Isaiah 2

Chinese TTVR (現代台語譯本羅馬字版)

← Chapter 1 Jump to: Chapter 3 →

1A-mô͘-su ê kiáⁿ Í-sài-a só͘ tit--tio̍h iú-koan Iû-tāi kap Iâ-lō͘-sat-léng ê sìn-sit.

2Tī chiong-lâi ê ji̍t-chí, Siōng Chú sèng-tiān ê soaⁿ ōe kian-li̍p tī chèng-soaⁿ ê téng-bīn, pí lóng-chóng ê soaⁿ-niá khah koân; bān-kok lóng ōe ek óa-lâi kui I.

3Bān-bîn ōe lâi, kóng, “Lán lâi chiūⁿ Siōng Chú ê soaⁿ, lâi-khì Ngá-kok ê Siōng-tè ê tiān. I ōe ēng I ê tō-lō͘ kà-sī lán, hō͘ lán thang kiâⁿ I ê lō͘.” Lu̍t-hoat ōe tùi Sek-an hoat-chhut; Siōng Chú ê ōe ōe tùi Iâ-lō͘-sat-léng thoân-khui.

4Siōng Chú ōe tī lia̍t-kok tiong si-hêng sím-phòaⁿ, tī bān-bîn tiong pâi-kái hun-cheng. In ōe chiong to phah-chòe lôe-thâu, chiong chhiuⁿ phah-chòe liâm-to. Chit-kok bōe koh gia̍h to kong-kek hit-kok, in mā bián koh o̍h chiàn-cheng.

5Ngá-kok ê hō͘-tāi ah, lâi! Lán tio̍h khò Siōng Chú ê kng lâi kiâⁿ.

6Siōng-tè ah, lí ū khì-sak lí ê chú-bîn Ngá-kok ê hō͘-tāi, in-ūi kok-lāi ta̍k só͘-chāi lóng ū tang-hng lâi ê hong-sio̍k, jîn-bîn chhin-chhiūⁿ Hui-lī-sū -lâng teh pok-kòa, koh thàn gōa-kok-lâng ê si̍p-koàn.

7Í-sek-lia̍t choân-kok kim gûn móa-móa sī; in ê châi-pó sǹg bōe liáu. In ê tōe chiàn-bé chin chōe; in ê chiàn-chhia bōe-tàng kè-sǹg.

8Choân-kok ta̍k só͘-chāi to ū ngó͘-siōng; in kūi-pài ka-kī ê chhiú só͘ chō--ê, pài ka-kī ê chńg-thâu-á lia̍p-chō ê sîn-bêng.

9Só͘-í, lâng siū khut-jio̍k, ta̍k-ê lâng pìⁿ-chòe pi-chiān. Siōng Chú ah, m̄-thang sià-bián in.

10Tio̍h bih ji̍p-khì chio̍h-tōng! Tio̍h chhàng ji̍p-khì thô͘-tóe! Siám-pī tùi Siōng Chú lâi ê khióng-pò͘, cháu-siám I ui-giâm ê kong-hui.

11Hit-ji̍t, ba̍k-thâu-koân ê lâng ōe siū kàng-kē, kiau-ngō͘ ê lâng ōe siū khut-jio̍k. Chí-ū Siōng Chú siū ko-kú tit-tio̍h chun-chông!

12Siōng Chú — Bān-kun ê Thóng-sòe ê ji̍t teh-beh lîm-kàu; I beh hō͘ só͘-ū kiau-ngō͘ chū-ko ê lâng pìⁿ pi-chiān, hō͘ ko-kú ka-kī ê lâng lóng siū bú-jio̍k.

13I beh hō͘ Lê-pa-lūn koân koh tōa ê pek-hiuⁿ-chhiū, Pa-san ê siōng-chhiū,

14só͘-ū ê koân-soaⁿ, it-chhè ê sió-soaⁿ,

15só͘-ū ê pó-lúi, it-chhè kian-kò͘ ê siâⁿ-chhiûⁿ,

16só͘-ū Tha-si ê chûn-chiah, it-chhè súi ê phâng-chûn, lóng siū kong-kek.

17Āu-lâi, chū-ko ê lâng ōe siū khut-jio̍k; kiau-ngō͘ ê lâng ōe siū kàng-kē. Tī hit-ji̍t, chí-ū Siōng Chú siū ko-kú tit-tio̍h chun-chông.

18Ngó͘-siōng ōe oân-choân siau-sit.

19Tī Siōng Chú khí-lâi hō͘ tōe tōa iô-tāng ê sî, lâng ōe bih ji̍p-khì chio̍h-tōng, chhàng ji̍p-khì thô͘-khang, beh siám-pī tùi Siōng Chú lâi ê khióng-pò͘, cháu-siám I ui-giâm ê kong-hui.

20Tī hit-ji̍t, lâng ōe chiong ēng kim gûn chō lâi pài ê ngó͘-siōng hiat-ka̍k hō͘ chhân-chhú kap bi̍t-pô.

21Tī Siōng Chú khí-lâi hō͘ tōe tōa iô-tāng ê sî, lâng ōe cháu ji̍p-khì chio̍h-tōng lāi, á-sī bih tī soaⁿ-piah phāng, beh siám-pī tùi Siōng Chú lâi ê khióng-pò͘, cháu-siám I ui-giâm ê kong-hui.

22M̄-thang óa-khò ōe-sí ê lâng; in put-kò khò phīⁿ-khang teh chhoán-khùi. In lóng bô sǹg sím-mi̍h.

← Chapter 1 Jump to: Chapter 3 →