Isaiah 10

Chinese TTVR (現代台語譯本羅馬字版)

← Chapter 9 Jump to: Chapter 11 →

1Chhám ah, hiah-ê chè-tēng put-gī ê hoat-lu̍t, siá phòaⁿ-koat-su khi-ap góa ê chú-bîn ê lâng!

2Lín pak-siah sàn-chhiah-lâng ê koân-ek, pak-toa̍t khùn-khó͘-lâng èng-iú ê kong-chèng, chiong kóaⁿ-hū chòe lín ê la̍h-bu̍t, ko͘-jî chòe lín ê chiàn-lī-phín.

3Tī sím-phòaⁿ ê ji̍t, chai-lān tùi iâu-oán ê só͘-chāi lâi ê sî, lín beh án-chóaⁿ? Lín beh tùi siáⁿ-lâng kiû pang-chān? Lín ê châi-hù beh lâu hō͘ siáⁿ-lâng?

4Lín chí-ū khut tī hu-ló͘ tiong-kan, á-sī siū sat-hāi tó tī si-thé tiong. Sui-jiân sī án-ni, Siōng Chú ê siū-khì iáu-bē soah; I ê chhiú iáu chhun-tn̂g-tn̂g beh chhú-hoa̍t lín.

5Chhám ah, A-su̍t! Góa siū-khì ê kùn, góa chhiú-tiong só͘ gia̍h siū-khì ê koáiⁿ.

6Góa bēng-lēng i khì tùi-hù bû-hoat-bû-thian ê kok-bîn, phài i khì kong-kek góa só͘ thòng-hūn ê jîn-bîn; chhiúⁿ in ê chiàn-lī-phín, toa̍t in chhiúⁿ-toa̍t ê mi̍h, koh thún-ta̍h in, chhin-chhiūⁿ teh lap koe-lō͘ ê lō͘-kô͘-bê.

7M̄-kú che m̄-sī A-su̍t ê kè-ōe, i ê bo̍k-te̍k m̄-sī kan-ta án-ni. I chûn-sim beh húi-bia̍t koh-khah chōe ê kok-ka.

8I khoa-kháu kóng, “Góa ê chí-hui-koaⁿ ta̍k-ê lóng sī chiàng-châi.

9Góa ū cheng-ho̍k Ka-le̍k-lô, mā ū cheng-ho̍k Ka-ki-bí-si. Góa ū cheng-ho̍k Hap-má, mā ū cheng-ho̍k A-ní-poa̍t. Góa ū cheng-ho̍k Sat-má-lī-a, mā ū cheng-ho̍k Tāi-má-sū-kek.

10Góa ê chhiú í-keng chhun kàu pài ngó͘-siōng ê kok-ka; in ê ngó͘-siōng pí Iâ-lō͘-sat-léng kap Sat-má-lī-a ê ngó͘-siōng khah chōe.

11Góa kiám m̄-bián tùi-hù Iâ-lō͘-sat-léng kap i ê ngó͘-siōng, chhin-chhiūⁿ góa ū tùi-hù Sat-má-lī-a kap i ê ngó͘-siōng?”

12Chú tī Sek-an-soaⁿ kap Iâ-lō͘-sat-léng oân-sêng I beh chòe it-chhè ê kang-chok liáu-āu, beh chhú-hoa̍t chū-ko chū-tāi ê A-su̍t -ông kap i ê kiau-ngō͘.

13In-ūi i kóng, “Góa khò ka-kī ê khùi-la̍t kap tì-hūi oân-sêng chit-ê sū, in-ūi góa chin ū pún-sū. Góa ū hòe-tû kok kap kok chi kan ê kéng-kài, chhiúⁿ-toa̍t in ê châi-pó. Góa chhin-chhiūⁿ ióng-sū chè-ho̍k kun-ông.

14Góa ê chhiú ū la̍k-tio̍h lâng ê châi-hù, ná teh the̍h chiáu-á-siū. Góa tit-tio̍h choân-tōe, chhin-chhiūⁿ khioh-tio̍h lâu--lo̍h-lâi ê chiáu-á-nn̄g; bōe ū chiáu-á phia̍t si̍t kā góa heh-kiaⁿ, mā bô chiáu-á khui chhùi chiu̍h-chiu̍h-kiò hoán-khòng.”

15Pó͘-thâu kiám thang tùi ēng i chhò-chhâ ê lâng khoa-kháu? Kù-á kiám thang tián i pí thoa kù-á--ê khah gâu? Sī lâng teh ēng kùn-á, m̄-sī kùn-á teh ēng lâng!

16Só͘-í, Chì-koân Siōng Chú — Bān-kun ê Thóng-sòe beh hō͘ ióng-chòng ê lâng pīⁿ kah siau-sán-lo̍h-bah, beh tiám hé kā in ê êng-hôa sio-tiāu.

17Hit-sî, Í-sek-lia̍t ê Kng ōe pìⁿ-chòe hé, i sîn-sèng ê Siōng-tè pìⁿ-chòe hé-iām, tī chi̍t ji̍t lāi kā chhin-chhiūⁿ chhì-phè kap iá-chháu ê A-su̍t -ông sio-bia̍t.

18I bō͘-sēng ê chhiū-nâ kap chin pûi ê chhân-hn̂g ōe thiat-tóe siū húi-hoāi, chhin-chhiūⁿ pīⁿ-lâng soe-jio̍k, sí--khì, siau-sit.

19Chhiū-nâ lāi chhun--lo̍h-lâi ê chhiū chin chió, liân gín-á to ōe-hiáu sǹg.

20Tī hit-ji̍t, Í-sek-lia̍t só͘ chhun ê chú-bîn, Ngá-kok ê hō͘-tāi sí-bô-liáu ê lâng bōe koh khì óa-khò kong-kek in ê lâng; in beh kian-tēng óa-khò Siōng Chú — Í-sek-lia̍t sîn-sèng ê Siōng-tè.

21Ngá-kok ê hō͘-tāi só͘ chhun ê lâng ōe tò-tńg-khì tōa koân-lêng ê Siōng-tè hia.

22Sui-jiân lí ê chú-bîn Í-sek-lia̍t chhin-chhiūⁿ hái-piⁿ ê soa hiah chōe, in tiong-kan chí-ū chhun kúi-ê-á ōe tńg--lâi. Húi-bia̍t ê sū í-keng koat-tēng, in-ūi Siōng Chú tōa-tōa si-hêng kong-gī.

23Án-ni, Chì-koân Siōng Chú — Bān-kun ê Thóng-sòe chiàu I só͘ koat-tēng, beh thiat-tóe húi-hoāi choân-tōe.

24Chì-koân Siōng Chú — Bān-kun ê Thóng-sòe khak-si̍t ū án-ni kóng, “Tòa tī Sek-an góa ê chú-bîn ah, sui-jiân A-su̍t ēng koáiⁿ kā lín phah, chhin-chhiūⁿ Ai-ki̍p ēng kùn kā lín kòng, lín m̄-bián kiaⁿ;

25in-ūi góa tùi lín ê siū-khì liâm-piⁿ ōe soah, góa ê siū-khì sī beh hō͘ A-su̍t bia̍t-bông.”

26Āu-lâi Siōng Chú — Bān-kun ê Thóng-sòe ōe gia̍h I ê piⁿ sut in, chhin-chhiūⁿ I tī Gô-li̍p ê chio̍h-pôaⁿ piⁿ-phah Bí-tiân. I beh chhun I ê koáiⁿ-á tī hái ê téng-bīn, chhin-chhiūⁿ I tī Ai-ki̍p ū án-ni chòe.

27Tī hit-ji̍t, A-su̍t hē ê tāng-tàⁿ beh tùi lín ê keng-thâu sóa-cháu, hē tī lín ām-kún ê taⁿ beh kòng-tn̄g.

28A-su̍t kong-chiàm Ai -siâⁿ, keng-kè Bí-ki-lûn, hē pó͘-kip-phín tī Bi̍t-boat.

29In keng-kè ài-kháu, tī Ka-pa kè-mî. La-má -lâng phi̍h-phi̍h-chhoah, Sò-lô kò͘-hiong ê Ki-pí-a -lâng tô-cháu.

30Ka-lîm ê chū-bîn ah, tio̍h tōa-siaⁿ hoah; Lâi-soah -lâng ah, tio̍h thiaⁿ; A-ná-tu̍t -lâng ah, tio̍h ìn-tap.

31Má-tek-bí-ná -lâng tô-cháu; Ki-pèng ê chū-bîn tô-miā.

32Hit-ji̍t, A-su̍t -ông ōe tī Ná-pek thêng-teh pâi-tīn; i beh tāng-chhiú kong-kek Sek-an-soaⁿ, chiū-sī Iâ-lō͘-sat-léng ê soaⁿ.

33Khòaⁿ leh, Chì-koân Siōng Chú — Bān-kun ê Thóng-sòe beh ēng thang-kiaⁿ ê le̍k-liōng chhò-tn̄g chhiū-ki; tōa-châng chhiū ōe siū chām-tn̄g, chho͘ koh ióng ê chhiū lóng ōe tó kah pîⁿ-pîⁿ-pîⁿ.

34I beh ēng pó͘-thâu chhò-pîⁿ chhiū-nâ, liân Lê-pa-lūn siōng-hó ê chhiū to tó-liáu-liáu.

← Chapter 9 Jump to: Chapter 11 →