2 Chronicles 35

Romani Sinte 2024 (O Debleskro Lab 2024 (Sinte-Manouche))

← Chapter 34 Jump to: Chapter 36 →

1Oun o Yosia kras an o foro Yerusalem ko festo, hoy kharell Passa, te sharenn le o baro Debles. Ap o 14. (deesh-te-starto) dives an o ersto čon maran le i terne bakre, te rhan le len ap ko festo.

2Oun yob das i rashayende pengri boudi, oun rakras kamles lentsa, te krenn le pengri boudi mishto an o baro Debleskro kheer.

3Oun yob penas ap i Levitarya, kay o baro Debleske koy his, oun i tsele menshende an Israel leskro drom sikran: “Anenn o Debleskro morhton, kay o Debleskre deesh laba dren hi, an o Debleskro kheer, hoy moukas o Davideskro čavo, o Salomo, ko ray pral Israel, te krell. T'mer hounte hidjrenn les bouder gar ap t'mare phika. Kanna boudrenn t'mer kate an o kheer t'maro baro Debleske oun leskre menshenge Israel.

4Avenn pash i boudi yaake, har t'mer pal t'mare familye khetne čiddo han, te krenn kova, hoy o baro ray, o David, oun leskro čavo, o Salomo, t'menge glan činan.

5Čivenn t'men yaake khetne tardo an o Debleskro kheer, te djinenn kol familye dran Youda oun Israel pash koneste yon hounte djan: yek gruppa t'mendar boudrell fer yek gruppa lendar, yaake har yon khetne čiddo hi pal lengre familye.

6Te venn yon pengre bakrentsa, marenn t'mer kol terne bakre o rhapaske Passa! Krenn t'men djoudjo o Debleske! Oun krenn o masseha yaake, har glan činlo hi, te nay krenn t'mare phrala halauter yaake, har o baro Devel o Moseske penas.”

7Oun o Yosia das i menshende, kay kote khetne his, peskre bakrendar oun bouzyendar 30.000 (triyanda-zerya) te venn le maredo o rhapaske Passa, oun koy pashel 3.000 (triin-zerya) groumya.

8Oun i pralstoune an leskro them dan pendar kokres firhen i menshenge oun i rashayenge oun i Levitarenge. I pralstoune pral o Debleskro kheer, kolla his o Hilkiya, o Zakarie oun o Yehiel, yon dan i rashayende ko rhapaske Passa 2.600 (douy zerya-shob-sheel) tikne bakre oun tikne bouzya, koy pashel 300 (triin-sheel) groumya.

9O Konanya oun leskre phrala, o Shemaya oun o Netanel, khetne kol pralstunentsa pral i Levitarya, kolla his o Hashabya, o Yehiel oun o Yosabad, yon dan i Levitaryen 5.000 (panč-zerya) tikne bakre oun tikne bouzya ko rhapaske Passa, oun koy pashel 500 (panč-sheel) groumya.

10Oun yaake vas halauter kerdo o rhapaske Passa. Oun i rashaya his ap pengre platse tardo, oun i Levitarya his yaake khetne tardo, har le khetne boudrenn, oun har les o baro ray penas.

11Oun yon maran i terne bakre, dan o rat i rashayende, oun kolla vitsran les troul i rhačepaskri. Oun i Levitarya tserdan i hauta tele.

12Oun i Levitarya čivan ko mass kol firhendar, hoy van tseles rhačedo, ap i rig, te denn le les hake bare familyende, te nay anenn yon les glan o baro Debleste, yaake har činlo hi an o Moseskro liil. Kova kran le ninna i groumyentsa.

13Oun yaake har kerdo vas, pekan le kol bakre o rhapaske Passa ap i yag. Oun ko vavar mass, hoy o Debleske dino vas, keran le an pirya, pfanne oun čare, oun anan les sik pash i tsele menshende.

14Oun koy pal kran i Levitarya o rhapen penge oun i rashayenge; i rashayen dran o kheer Aron his yaake boud boudi kol tsele firhentsa, hoy van tseles rhačedo oun ko thulepah, hoy vas rhačedo, te kran i Levitarya penge oun i rashayenge ko rhapen.

15Oun i gipangre dran o kheer Asaf ačan ap penge platse tardo. Yaake penas kova o David oun o Asaf oun o Heman oun o Yedoutoun, kova his o baro rayeskro dikepaskro. Ninna kol morsha, kay dan garda ap i tsele voudya, moukan gar pengre platse. Oun i Levitarya kran ninna lenge o rhapen.

16Oun yaake vas ap ko dives halauter kerdo, te sharenn le o baro Debles. Yon rhan o rhapen Passa oun anan o baro Debleske vavar firhen, hoy van tseles rhačedo ap leskri rhačepaskri, yaake har kova o baro ray Yosia kamas oun penas.

17Oun i Israelitarya, kay an ko tsiro khetne van, kran o festo Passa, oun rikran pal kova kol efta bare divessa, kay rhan le maro, kay kek shoutlo yarro dren hi.

18Oun pal ko tsiro, kay o Debleskro rakepaskro, o Samuel, djivas, rikras kek baro ray an Israel ko festo Passa yaake, har o Yosia les kanna rikras khetne kol rashayentsa, Levitarya oun i tsele menshentsa dran o them Youda oun kolentsa, kay dran Israel van, oun kolentsa, kay an Yerusalem djivan.

19Kava festo Passa vas rikedo, har o Yosia an o 18. (deesh-te-orhtato) bersh o baro ray his.

20Pal ko tsiro, kay o Yosia o baro Debleskro kheer djoudjes kras, djas o Neko, ko baro ray pral o them Egiptia, vin peskre lourdentsa, te kourell lo pes o foreha Karkemish, hoy pash o pani Eufrat čiddo hi. Oun o Yosia djas vin leske an o drom.

21Oun o Neko bičras morshen pash leste oun moukas leske te penell: “Tou ray pral Youda, miro kourepen kate hi gar tiro koova! Gar touha kamah men te kourell. Me kamau man ko rayeha pral o them Babilonia te kourell, koleha me an o kourepen tardo hom. Oun o Devel penas, te krap sik. Yob hi mantsa, doleske čip tout leske gar an o drom, te marell lo tout gar!”

22Oun o Yosia moukas gar tele leste oun kamas pes leha te kourell, oun shounas gar ap kova, hoy o Neko penas, ninna te vas kova o Deblestar. Oun o Yosia vas, te kourell lo pes leha an o telstouno them, hoy kharell Megiddo.

23Oun i kourepangre pengre bogentsa dan ap o rayeste Yosia karye. Oun o baro ray Yosia penas ap kol morshende, kay troul leste his: Anenn man kate krik, me vom phares an-karedino!

24Oun leskre morsha hadan les leskro vourdin tele, čivan les ap i vavar vourdin, oun anan les an o foro Yerusalem. Oun yob meras oun vas paskedo an o moulengro kheer, kay peskre phoure paskedo his. Oun i menshe an o tselo them Youda oun an o foro Yerusalem rovan pral o Yosia.

25Oun o Yeremia givas i ropaskri gili pral o Yosia. Oun i tsele gipangre, morsha har djouvya, givan ropangre gilya pral o Yosia bis ap kava dives. Yaake vell kova gomme kava dives kerdo an Israel. Kal tsele gilya hi tele činlo an o liil, hoy kharell: Ropangre gilya.

26Ko tselo vavar koova, hoy pral o Yosia penepaske hi, oun har lo lauter kras, te rikrell lo pes ap o baro Debleskre laba,

27oun halauter pral leskro djipen, kova hi činlo an o liil i bare rayendar pral Israel oun Youda.

← Chapter 34 Jump to: Chapter 36 →