2 Chronicles 19

Romani Sinte 2024 (O Debleskro Lab 2024 (Sinte-Manouche))

← Chapter 18 Jump to: Chapter 20 →

1Oun o Yosafat, ko baro ray pral Youda, vas sasto pale khere an o foro Yerusalem.

2Oun kote vas leske o dikepaskro, o Yehou an o drom. Koleskro dad his o Hanani. Oun o Yehou penas ap o baro rayeste Yosafat: “Hoske val tou o čilačo morsheske ap i rig, oun val i maal kolestar, kay kamas o baro Deblestar či te djinell? Doleske vell i rholi o baro Deblestar pral toute.

3Čomone lačes vas pash toute ninna hatslo: Tou rhačral kol figure an o them, hoy i debletsa Ashera sikrenn, oun rodal pal kova, hoy o baro Devel kamell.”

4Oun o Yosafat djivas an o foro Yerusalem, oun djas pale an o tselo them trouyel foun o foro Beersheba bis pash i berge Efrayim, oun anas i menshen pale pash o baro Debleste, kay o Devel lengre phourendar his.

5Oun an i tsele zorele forya an o them Youda čivas lo čačepangren an pengri boudi dren,

6oun penas ap lende: Denn garda, har rakrenn o čačepen vin pral i menshende! T'mer rakrenn an o lab o baro Deblestar oun gar an o lab i menshendar. Oun yob hi t'mentsa, te rakrenn čačepaskre laba vin.

7Oun kanna rikrenn o baro Debles glan t'mare yaka, rikrenn t'men ap o čačepen oun denn hakeneste peskro čačepen. Ma bistrenn, pash maro baro Debleste hi kek rhorhepen. Oun yob dikell vitar gar ap kova koon glan leste tardo hi. Oun yob moukell pes gar te ginell.

8Oun ninna an o foro Yerusalem rodas o Yosafat čačepangre morshen vin dran i Levitaryen oun i rashayendar oun i pralstunendar pral i bare familye an Israel, te rakrenn le o čačepen pral i menshende yaake vin, har an o baro Debleskre lila činlo hi, oun te hi i menshe an o foro Yerusalem čingepen mank pende.

9Lenge penas lo: “Rikrenn pash t'mari boudi o baro Debles glan t'mare yaka! Rikrenn t'men ap leskre laba t'maro tselo djiyeha an halauter, hoy krenn.

10Te venn pash t'mende t'mare phrala, kol čačepangre dran kol vavar forya, oun poučenn t'mendar, hoy te krenn le pash kava te ko čingepen, nay djal troul rat fer rat, nay djal troul o Debleskro drom oun leskre laba, kova, hoy yob t'mendar kamell, oun hoy an leskre čačepaskre laba činlo hi, palle hounte t'mer lenge penenn oun sikrenn, har kova čačo hi, te anenn le kek doosh pral pende glan o baro Debleste, oun leskri rholi pral t'mende vell oun pral t'mare phrala. Te sikrenn t'mer lende lauter mishto, anenn t'mer kek doosh ap t'mende.

11Dikenn, o pralstouno rashay, o Amarya hi pral t'mende tardo an o Debleskro tselo koova. Oun o Sebadja, koleskro dad o Ismael his, – yob hi o pralstouno pral o kheer Youda – les hi penepaske pral halauter, hoy an miro, o baro rayeskro, vast hi. Oun i Levitarya hi t'mare činepangre, kay činenn an lila, hoy hounte vell pre činlo. Krenn t'mari boudi kek daryah! O baro Devel vell kolenge ap i rig, kay krenn, hoy mishto hi.”

← Chapter 18 Jump to: Chapter 20 →