Isaiah 64

Chinese TTVR (現代台語譯本羅馬字版)

← Chapter 63 Jump to: Chapter 65 →

1Lí ná m̄ thiah-li̍h thiⁿ kàng--lo̍h-lâi? Lí chi̍t-ē chhut-hiān chèng-soaⁿ chiū iô-tāng,

2chhin-chhiūⁿ hé tiám-to̍h ta-chhâ, chhin-chhiūⁿ hé kā chúi hiâⁿ-kún. Goān te̍k-jîn bat lí ê miâ, bān-kok tī lí ê bīn-chêng phi̍h-phi̍h-chhoah.

3Lí bat chòe goán liāu-sióng bōe kàu, thang kiaⁿ-ùi ê tāi-chì, hit-sî lí kàng-lîm, chèng-soaⁿ lóng iô-choah.

4Tùi kó͘-chá í-lâi, lâng m̄-bat thiaⁿ--kè, hī-khang m̄-bat thiaⁿ--tio̍h, ba̍k-chiu mā m̄-bat khòaⁿ-kìⁿ lí í-gōa ū Siōng-tè ōe-tàng ūi-tio̍h thèng-hāu I ê lâng chòe tāi-chì.

5Lí hoaⁿ-hí chiap-la̍p hêng-ûi chèng-ti̍t ê lâng, chiū-sī hiah-ê ōe-kì-tit lí, chun-thàn lí tō-lō͘ ê lâng. M̄-kú lí siū-khì, in-ūi goán hoān-chōe; chit-khoán chêng-hêng í-keng chin kú, goán ná ōe tit-kiù?

6Goán chhin-chhiūⁿ chi̍t ê bô chheng-khì ê lâng; goán it-chhè gī ê hêng-ûi chhin-chhiūⁿ chi̍t niá lah-sap saⁿ. Goán lóng chhin-chhiūⁿ chhiū-hio̍h lian--khì, goán ê chōe-kò chhin-chhiūⁿ hong kā goán chhe cháu.

7Bô lâng kiû-kiò lí ê miâ, bô lâng kā lí khiú-tiâu-tiâu; in-ūi lí bīn oa̍t-cháu m̄ khòaⁿ goán, chiong goán pàng hō͘ goán ê chōe koán-hat.

8M̄-kú, Siōng Chú ah, lí iû-goân sī goán ê Lāu-pē. Goán sī liâm-thô͘, lí sī sio-hûi sai-hū; goán lóng sī lí chhin-chhiú chō--ê.

9Siōng Chú ah, m̄-thang tùi goán hoat tōa siū-khì; m̄-thang éng-oán kì-tiâu goán ê chōe-kò. Khòaⁿ leh, goán lóng sī lí ê chú-bîn, kiû lí khòaⁿ-kò͘.

10Lí sèng ê siâⁿ-chhī í-keng pìⁿ-chòe khòng-iá; Sek-an í-keng pìⁿ-chòe hong-po͘; Iâ-lō͘-sat-léng í-keng hong-hòe.

11Goán sîn-sèng koh súi ê tiān, goán ê chó͘-sian chheng-chàn lí ê só͘-chāi, lóng hō͘ hé sio-liáu-liáu; goán him-bō͘ ê hó só͘-chāi lóng húi-hoāi lah.

12Siōng Chú ah, keng-kè chiah-ê tāi-chì, lí kiám iáu jím ōe tiâu? Lí kiám ōe tìⁿ-tiām-tiām, hō͘ goán siū tōa khó͘-lān?

← Chapter 63 Jump to: Chapter 65 →