2 Chronicles 34

Romani Sinte 2024 (O Debleskro Lab 2024 (Sinte-Manouche))

1O Yosia his orhta bersha, har vas lo baro ray; oun yob his 31 (triyanda-te-yek) bersha baro ray an o foro Yerusalem.

2Oun yob kras, hoy mishto hi glan o baro Debleskre yaka, oun djas o drom, kay leskro phouro dad o David ninna djas, oun peras gar kava dromestar tele, gar ap i čači rig oun vitar gar ap i servi rig.

3Har lo an o orhtato bersh baro ray his, oun gomme i terno morsh his, rodas lo ko Debles, koles leskro phouro dad, o David, an-mangas. Oun an o 12. (deesh-te-douyto) bersh kras lo pes ap i boudi, te vitsrell lo dran o them Youda oun dran o foro Yerusalem kol rhorhene deblen oun figuren krik. Koy pashel his ninna i figure, hoy i debletsa Ashera sikrenn.

4Oun glan leskre yaka moukas lo i rhačepangre tele te phagell, kay firhen ko debleske rhačedo van, kay kharell Baal. Oun kol boba, hoy koy pral tardo his, oun kay soungepaskro koova rhačedo vas, moukas lo trouyel te dell. Oun i figure, hoy sikrenn i debletsa Ashera, oun kol vavar figure, hoy le pengre vastentsa kran, kolen phagas lo an kotya, oun das len yaake khetne, te ačas či har čik pral. Kay čik vitsras lo pral ko handako, kay kolla paskedo his, kay rhačran firhen oun vavar koova kol rhorhene deblenge.

5Oun palle rhačas lo i kokale lengre rashayendar ap kol čačepangre, kay yon firhen i rhorhene deblenge rhačran. Oun yaake kras lo, te his o them Youda oun o foro Yerusalem bouder gar pale-čiddo.

6Kova kras lo ninna yaake ap i tsele platse an i forya, hoy an i themma Manasse, Efrayim oun Simeon čiddo hi, oun bis an o them Naftali.

7Oun an o tselo them Israel phagas lo kol rhačepangre tele, ninna i figure, hoy i Ashera sikran. Oun i tsele vavar figure das lo an kotya oun kras len yaake tiknes, te his le har čik. Oun i boba, kay soungepaskro koova rhačedo vas, das lo trouyel. Pal kova djas lo pale an o foro Yerusalem.

8Oun har o Yosia an o 18. (deesh-te-orhtato) bersh baro ray his, oun ko them oun o Debleskro kheer djoudjo kras i rhorhene deblendar, koy bičras lo triin morshen, te krenn le kova pale neves, hoy an peskro baro Debleskro kheer paash djas. Kol triin morsha his o Shafan, koleskro dad o Azalya his, oun o Maasseya, ko moskro, oun o Yoa; kova his leskro činepaskro, kay i lila činas, leskro dad his o Yoakaz.

9Oun yon van pash o pralstouno rashay, o Hilkiya. Oun lenge vas kol tsele love dino, hoy an o Debleskro kheer anlo vas, oun hoy lan i Levitarya dren, kay ap o voudar garda dan, kol menshendar dran o them Manasse oun Efrayim oun kolendar, kay an Israel pral ačan, ninna kolendar dran o tselo them Youda oun Benyamin, oun kolendar, kay an o foro Yerusalem djivan.

10Oun yon dan kol love kol morshenge an o vast, kay pral i boudepangre tardo hi, kay ap o baro Debleskro kheer boudrenna, te krenn le kova pale neves, hoy ap o kheer paash djas.

11Oun kolla playsran kol loventsa kolenge, kay boudrenn o kashteha oun čivenn i barra pre, oun ginan glan-dine barra, ninna kasht, kolestar pandepangre oun pesse činle kashta kerdo van. Kal kotya ap o kheer his khetne phagedo, har moukan i bare raya pral Youda ko kheer tele te vell.

12Oun kol morsha kran pengri boudi an o čačepen. Oun kolla hi i laba kol morshendar dran o kheer Levi, kay pral lende tardo his, te denn le yak ap i boudepangre: o Yahat oun o Obadya dran o kheer Merari, oun o Zakarie oun o Meshoullam dran o kheer Kohat. Oun i Levitarya his halauter lače bashepangre.

13Vavar Levitarya his tardo pral i hidjepangre, oun dan ninna yak ap i vavar boudepangre. Mank i Levitarya his ninna save, kay činan i lila, vavar dan yak ap i boudepangre, oun vavar ap i voudya.

14Oun har yon kol love vin lan, hoy an o baro Debleskro kheer anlo vas, hatsas o rashay Hilkiya ko liil, kay činlo his, har te djan ap o baro Debleskro drom, yaake har o baro Devel les o Moseske penas.

15Oun o Hilkiya penas ap o činepaskro, o Shafan: “Me hatsom i liil an o baro Debleskro kheer, kay menge o Debleskro drom siklo vella.” Oun o Hilkiya das ko liil o Shafaneste.

16O Shafan anas les pash o baro rayeste, oun penas leske, har halauter djas, oun penas: “Halauter, hoy tire boudepangre penlo vas, krenn le.

17Yon lan kol tsele love vin, hoy an o baro Debleskro kheer his, oun dan len kol morshenge an o vast, kay pral i boudi čiddo hi an o baro Debleskro kheer, oun lengre boudepangrenge.”

18Oun o činepaskro, o Shafan, penas o baro rayeske ninna: “O rashay Hilkiya das man i liil.” Oun o Shafan draveras ko liil glan o baro rayeste.

19Yaake vas, har o baro ray i laba dran ko liil shounas, kras lo peskre koola paash, kay ap leste his.

20Oun o baro ray kharas kol morshen khetne: o Hilkiya, o Ahikam, ko his i čavo o Shafanestar, o Akbor, koleskro dad o Mika hi, o Shafan, kay činas i lila, oun o Asaya, ko his i pralstouno an o baro rayeskro kheer. Oun o baro ray penas lenge:

21“Djan koy oun poučenn o baro Debles mange oun i menshenge dran Israel, kay pral ačan, oun kolenge an o them Youda, pral kol laba an ko liil, hoy hatslo vas. Mare phoure shounan gar ap o baro Debleskre laba, oun djivan gar yaake, har dren činlo hi an kava liil. Doleske hi o baro Debleskri rholi bares ap mende čiddo.”

22Kote djas o rashay Hilkiya khetne kolentsa, kolen o baro ray bičras, pash i Debleskri rakepaskretsa, i Houlda. Koya djivas an o nevo kotar o forestar Yerusalem. Lakro rom his o Shalloum. Leskro dad his o Tokhat. Koleskro dad his o Hasra. O Shalloum das garda ap o ripyengro kheer. Oun kol morsha rakran lah.

23Yoy penas ap lende: “Kava penell o baro Devel, ko Devel pral o Israel: Penenn ko morsheske, kay t'men pash mande bičras:

24Kava penell o baro Devel: Me anau čilačepen pral kava foro oun pral i menshende, kay kate djivenn. Koy tseli bibarht, hoy an ko liil tardo hi, hoy moukas peske o baro ray pral Youda glan te draverell, anau pral t'mende.

25I menshe an Yerusalem moukan man oun anan vavar deblenge soungepaskro koova. Halautereha, hoy le pengre vastentsa kran, rhoyran le man. Doleske vell miri rholi har i yag ap kava foro, oun kek nay krell les vin.

26Ko baro rayeske pral o them Youda, kova kay t'men pash mande bičras, te poučenn o baro Debles, nay penenn: Kava penell o baro Devel, ko Devel pral o Israel: Tou shounal kol laba an kava liil.

27Oun kral tiro dji lenge pre. Oun kral tout tiknes glan o baro Debleste, har tou shounal, hoy me penom pral kava foro oun kol menshende, kay kate djivenna, oun kral tire koola paash, kay ap toute his, oun roval glan mande. Doleske shounom me tout ninna, penell o baro Devel.

28Oun anau kay bibarht gar pral kava foro oun kolende, kay kate djivenn, yaake rah har tou djiveh. Tou dikeh lat gar tire yakentsa. Me moukau tout an o lačepen te merell. Oun tou veh paskedo an o moulengro kheer tire phourendar. ” Oun kol morsha penan kal laba o baro rayeske.

29Oun o baro ray, o Yosia, bičras peskre bičepangren, oun moukas i tsele phoureden an o them Youda oun an o foro Yerusalem khetne gole te dell.

30Oun yob djas pral an o baro Debleskro kheer. Oun khetne leha djan i tsele morsha dran o them Youda, oun i menshe, kay djivan an o foro Yerusalem, i rashaya, i Levitarya oun i tsele vavar menshe, bare oun tikne. Oun kote moukas lo glan lende i tsele laba te draverell dran ko liil, hoy an o baro Debleskro kheer hatslo vas, kay činlo hi, hoy o Devel peskre menshendar kamella.

31Oun o baro ray his ap peskri platsa tardo oun das o baro Debleste peskro lab, te djan le ap o Debleskro drom, oun rikrenn leskre laba, oun djivenn yaake, har yob len sikras oun pal leskro čačepen. Pengro tselo djiyeha oun pengri tseli zoryah kaman le pal kal laba te djivenn, hoy o Devel len das, oun hoy an kava liil činlo hi.

32Oun halauter, kay his an o foro Yerusalem oun an o them Benyamin, kolen moukas lo o baro Debles pengro lab te dell, te krenn le pal kal Debleskre laba. Oun yaake djivan i menshe an o foro Yerusalem pal i laba hoy o Devel lentsa vin kras, ko Devel, kay ninna o Devel lengre phourendar his.

33Oun o Yosia vitsras i tsele djoungele rhorhene deblen dran o tselo them vin, kay i Israelitarya djivan, oun kras, te mangan le halauter o baro Debles an, kay lengro Devel hi. Yaake rah, har o Yosia djivas, moukan le gar o baro Debles, ko Debles, koles ninna lengre phoure an-mangan.

← Chapter 33 Jump to: Chapter 35 →