2 Chronicles 33

Romani Sinte 2024 (O Debleskro Lab 2024 (Sinte-Manouche))

← Chapter 32 Jump to: Chapter 34 →

1Har vas o Manasse baro ray, his lo deesh-te-douy bersha phouro; oun yob his panč-deesh-te-panč bersha baro ray an o foro Yerusalem.

2Oun yob kras, hoy his čilačo glan o baro Debleskre yaka: ko emligo djoungelo koova, har kol vavar menshe kran, kolen o baro Devel glan o Israel vin tradas dran o them.

3Yob čivas kol moulne platse pale pre, kay i moule deblenge firhe rhačedo van. Kol platse das leskro dad, o Hiskiya, khetne. Oun o Manasse moukas rhačepangre te krell, kay firhe rhačedo venn o debleske Baal, kay i rhorheno devel hi. Oun yob kras figure, hoy sikran i debletsa Ashera. Oun yob mangas i bolepangre momlia an oun vitsras pes glan lende tele.

4Oun an o baro Debleskro kheer čivas yob rhačepangre pre i moule deblenge, kote, kay o baro Devel penas: “An o foro Yerusalem kamau te mangenn le man an hako tsireske.”

5Oun i tsele bolepangre momelenge čivas lo rhačepangre pre an kol douy glanstoune platse glan o baro Debleskro kheer.

6Oun yob moukas peskre čaven an i yag te djal an i tala Ben-Hinnom, oun shounas ap čirklengre golya oun vavar sikepen, oun kras dourkepen oun rikras peske dravepangre oun save menshen, kay i moulen poučan. Yaake kras lo boud koova, hoy čilačo hi glan o baro Debleskre yaka, te rhoyrell lo les.

7Oun moukas i figura te krell, hoy i rhorheno devel sikras, oun anas lat an o Debleskro kheer, kolestar o Devel ap o David penas oun leskro čaveste, o Salomo: “An kava kheer oun an o foro Yerusalem, hoy me mange vi-rodom dran o tselo Israel, kate kamau me, te mangenn le man an hako tsiro.

8Oun me kamau te djan i Israelitarya bouder gar krik dran kava them, kay me dom lengre phourende, yaake rah yon halauter krenna, hoy me lenge penom, oun miro tselo drom djan, oun mire laba rikrenn oun pal miro čačepen djivenn, yaake har sikras len o Mose.”

9Oun o Manasse anas i menshen an o them Youda oun an o foro Yerusalem ap i čilačo drom; oun yon djivan čilačeder har kol vavar menshe, kolen o baro Devel glan o Israel krik tradas.

10Ninna te das o baro Devel o Manasse trad oun i menshen an leskro them, dan yon gar garda koy pre.

11Doleske moukas o baro Devel i pralstunen pengre lourdentsa dran o them Assour pral lende te vell; kolla tapran o Manasse i sasteha oun pandan les shellentsa dran lolo saster, oun anan les an o them Babilonia.

12Har lo an bari daar his, mangas lo o ropah o baro Debles, kay leskro Devel oun o Devel leskre phourendar his, oun penas leske, har boud les leskri doosh khaytas.

13Oun har lo yaake mangas, moukas pes o baro Devel te mangell, oun shounas leskro mangepen, oun anas les pale an o foro Yerusalem an leskro them, kay yob baro ray hi. Koy hayvas o Manasse, kay o baro Devel o čačo Devel hi.

14Oun pal kova moukas lo vin glan o Davideskro foro i bari massouri te krell. Koy massouri djas ap koy rig, kay o kham tele djal, pash o pani Gihon an i tala oun doureder kote, kay o drom pash o Mačengro voudar djal, oun troul ko foreskro kotar, hoy kharell Ofel. Oun yob bičras bare lourden an hako zorelo foro an o them Youda.

15Oun yob moukas i figuren i rhorhene deblendar krik te anell, ninna koy debleskri figura, hoy yob an o baro Debleskro kheer čivas. Ninna anas lo i tsele rhačepangre krik, kolla, kay čivas lo pre ap i berga, kay o Debleskro kheer tardo hi, oun kolla, kay an o foro Yerusalem tardo his; yob vitsras ko tselo koova vin glan o foro.

16Oun yob moukas o baro Debleskri rhačepaskri neves te krell, oun anas o baro Debleske firhen, save, hoy rhan le khetne glan leste, oun save, te parkrell lo pes pash leste. Oun ap i menshende an o them Youda penas lo, te mangenn le kokres o baro Debles an. Yob hi o Devel pral Israel.

17Ninna te anan i menshe doureder firhen ap kol moulne platse an o them, rhačran le len kote kokres o baro Debleske, kay lengro Devel hi.

18Ko tselo vavar koova, hoy pral o Manasse penepaske hi, oun har lo peskro Debles mangas, oun kol laba, hoy i dikepangre ap leste rakran, hoy penas lenge o baro Devel, kay o Israeleskro Devel hi, kova hi halauter dren činlo an o liil i bare rayendar pral Israel.

19An o liil, hoy i dikepangre činan, hi činlo, har o Manasse o baro Debles mangas, oun har kova les shounas, ninna leskri tseli doosh, oun har lo o baro Debles moukas, oun kay lo moulne platse kras, oun rhorhene deblen pre čivas, ninna koy figura, hoy i Ashera sikras, – kova lauter, hoy lo kras, glan te dikas lo peskri doosh dren glan o baro Debleste.

20Oun o Manasse meras, oun yon paskran les an leskro kheer. Oun leskro čavo, o Amon, vas baro ray pal leste.

21Har vas o Amon baro ray, his lo 22 biish-te-douy bersha phouro; oun yob his douy bersha baro ray an o foro Yerusalem.

22Oun o Amon kras, hoy čilačo hi glan o baro Debleskre yaka, yaake har leskro dad o Manasse kova kras. Oun anas firhen i moule deblenge, hoy leskro dad o Manasse kras, oun vitsras pes tele glan lende.

23Oun yob sikras gar o baro Debleste, kay les khaytas, hoy yob kras, har leskro dad o Manasse kras. Na-a, yob las gomme boudeder doosh ap peste.

24Oun i bare morsha an leskro them čivan pen čorrhanes khetne, oun maran les an peskro kheer.

25Doleske dan i morsha dran Youda halauteren moulo, kay pen khetne čivan, te marenn le o baro rayes Amon. Oun yon lan leskro čaves, o Yosia, te vell lo baro ray pal leste.

← Chapter 32 Jump to: Chapter 34 →