2 Chronicles 21

Romani Sinte 2024 (O Debleskro Lab 2024 (Sinte-Manouche))

← Chapter 20 Jump to: Chapter 22 →

1Oun o Yosafat meras oun vas paskedo pash peskre phourende an o Davideskro foro. Oun leskro čavo, o Yoram, vas baro ray pal leste.

2Les his phrala: o Asarya, o Yehiel, o Zakarie, o Asarya, o Mikael, oun o Shefatya; kolla halauter his i čave o baro rayestar Yosafat, ko rayestar pral Youda.

3Oun lengro dad das len boud koova dran roup oun sonakay oun vavar kouč koova. Koy pashel das lo len zorele forya an o them Youda. O Yoram, kay his o phoureder lendar, koles kras lo baro ray.

4Oun har o Yoram o baro ray vas pal peskro dadeste, oun les boud penepaske his, kote maras lo peskre tsele phralen o rhareha, oun ninna i pralstunendar pral Israel.

532 (triyanda-te-douy) bersha his o Yoram, har lo baro ray vas. Orhta bersha his lo baro ray, oun djivas an kava tsiro an o foro Yerusalem.

6Yek o Ahabeskre čendar his leskri romni. Oun yaake har o Ahabeskri familya djas lo ninna ap o čilačo drom, kay o Israeleskre bare raya djan, oun kras, hoy djoungeles his glan o baro Debleskre yaka.

7Ninna te djivas o Yoram sau čilačo djipen, kamas o baro Devel o Davideskri familya gar te marell, koleske hoy yob o Davideha vin kras. Yob penas leske, te vell yek kolendar, kay pal leste venna, baro ray hako tsireske.

8An ko tsiro, kay o Yoram baro ray his pral o them Youda, phagan i menshe dran Edom leha, oun čivan i vavar baro rayes pral pende dren.

9Koy djas o Yoram peskre tsele kourepangre vourdyentsa an o them Edom. Kote djan i Edomarya troul lende oun pandan len dren. An i rati djas lo khetne i pralstunentsa, kay ap i vourdya his, ap i Edomarya pre oun das len.

10Pal kova his kol Edomarya bouder gar an i vasta kol menshendar an o them Youda bis ap kava dives. An ko tsiro peran ninna kolla an o foro Libna o themestar Youda tele. Kova vas doleske, kay yob moukas o baro Debles, ko Devel, koles leskre phoure an-mangan.

11Ninna kras lo moulne platse ap i berge an o them Youda, kay i menshe i moule debla an-mangan. Yaake anas lo i menshen an Youda oun an Yerusalem o baro Debleskro dromestar tele.

12Koy bičras o Debleskro rakepaskro, o Eliya, leske i liil. An leste his tardo: O baro Devel, ko Devel tiro phouro dadestar David, penell touke: Tou ačal gar ap o drom, kay djas tiro dad, o Yosafat oun tiro papo, o Asa, ko baro ray pral Youda.

13Na-a, tou djiveh har i bare raya pral o them Israel, oun aneh i menshen an o them Youda oun an o foro Yerusalem yaake dour, te mangenn le i moule deblen an. Tou kreh yaake har o kheer Ahab kras. Ninna maral tire phralen, kolen kay lačeder his har tou.

14Doleske dell tout o baro Devel i pharo dap, hoy taprell i menshen an tiro them, tire čaven oun tire romyen, oun halauter hoy tout hi.

15Ap toute vell boud nasslepen an tire bouke. Kova vell djoungleder oun djoungleder, bis tire bouke dran toute vin venna.

16Oun o baro Devel kras, te van i Filistarya rhoyedo pral o Yoram. Ninna kol Arabarya, kay djivan langs i Kousharya, van rhoyedo ap leste.

17Oun yon djan khetne pre an o them Youda, oun lan halauter pentsa, hoy hatsan le an o kheer o baro rayestar, ninna leskre čave oun leskre romya. Oun yaake ačas leske kek čavo pral, kokres leskro terneder čavo, o Yoakaz.

18Pal kava tselo koova, čivas o baro Devel i nasslepen an leskre bouke. Kolestar nay vas lo gar sasto.

19Oun o nasslepen vas djoungleder oun djoungleder. Oun pal douy bersha van leskre bouke dran leste vin. Oun yob meras an boud douka. Oun kek dran leskro them kras leske i yag, te sharenn le les, har kran le kova pash leskre phourende.

2032 (triyanda-te-douy) bersha his lo, har vas lo baro ray. Oun 8 (orhta) bersha his lo o baro ray an o foro Yerusalem. Kekes khaytas leskro merepen. Ninna te paskran le les an o Davideskro foro, his leskri grufta gar an o moulengro kheer, kay i vavar bare raya paskedo van.

← Chapter 20 Jump to: Chapter 22 →