2 Chronicles 5

Romani Sinte 2024 (O Debleskro Lab 2024 (Sinte-Manouche))

← Chapter 4 Jump to: Chapter 6 →

1Har o tselo Debleskro kheer kerdo vas oun kova, hoy dren his, hoy moukas o ray Salomo te krell, moukas lo ko koova te anell, hoy peskro dad, o David, o baro Debleske das. Ko roup oun sonakay oun ko tselo koova čivas lo an o Debleskro kheer, an koy isema, kay o bravlepen his.

2Kote moukas o baro ray Salomo i phoureden dran Israel pash peste vell an o foro Yerusalem: kolla, kay his i pralstoune pral i deesh-te-douy bare khera o Yakobeskre deesh-te-douy čavendar, oun i pralstoune pral lengre tsele familye. Khetne lentsa kamas yob o baro Debleskro morhton, kay o Debleskre deesh laba dren čiddo hi, an o Debleskro kheer te anell. Ko morhton his čiddo an o Davideskro foro ap i berga Sion.

3Oun i tsele morsha dran Israel van khetne pash o baro rayeste an kol bare divessa an o eftato čon.

4Oun har i tsele phoureder dran Israel kote khetne van, hadan i Levitarya o morhton kol deesh labentsa o baro Deblestar pre,

5oun hidjran les an o Debleskro baro kheer. Ninna anan le o Debleskro plarhteno kheer koy, oun ko tselo Debleskro koova, hoy koy dren his. Kova kran i rashaya oun i Levitarya.

6Oun o ray Salomo oun i tsele Israelitarya, kay van khetne pash leste glan ko morhton, maran oun rhačran bakren oun groumyen o Debleske, yaake boud, kay kek djinas, har boud kolla his.

7Oun i rashaya anan o morhton o Debleskre deesh labentsa ap peskri platsa an koy palstouni isema, hoy kharell Debleskri kouč isema. Yon čivan o morhton tel kol douy bolepangre figure, kay kharenn Keroubim, tel lengre čirklengre moussya.

8Kal Keroubim kran pengre moussya bourhles pral koy platsa, kay o morhton tardo his, oun čakran yaake o morhton oun leskre hidjepangre kashta.

9Oun i hidjepangre kashta his yaake lengsto, kay lengre palstoune kotya nay diklo van an koy glanstouni isema, hoy hi glan i palstouni isema. Foun vin nay van le gar diklo. Oun kote his o morhton bis ap kava dives.

10Oun an ko morhton his či dren, har kokres kol douy barra, hoy o Mose dren čivas pash i berga Horeb. An lende his o baro Debleskre deesh laba dren činlo, hoy i Israelitarya hounte rikrenn. Kova kras lo lentsa vin, har yon vin van dran o them Egiptia.

11I tsele rashaya, kay kote khetne his, kran pen djoudjo o Debleske, ninna te his le gar mank kolende, kay hounte boudrenn ap ko dives. Oun i tsele Levitarya, kay gipangre his, – kolla his o Asaf, o Heman oun o Yedoutoun oun lenge čave oun phrala – his an lače layntikre kotya rido, oun his tarde pash o Debleskri rhačepaskri ap koy rig, kay o kham pre djal. Len his bashepangre pash pende, hoy kharenn cimbale, harfe oun laute. Oun lentsa his 120 (yek-sheel-te-biish) rashaya koy tardo, kay bashran ap i phourdepangre. Oun yon bashran oun givan yaake khetne, har te vans le yek morsh, oun hadan oun sharan o baro Debles. Khetne ko bashepah ap i cimbale, phourdepangre oun doryengre bashepangre givan le kay gili: “Yob hi kamlo oun leskro lačepen hi an hako tsiro menge koy.” Har i rashaya vin djan dran o baro Debleskro kheer, his i folka an o tselo kheer.

14An koy folka his o Debleskro raylepen. O tselo kheer his pherdo o raylepen o baro Deblestar. Doleske nay ačan i rashaya gar koy, te krenn le pengri boudi.

← Chapter 4 Jump to: Chapter 6 →