2 Chronicles 36

Romani Sinte 2024 (O Debleskro Lab 2024 (Sinte-Manouche))

← Chapter 35 Jump to:

1Oun i menshe dran o them Youda čivan o Yoakaz, koleskro dad o Yosia his, pral pende, te vell lo o baro ray pal leskro dadeste an o foro Yerusalem.

2Biish-te-triin (23) bersh his o Yoakaz phouro, har lo baro ray vas. Oun yob his triin čonna baro ray an o foro Yerusalem.

3Oun o baro ray pral o them Egiptia las les vin dran o foro Yerusalem, te ačell lo bouder gar baro ray. Oun yob čivas i siyaan ap o them: 70 (efta-deesh) centnarya roup oun 35 (triyanda-te-panč) kilogramme sonakay.

4Oun o baro ray pral o them Egiptia kras, te vell o Yosiyeskro čavo, o Elyakim, baro ray pral Youda oun Yerusalem. Oun das les i vavar lab oun kharas les Yoyakim. Leskro phrales, o Yoakaz, las o Neko peha, oun anas les an o them Egiptia.

5Har vas o Yoyakim baro ray, his lo 25 (biish-te-panč) bersh phouro. Oun yob his 11 (deesh-te-yek) bersh baro ray an o foro Yerusalem. Oun yob kras, hoy čilačo his glan i yaka o baro Deblestar, kay leskro Devel his.

6Oun o Neboukadnezar, ko baro ray pral o them Babilonia, vas, te kourell lo pes leha, oun moukas les sasterne shellentsa te pandell, te nay anell lo les an o foro Babilon.

7Ninna ko kouč kovestar dran o baro Debleskro kheer moukas o Neboukadnezar an o foro Babilon te anell, oun čivas kova kote an peskro debleskro kheer.

8Ko tselo vavar koova, hoy pral o Yoyakim penepaske hi, oun ko djoungelo koova, hoy lo kras, oun hoy leske djas, kova hi činlo an i familyakro liil i bare rayendar pral o them Israel oun Youda. Oun leskro čavo, o Yoyakin, vas baro ray pal leste.

9Deesh-te-orhta (18) bersh his o Yoyakin, har lo baro ray vas. Oun yob his baro ray triin čonna oun deesh divessa, oun djivas an ko tsiro an o foro Yerusalem. Oun yob kras, hoy djoungeles his glan o baro Debleskre yaka.

10Oun har o bersh trouyel his, moukas les o Neboukadnezar an o foro Babilon te anell, oun moukas leha boud kouč koova dran o baro Debleskro kheer te anell, oun čivas leskro kakes, o Sedekya, pral o them Youda oun o foro Yerusalem, te vell lo baro ray.

11Biish-te-yek (21) bersh his o Sedekya, har lo baro ray vas; oun deesh-te-yek (11) bersha his lo baro ray an o foro Yerusalem.

12Oun yob kras, hoy djoungeles hi glan i yaka o baro Deblestar, kay leskro Devel his, oun kras pes gar tiknes glan o Debleskro rakepaskro, o Yeremia, har kova leha rakras, oun leske penas, hoy o baro Devel leske an o mouy čivas.

13Ninna te hounte das yob pes sovel glan o Debleste, te rikrell lo pes ap o baro rayeste pral o them Babilonia, o Neboukadnezar, peras lo kolestar tele, oun shounas bouder gar ap leste. Oun yob djas pal peskro shero oun kras peskro dji har i bar, oun vas bouder gar pale pash o baro Debleste, kay o Israeleskro Devel hi.

14Ninna i tsele pralstoune an o them Youda oun i rashaya oun i menshe an o them kran pengri doosh gomme bareder pengro djipah: Yon djivan pal ko djoungelo koova, hoy i menshe an i vavar themma kran, oun kran o baro Debleskro kheer pale-čiddo, ko kheer, hoy yob vi-rodas, te djivell lo kote an o foro Yerusalem.

15Oun o baro Devel, lengro phourengro Devel, bičras boud bičepangren pash lende, te dell lo len trad. Les khaytan peskre menshen oun peskro kheer.

16Yon sanan o Debleskre bičepangren vin. Oun leskre laba his lenge či moldo, oun yon rikran o Debleskre rakepangre dineleske. Doleske vas o baro Debleskri rholi yaake phares pral peskre menshende, te nay van le gar vin lino koy dran.

17Oun o baro Devel moukas o baro rayes Neboukadnezar dran o them Babilonia pral lende te vell. Leskre lourde maran i terne morshen o rhareha, ninna an o Debleskro kheer. O baro rayes dran Babilonia khaytas kek, gar i terne morsha, vitar gar i terne ča, gar i phoure, ninna te his le nasselo. Halauteren das o baro Devel an leskro vast.

18Oun o tselo koova dran o Debleskro kheer, bare oun tikne koola, ninna ko kouč koova dran o baro Debleskro kheer oun o bravlepen o baro rayestar oun kol pralstunendar an o them, halauter moukas o Neboukadnezar an o foro Babilon te anell.

19Kol lourde dran o them Babilonia rhačran o baro Debleskro kheer oun phagan o foreskre massurya tele. Oun i tsele turme rhačran le i yagatar vin. Oun yaake vas lengro tselo kouč koova rhačedo an i yag oun bouder či moldo.

20Oun kolen, kay gar o rhareha maredo van, anas lo pandles an o them Babilonia. Oun yon hounte boudran leske oun leskre čavenge, bis ko tsiro vas, kay i Persarya i bare raya van.

21Glan i rah tsiro penas o Mose ap i Israelitarya: “Hako eftato bersh hounte boudrell kek t'mendar ap peskri harhetikri phoub, te lell i phoub pale nevi zoor!” Ap ko lab rikran pen i Israelitarya gar. Kanna ačas ko them efta-deesh bersha mouklo čiddo. Yaake vas ko lab čačo, hoy o baro Devel o Yeremiyeske an o mouy čivas: “O them ačell mouklo čiddo efta-deesh bersha, bis te kol bersha trouyel hi, kolen i Israelitarya gar dren rikran.”

22An o ersto bersh, kay o Cyrus o baro ray pral o them Persia his, kras o baro Devel, te vas ko lab čačo, hoy lo ap o Yeremia rakras, oun yob i menshenge doureder penas. O baro Devel das o baro rayeske, o Cyrus an o dji, te moukell lo an peskro tselo them vin te kharell oun i lilentsa halauterenge te penell:

23“Kava penell o Cyrus, ko ray pral o them Persia: O baro Devel an o bolepen das man i tsele themma ap kay phoub. Oun yob penas mange, te krap leske i kheer an o foro Yerusalem an o them Youda. Koon kanna mank t'mende leskre menshendar hi, koleha te vell peskro Devel! Oun yob nay djal pral an o foro Yerusalem.”

← Chapter 35 Jump to: