2 Chronicles 6

Romani Sinte 2024 (O Debleskro Lab 2024 (Sinte-Manouche))

← Chapter 5 Jump to: Chapter 7 →

1Koy penas o Salomo: Baro Devel, tou penal: Me kamau te djivap an i kali folka.

2Oun me moukom touke kava raylo kheer te krell, te djivess koy dren oun nay ačeh hako tsireske.

3Oun o ray Salomo rissras pes oun dikas ap i menshende oun rakras o Debleskri barht vin pral i tsele Israelitaryen, kay kote tarde his.

4Oun yob penas: “Sharedo vell o baro Devel, ko Devel pral o Israel. Yob moukas čačes te vell, hoy lo miro dadeske, o Davideske, penas, har penas lo:

5Ko tselo tsiro, har mire menshen Israel dran o them Egiptia vin anom, rodom me kek foro vin an o tselo them Israel, te krenn le mange kote i kheer, kay vap sharedo. Oun rodom mange vitar kek morshes vin, te vell lo ray pral mire menshende Israel.

6Kanna rodom mange Yerusalem vin, te vap kote an-mangedo. Oun me rodom mange o Davides vin, te vell yob o ray pral mire menshende Israel.

7Miro dadeske, o Davideske, his ap o dji čiddo, te krell lo i kheer o baro Debleske, kay o Israeleskro Devel hi.

8Oun o baro Devel penas ap miro dadeste, o Davideste: Tou kral mishto, te kameh mange i kheer te krell.

9Kanna te vess tou gar kova, kay krell miro kheer, na-a, tiro čavo, kova, kay vell toutar, kova mou krell mange i kheer.

10Oun o baro Devel moukas peskro lab čačes te vell. Dikenn ap mande: Me vom pal miro dadeste kanna o baro ray pral o Israel, yaake har o baro Devel penas. Oun me moukom leske i kheer te krell, te vell yob, o Devel pral o Israel, kote an-mangedo.

11Oun me čivom kote ko morhton dren, kay kol douy barra dren hi, kay o Debleskre deesh laba dren činlo hi, hoy yob i Israelende das, te rikrenn le pen ap lende.”

12Oun o Salomo djas glan koy rhačepaskri, kay o baro Debleske firhe rhačedo venn. Oun i tsele Israelitarya his ninna koy. Oun yob hadas peskre vasta an o bolepen.

13Oun o Salomo moukas peske i čomone te krell dran lolo saster, ap koleste yob nay vell tardo, oun mashkral ap i glanstouni platsa te čivell. Kova his douy-te-paash metarya lengsto oun bourhlo oun yek-te-paash metarya baro. Koy pre his lo tardo oun peras ap peskre čanga tele glan i tsele Israelitarya oun hadas peskre vasta pral an o bolepen,

14oun penas: Baro Devel, tou o Devel pral o Israel, kek devel hi har tou: kek an o bolepen, vitar gar ap i phoub. Tou rikreh tiro lab, hoy tire menshende dal, oun hal lenge lačes, kolenge, kay djivenn glan toute pengro tselo djiyeha.

15Tou rikral tiro lab, hoy dal miro dadeske, o Davideske, kay touke koy his. Tou kral, te vas halauter yaake har tou penal. Halauter nay dikenn kova ap kava dives.

16Kanna, baro Devel, tou Devel pral o Israel, rike ninna tiro vavar lab, hoy tou dal miro dadeske, o Davideske, kay touke koy his. Tou penal, te vell hako tsiro yek dran o Davideskri familya o ray pral o Israel. Kova djal yaake rah, har denn leskre čave garda ap pengre dromma, te djivenn le ap tiro drom yaake, har o David glan toute djivas.

17Baro Devel, tou, kay hal o Israeleskro Devel, kanna mouk tiro lab čačes te vell, hoy tou penal o Davideske, kay touke koy his.

18Nay vell čačo, kay o Devel kamell te djivell pash i menshende ap i phoub? O tselo bolepen hi gar bares doha, te rikrell lo tout. Har nay krals kova kava kheer, hoy me moukom te krell?

19Miro baro Devel, tou hal miro ray. Shoun, hoy toutar mangau! Shoun miro mangepen!

20Rike tire yaka pre pral kava kheer an i rati oun ap o dives! De yak ap ko kotar phoub, kolestar tou penal: Kote kamau te mangenn t'mer man an. Shoun man, miro ray, te rakrau kate touha!

21Shoun miro mangepen oun ninna ko mangepen tire menshendar Israel, te denn le gole ap toute kay ap kava kotar phoub. Oun tou te shouneh les an tiro kheer an o bolepen, palle ab kamles, oun le koy doosh mendar krik.

22Te anell yek i doosh ap i vavareste, oun kova vell glan tiri rhačepaskri anlo, kate an tiro kheer, oun yob hounte dell pes sovel, te nay vell i bibarht pral leste, te rakrell lo gar o čačepen,

23palle shoun tou an o bolepen, oun kre o čačepen vin pral tire boudepangre. Kre te vell o čilačepen, hoy yek kras, ap leskro shero. Oun ko vavares, kay an o čačepen his, de les leskro čačepen, te vell diklo, kay kek doosh ap leste hi.

24Te moukenn tire menshen Israel tiro drom oun venn doleske i menshendar dran vavar themma khetne dine, oun yon venn pale pash toute oun denn tiro lab an-gole oun mangenn pen tele glan toute kate an kava kheer

25palle shoun len tou an o bolepen, oun le lengri doosh lendar krik, oun an len pale pale an ko them, hoy tou lenge oun lengre phourenge dal.

26Te moukenn tire menshen Israel tiro drom, oun tou rikreh doleske o brishin pale, oun yon denn tout an-gole oun rissrenn lengre mouya ap koy rig, kay kava kheer tardo hi, oun mangenn pen tele glan toute oun moukenn o čilačepen, koleske tou len dal,

27palle shoun tou an o bolepen, oun le ko tselo čilačepen krik, hoy yon oun lengre raya kran. Sike lenge tiro lačo drom, te nay nashenn le ap leste! Oun palle de len pale o brishin ap ko them, hoy tou lenge dal, te vell lo lengro.

28Nay vell i bari bok pral kava them, ninna i djoungelo nasslepen, i tsiro, kay dell kek brishin, i nasslepen ap o djob, boud stepangre oun kirme, kay rhan o tselo zenlepen, lourde, kay venn dran vavar themma oun čivenn pen troul i forya oun pandenn len dren – havi bibarht oun nasslepen ninna vella,

29koon palle peskro tselo djiyeha toutar mangella, nay vell yek, nay venn boudeder, nay vell o tselo Israel, oun an peskri bibarht oun peskro djiyeskri douk rikrell lo peskre vasta ap kay rig, kay kava kheer hi,

30palle shoun tou, kay djiveh an o bolepen! Biste leskri doosh oun ab ap leskri rig! De hakeneste pal kova, har yob djivas. Tou prindjreh hakeneskre dromma, oun tou kokres dikeh hakeneske an o dji.

31Palle rikrenn le penge tout glan pengre yaka, oun djan ap tire dromma hako tsiro, yaake rah har yon an kava them djivenn, hoy tou mare phourende dal.

32Ninna i menshe dran vavar themma, kay gar tire menshendar Israel hi, shounenn, har baro tou hal, oun havo baro zorelo koova tou kral tire menshenge. Kanna, te vell yek lendar dran i dour them, te mangell lo tout an kate an kava kheer,

33palle shoun tou, kay djiveh an bolepen, oun kre halauter, hoy ko vi-themari toutar mangell, te nay hayvenn i menshe an i tsele themma ap kay phoub, koon tou hal, oun mangenn tout an yaake har tire menshe Israel. Palle djinenn le, kay tou djiveh an kava kheer, hoy touke krom.

34An ko tsiro, kay bičreh tou tire menshen an i kourepen vavar menshentsa, oun tire menshe mangenn tout, te vess ap lengri rig, oun rissrenn pen koy pashel kote, kay kava foro hi, hoy tou vin rodal, oun kay kava kheer hi, hoy touke krom,

35palle shoun lengro mangepen! Ava, tou an o bolepen, shoun oun le lengro koova an tiro vast!

36Tou djineh, kay kek mensho djoudjo hi an peskro dji oun an peskro djipen glan toute. Doleske nay vell, kay moukenn tire menshe tiro drom, oun tou rhoyreh tout pral lende oun moukeh len an o vast vavar menshendar te vell, te anenn yon len pandles an pengro them – kova nay vell dour oder gar yaake dour.

37Oun te lenn tire menshe les penge ap o dji an ko vavar them, kay yon pandle hi, oun yon kamenn pale tiro drom te djal oun mangenn pen tele glan toute oun penenna: “Mer anam doosh ap mende oun kram čilačepen oun moukam tiro drom.”

38Te venn le pash toute pale pengro tselo djiyeha oun lengro tselo djipah, an ko them, kay yon pandle hi, oun denn gole ap toute oun rissrenn pen koy pashel ap koy rig, kay lengro them hi, kay tou dal lengre phourende, oun kay ko foro hi, hoy tou touke vin rodal, oun ko kheer, kay me moukom touke te krell,

39palle shoun lengro mangepen! An o bolepen, kay tou djiveh, shoun ap lende oun le lengro koova an tiro vast! Oun biste ko čilačepen, hoy yon ap toute kran!

40Kanna, miro Devel, dik hako tsiro lačes ap mende, oun shoun maro mangepen, hoy kate mangah!

41Oun kanna, baro Devel, maro ray, ste pre, oun dja pash koy platsa, kay khere hal, tou oun ko morhton, hoy men tiri bari zoor sikrell. Baro Devel, maro ray, čip o čačepen pral tire rashayende har i ripen! Mou denn tire menshe gole i barhtyatar pral tiro lačepen!

42Tou baro Devel, maro ray, ma biče man, ko rayes, kones tou vin rodal, toutar krik. Mouk touke ko lačepen an o shero te vell, hoy penal o Davideske, kay touke koy his.

← Chapter 5 Jump to: Chapter 7 →