2 Chronicles 14

Romani Sinte 2024 (O Debleskro Lab 2024 (Sinte-Manouche))

← Chapter 13 Jump to: Chapter 15 →

1Oun o Asa kras, hoy mishto his oun glan i yaka leskro baro Deblestar lačo his.

2Yob moukas i rhačepangre paash te krell, hoy ap i moulne platse tardo his, oun kay firhen i moule deblenge rhačedo van. Oun kol bare barra, hoy le lenge pre-čivan, moukas lo an kotya te phagell, oun i figure, hoy i Ashera sikrenn, das lo tele.

3Oun yob penas i menshenge an o them Youda, te hounte rodenn le o baro Debles, ko Devel lengre phourendar, oun te djan le ap leskro drom oun djivenn pal leskre laba.

4Oun an i tsele forya an o them Youda, kras lo i moulne platse paash, kay firhen i moule deblenge rhačedo van, ninna i boba, kay lenge soungepaskro koova rhačedo vas. An leskro tsiro his kek kourepen an o them.

5Oun i menshe an o them Youda nay djivan an o lačepen kol thementsa troul lende. O baro Devel kras kova, te vas kek kourepen an kal bersha. Yaake moukas o Asa i forya zoreles te krell an o them Youda.

6Oun yob penas ap i menshende an o them Youda: “Mer krah kal forya zoreles, oun krah massurya troul lende oun turme oun bare voudya oun zorele pandepangre, yaake rah har o them maro hi. Mer rodam o baro Debles, kay maro Devel hi, oun yob kras, te nay djivas an o lačepen kal thementsa troul mende.” Oun yaake kran le pen ap i boudi. Oun lenge djas mishto, te krenn le i forya zoreles.

7Oun o Asa, les his boud lourde: dran o them Youda 300.000 (triin-sheel-zerya) morsha, kolen his bare shilte oun vitsepangre čourya; oun dran o them Benyamin 280.000 (douy-sheel-orhta-deesh-zerya) morsha, kolen his tikne shilte oun nay dan karye i bogentsa. Kolla halauter his zorele kourepangre morsha.

8Oun o Zera, ko Koushari, vas peskre lourdentsa te kourell lo pes lentsa. Les his 1.000 (yek-sero) kope 1.000 lourde, oun 300 (triin-sheel) kourepangre vourdya. Oun yob vas yaake dour har o foro Maresha čiddo hi.

9Oun o Asa peskre lourdentsa vas vin glan leste, oun yon lan i kourepangro tardepen dren an o telstouno them Zefata pash o foro Maresha.

10Oun o Asa das gole ap peskro baro Debleste oun penas: “Baro Devel, touke hi gar phares, te vess koles ap i rig, kay kek zoor an leste hi, te nay kourell lo pes koleha, kay zorleder hi har yob. Ab ap mari rig, maro baro Devel, mer rikrah men ap toute. Oun an tiro lab vam mer kate khetne, te kouras men kal boud morshentsa. Baro Devel, maro Devel hal tou. Kek mensho nay krell čomone, tou te kameh les gar.”

11Oun o baro Devel das i Kousharya glan o Asa oun i menshende dran Youda yaake, kay yon nashan penge an i daar.

12Oun o Asa oun i tsele lourde, kay pash leste his, lan len palla bis pash o foro Gerar. Oun i Kousharya van yaake dino, te nay kourenn le pen bouder gar. O baro Devel kras, te van le khetne dino leskre lourdendar dran Youda. Oun kalla lan lendar boud kouč koova pentsa.

13Oun pral kol tsele forya troul o foro Gerar vas i bari traash o baro Deblestar. Yaake nay lan i lourde dran Youda ninna kal tsele forya dren, oun čoran i tsele forya vin, oun hatsan kote boud kouč koova.

14Ninna djan le ap i plarhtene khera pre, kay kolla djivan, kay dan garda ap pengre firhe, oun lan boud bakre oun khamele pentsa. Pal kova djan le pale an o foro Yerusalem.

← Chapter 13 Jump to: Chapter 15 →