2 Chronicles 31

Romani Sinte 2024 (O Debleskro Lab 2024 (Sinte-Manouche))

← Chapter 30 Jump to: Chapter 32 →

1Oun har kova halauter kerdo his, djan kol tsele Israelitarya, kay kote khetne his, an i forya an o them Youda. Oun yon phagan kol bare barra an kotya, hoy i moule deblenge pre-čiddo his, oun dan koy kashteni debletsa Ashera trouyel, oun kran kol moulne platse oun kol rhačepangre paash, kay i moule debla an-mangedo van, bis te či lendar pral ačas. Kova kran le an o tselo them Youda, Benyamin, Efrayim oun Manasse. Palle djan i tsele Israelitarya pale khere an lengre forya, kay lengre khera oun lengri phoub his.

2Oun o Hiskiya čivas i rashayen oun i Levitaryen yaake khetne, har hounte boudrenn le, hakenes an peskri boudi. I rashaya hounte anan kol firhen o Debleske, hoy van tseles rhačedo oun kolen, hoy rhan le khetne. I Levitarya van lenge ap i rig, oun sharan o baro Debles bashepah oun gipah an i voudya ko kherestar, kay o baro Devel djivell.

3Oun o baro ray das peskre firhendar, te venn le rhačedo o Debleske, yaake har činlo hi an i lila o baro Deblestar: haki taysarla oun haki rati, ninna ap o Debleskro dives, oun ap o dives, kay vell o nevo čon diklo, oun ap kol bare divessa.

4Oun yob penas i menshenge, kay an o foro Yerusalem djivan, te denn le ninna pengro kotar, te nay lenn i rashaya oun i Levitarya pengro tselo tsiro, te krenn le o Debleskri boudi, yaake har an o baro Debleskre lila činlo hi.

5Oun har i menshe ko lab shounan, dan le boud kolestar, hoy pash lende bares vas: o feteder djob, mool, djet, gvin oun kolestar, hoy ap lengri harhetikri phoub bares vas. Ninna o deshto kotar halauterestar anan le, oun kova his boud.

6Oun i menshe dran i vavar forya an o them Youda khetne kol Israelentsa, kay pash lende djivan, yon anan ninna pengro deshto kotar lengre groumyendar oun bakrendar oun o vavarestar, hoy yon kaman lengro baro Debleske te dell. Kova lauter čivan le khetne ap bare haufe, yek haufe langs i vavar.

7Kova djas foun o triinto čon bis an o eftato čon.

8Oun har o Hiskiya oun i pralstoune koy djan, oun dikan, har boud khetne vas, sharan le o baro Debles oun leskre menshen Israel.

9Oun o Hiskiya poučas i rashayendar oun i Levitarya, har savo boud koova khetne vas.

10Oun o baro rashay Asarya dran o kheer Zadok, penas ap leste: “Foun ko tsiro, kay van i menshe an o baro Debleskro kheer oun anan leske, hoy lenge penlo vas, rham oun vam čales, oun ninna ačas boud pral. O baro Devel čivas peskri barht ap peskre menshende. Doleske ačas yaake boud rhapen pral.”

11Kote penas o baro ray, o Hiskiya, te venn bare iseme kerdo an o baro Debleskro kheer. Oun yon kran les yaake.

12Kote čivan le kova lauter kotar fer kotar dren: o rhapen, hoy dan le har glan-činlo hi, oun kova, hoy o deshto kotar kolestar hi, hoy yon dren anan, oun kova hoy dan le pendar o baro Debleske. Oun o pralstouno koy pral his ko Levitari, o Konanya. Oun o douyto his leskro phraal o Shimi.

13Lenge ap i rig van o Yehiel, Asasya, Nahat, Asahel, Yerimot, Yosabad, Elyel, Ismakia, Mahat oun o Benaya. Yaake penas kova o baro ray, o Hiskiya, oun o Asarya, ko his o pralstouno pral halauter an o Debleskro kheer.

14Oun yek Levitari, o Kore, koleskro dad o Yimna his, yob das yak ap o voudar ap koy rig, kay o kham pre djala, oun vas kanna dren čiddo te dell lo garda ap ko koova, hoy i menshe pendar o baro Debleske dan. Oun yob hounte das kova ap i rashayende oun i Levitaryen vin, hoy lengro kotar hi, ninna kol kotya mass, hoy kokres i rashayenge his.

15Oun shob vavar morsha van leske mishto pash o vast an kol forya, kay i rashaya djivan. Kolla his o Eden, o Minyamin, o Yeshoua, o Shemaya, o Amarya oun o Shekanya. Lengri boudi his te denn le pengre phralende lengro kotar rhapaske, i phourende har i ternende, yaake har yon pengri boudjake khetne čiddo van,

16oun an lila dren činlo van. Dren činlo his hako morsh oun morsh čavo, kay triin bersh oun phoureder his. Yon his yaake dren činlo, har yon khetne boudran an o baro Debleskro kheer an ko tsiro, hoy lenge penlo vas.

17Oun i laba i rashayendar his an i liil činlo pal pengre dadengre khera. Oun i Levitarya his ninna an lila dren činlo, hakeno kay biish bersh oun phoureder his. Yon van yaake dren činlo, har yon pengri boudjake khetne čiddo van.

18An kol lila van ninna lengre familye dren činlo: lengre romya, čave oun ča. Kova vas doleske kerdo, kay i morsha pengro tselo djipah o Debleske koy his.

19Ninna i rashaya, kol čave o Aronestar, kay djivan vin glan lengro foro ap koy phoub, kay i firhe rhana, kolla lan pengro kotar rhapaske. Lenge van morsha pengro labeha vi-rodedo hako foreske, te denn le i tsele morshende an i rashayengre familye pengro kotar, ninna kol Levitaryen, kay an i lila dren činlo van.

20An o tselo them Youda kras o Hiskiya yaake, har mishto oun čačo his glan o baro Debleste. Yaake djivas lo peskro Debleha.

21Oun halauter, hoy yob kras, te vell koy boudi an o Debleskro kheer yaake kerdo har glan činlo hi, kova kras lo peskro tselo djiyeha. Yob rodas, te krell lo, hoy peskro Devel lestar kamas. Doleske moukas o baro Devel kova leske mishto te djal.

← Chapter 30 Jump to: Chapter 32 →