2 Chronicles 22

Romani Sinte 2024 (O Debleskro Lab 2024 (Sinte-Manouche))

← Chapter 21 Jump to: Chapter 23 →

1Har o Yoram meras, lan i menshe an o foro Yerusalem leskro ternester čaves, o Ahasya, te vell lo o baro ray pal leskro dadeste. Glan i tsiro van Arabarya ap i lourdengri platsa, kay i lourde dran Youda his, oun peran pral lende. Lentsa khetne van randepangre lourde oun maran kol tsele phoureder čaven o Yoramestar. Doleske vas o Ahasya o baro ray pral Youda.

2Biish-te-douy (22) bersha his o Ahasya, har vas lo baro ray. Oun yob his yek bersh baro ray, oun djivas an ko tsiro an o foro Yerusalem. Leskri day kharas Atalya, lakro dad his o Omri.

3Ninna yob djivas yaake har o Ahabeskri familya, oun poučas gar pal o baro Debleste. Leskri day kamas kova yaake oun penas leske kova ninna.

4Yaake kras lo, hoy glan o baro Debleskre yaka čilačo hi, yaake har kran kova leskre menshe dran o Ahabeskro kheer. Pal o merepen leskro dadestar penan yon leske, hoy te krell lo. Oun kova his leskri bibarht.

5Yaake har yon leske penan, djas lo khetne o Israeleskro rayeha, o Yoram, koleskro dad o Ahab his, an o kourepen an o foro Ramot an o them Gilead, te kourell lo pes o baro rayeha pral o them Syria. Leskro lab his Hasael. Kol Syrarya dan o Yorames yaake,

6te djas lo pale an Yesreel, te vell leskro doukepen pale sasto, hoy kol Syrarya les an o foro Rama dan, har yob pes ko baro rayeha pral Syria, o Hasael, kouras. Oun o Ahasya, koleskro dad o Yoram his, vas tele pash leste an Yesreel, kay o Yoram doukedo čiddo his.

7O Devel kamas kova yaake, te djal o Ahasya pash o Yoram, te vell lo kote maredo. Oun har yob koy vas, djan kol douy, o Ahasya oun o Yoram pash o Yehou, koleskro dad o Nimshi hi. Koles rodas o baro Devel vin, te vell lo baro ray oun marell o Ahabeskri tseli familya.

8Yaake vas, har o Yehou i phagi pral o Ahabeskri familya anas, hatsas lo ninna pralstoune lourden dran Youda, oun kol čaven o Ahasyeskre phralendar. Kolla boudran pengro kakeske, o Ahasya. Kolen moukas o Yehou te marell.

9Palle rodas lo o Ahasya. Oun yon tapran les an o foro Samaria, kote khatras lo pes. Oun yon anan les pash o Yehou. Kote maran le les. Oun yon paskran les doleske, kay o Yosafat leskro papo his. Kova rikras pes peskro tselo djiyeha ap o baro Debleste. Kanna his bouder kek koy dran o Ahabeskri familya, kay doha zoor an leste vals, te nay vals lo baro ray.

10Har o Ahasya meras, stas leskri day, i Atalya, pre, te marell li hakenes, kay o baro rayeha pral Youda dran yek familya vas.

11Yek kol čendar o baro rayestar – lakro lab hi Yosheba – čoras o tikno čaves peskro phralestar Ahasya mashkral dran o rayeskre čavende, kay venn marede. O tikno čavo kharas Yoash. Oun i Yosheba anas les oun koy djouvel, kay das ap leste garda, an i čibyengri isema. Yaake khatras li les i glan i Atalya, te vas lo gar maredo. I Yosheba his i čay o baro rayestar, o Yoram, oun i romni o rashayestar, o Yoyada. O Ahasya his lakro phraal.

12Oun o Yoash his pash lende khatedo an o baro Debleskro kheer shob bersha. An ko tsiro his i Atalya i rani pral o them.

← Chapter 21 Jump to: Chapter 23 →