele menshe mangan o baro Debles an, i gipangre givan oun i bashepangre bashran. Oun kova djas yaake rah, bis ko tselo mass rhačedo his.

29Har halauter kerdo vas, djan o baro ray, oun halauter, kay pash leste his, ap i čanga, oun mangan o baro Debles an.

30Oun o Hiskiya oun i pralstoune penan ap i Levitarya, te sharenn le o baro Debles kol gilyentsa, hoy kras o David oun o dikepaskro, o Asaf. Oun yon givan barhteles, oun vitsran pen ap i phoub oun mangan o baro Debles an.

31Palle penas o Hiskiya ap i menshende: “Kanna han djoudjo o baro Debleske. Avenn oun anenn t'mare firhen, kolentsa parkrenn t'men pash o baro Debleste!” Oun yon anan firhen, te parkrenn le pen pash leste. Oun hakeno, kay kamas boudeder te dell, anas save firhen, kay van tseles rhačedo o baro Debleske.

32Khetne his kolla 70 (efta-deesh) groumya, 100 (sheel) morsh bakre oun 200 (douy-sheel) terne bakre. Yaake boud firhe van tseles rhačedo o baro Debleske.

33Koy pashel van 600 groumya oun 3.000 bakre anlo, te venn le maredo o Debleske. Lengro mass rhan i menshe.

34Kote his gar doha rashaya, te tserdenn le i hauta kol tsele marede firhendar tele. Doleske van lenge lengre phrala, kol Levitarya, pash o vast, bis te i tseli boudi kerdo his, oun boudeder rashaya pen djoudjo kran o baro Debleske. [I Levitarya his sikeder koy pashel, te krenn le pen djoudjo o Debleske har i rashaya.]

35Koy his boud boudi kol tsele firhentsa, kay van tseles rhačedo. Ninna hounte vas o thulepen rhačedo kol vavar firhendar, kolengro mass i menshe rhan. Oun mool hounte vas vi-čoredo pash ko mass kol firhendar, kay van tseles rhačedo. Oun yaake vas koy boudi an o baro Debleskro kheer pale neves kerdo.

36O Hiskiya oun i tsele Israelitarya his barhtelo pral kova, kay moukas o baro Devel peskre menshen kava lauter te krell. Kek patsas, kay kova yaake sik vella.

← Chapter 28 Jump to: Chapter 30 →