Genesis 40

Tswana (BAEBELE e e Boitshepo) 1992

← Chapter 39 Jump to: Chapter 41 →

1Ga dirala ya re morago ga dilo tse, motshola phafana wa kgosi ya Egepeto le moapei wa yone, ba kgopisa morena wa bone, kgosi ya Egepeto.

2Mme Faro a nna bogale le bagolwane ba gagwe ba babedi, e bong mogolo wa batshola diphafana le mogolo wa baapei.

3A ba tsenya mo tisong mo ntlong ya kgosana ya maotlana, mo ntlong ya kgolegelo, felo kwa Josefe o golegilweng gone.

4Kgosana ya maotlana a ba tsenya mo thateng ya ga Josefe, mme a ba direla; ba sala ba ntse mo tisong ka lobaka.

5Mme ba lora toro boo babedi mo bosigong bo le bongwe fela, mongwe le mongwe ka fa phuthololong ya toro ya gagwe, motshola phafana le moapeedi wa kgosi ya Egepeto, ba ba golegilweng mo ntlong ya kgolegelo.

6Josefe a tla a tsena kwa go bone ka moso, a ba leba, mme bonang, ba bo ba tlhontse.

7Mme a botsa bagolwane ba ga Faro ba a nang nabo mo tisong, mo ntlong ya mong wa gagwe a re: “Ana lo tlhonyeditseng difatlhogo mo go kanakana gompieno?”

8Ba mo raya ba re: “Re lorile toro, mme ga go na ope yo o ka e phuthololang.” Josefe a ba raya a re: “Diphuthololo a ga se tsa Modimo? Ke a lo rapela, e mpoleleleng.”

9Motshola phafana yo mogolo a bolelela Josefe toro ya gagwe, a mo raya a re: “Mo torong ya me, bona, go ne go le mofine fa pele ga me;

10mo mofineng ga bo go le dikala di le tharo; mme wa nna jaka e kete o a kukunya, le dithunya tsa one tsa, thunya; le masitlha a tswa mafine a a buduleng.

11Phafana ya ga Faro ya bo e le mo seatleng sa me; ka tsaya mafine ka a gamolela mo phafaneng ya ga Faro, ka neela Faro phafana mo seatleng.”

12Josefe a mo raya a re: “Phuthololo ya yone ke e: Dikala tse tharo ke malatsi a le mararo.

13E tlaa re malatsi a ise a nne mararo Faro a tsholetse tlhogo ya gago, a go busetse kwa tirong ya gago; mme o tlaa neela Faro phafana mo seatleng, ka fa mokgweng wa gale, jaaka fa o sa ntse o le motshola phafana wa gagwe.

14E tle e re o tshela sentle o nkgopole, ke a go rapela, o ntshupetse pelonomi o nkumake kwa go Faro, o ntseye ke tswe mo ntlong e.

15Gonne ruri ke utswilwe ka ngwegisiwa mo lefatsheng la Bahebere; le gone mono ga ke a dira sepe se e ka bong e le fano ba ntsentse mo moleteng o ka ga sone.”

16E rile moapei yo mogolo a bona fa phuthololo e le molemo, a raya Josefe a re: “Le nna ke ne ke le mo tirong, mme bona, diroto di le tharo tsa senkgwe se sesweu di ne di le mo tlhogong ya me.

17Mo serotong se se kwa godimodimo ga bo go le dijo dingwe le dingwe tse di besitsweng tsa ga Faro; mme dinonyane tsa di ja di le mo serotong mo tlhogong ya me.”

18Mme Josefe a mo fetola, a mo raya a re: “Phuthololo ya yone ke e: Diroto tse tharo ke malatsi a le mararo.

19E tlaa re malatsi a ise a nne mararo Faro a tsholetse tlhogo ya gago a e tlose mo go wena, a go pege mo setlhareng; mme dinonyane di tlaa ja nama ya gago.”

20Ga dirala ya re ka letsatsi la boraro, e le letsatsi la botsalo jwa ga Faro, a direla batlhanka botlhe ba gagwe modiro, a tsholetsa tlhogo ya motshola phafana yo mogolo le tlhogo ya moapei yo mogolo mo gare ga batlhanka ba gagwe.

21A busetsa motshola phafana yo mogolo mo go tsholeng phafana ga gagwe gape; mme a neela Faro phafana mo seatleng.

22Moapei yo mogolo a mo pega; jaaka Josefe a ne a ba phuthololetse.

23Le fa go ntse jalo motshola phafana yo mogolo ga a ka a gakologelwa Josefe; a mo lebala fela.

← Chapter 39 Jump to: Chapter 41 →