Isaiah 58

Chinese TTVR (現代台語譯本羅馬字版)

← Chapter 57 Jump to: Chapter 59 →

1Tio̍h tōa-siaⁿ hoah! M̄-thang thêng-chí. Tio̍h chhut-la̍t hoah! Chhin-chhiūⁿ teh pûn sàu-kak. Tio̍h tùi góa ê chú-bîn soan-pò͘ in ê pōe-ge̍k! Tùi Ngá-kok ê hō͘-tāi soan-kò in ê chōe!

2In ta̍k-ji̍t teh chhē-kiû góa, ì-ài beh chai góa ê tō-lō͘, ná-chhin-chhiūⁿ sī péng-kong-hêng-gī ê kok-bîn, bô khì-sak in ê Siōng-tè ê bēng-lēng. In ū tùi góa kiû-mn̄g kong-gī ê sím-phòaⁿ, ná-chhin-chhiūⁿ hoaⁿ-hí chhin-kūn Siōng-tè.

3M̄-kú in mn̄g, “Goán kìm-chia̍h, lí ná bô koan-sim? Goán khek-khó͘, lí ná bô chù-ì?” Kî-si̍t, lín tī kìm-chia̍h ê ji̍t, iáu ūi-tio̍h ka-kī ê lī-ek, kiông-pek lín ê kang-lâng chòe khó͘-kang.

4Lín kìm-chia̍h, mā teh oan-ke cheng-tò͘, ēng hiong-béng ê kûn-thâu-bú cheng pa̍t-lâng. Lín kin-á-ji̍t án-ni teh kìm-chia̍h, kiám ōe hō͘ lín kî-tó ê siaⁿ thàu kàu thiⁿ-téng?

5Che kiám sī góa só͘ ài ê kìm-chia̍h? Lâng khek-khó͘ ka-kī ê ji̍t-chí kiám sī án-ni? Lín chhin-chhiūⁿ lô͘-úi thâu àⁿ-àⁿ, chhēng môa-saⁿ tó tī hé-hu, kiám kóng che chiū-sī kìm-chia̍h, sī Siōng Chú hoaⁿ-hí chiap-la̍p ê ji̍t?

6Kî-si̍t, góa só͘ ài ê kìm-chia̍h sī án-ni: Tháu-khui bô kong-chèng ê só-liān; chián-tn̄g pa̍k tāng-tàⁿ ê soh; tháu-pàng siū ap-pek--ê tit chū-iû; kòng-tn̄g it-chhè ê taⁿ.

7Góa só͘ ài--ê kiám m̄-sī lín kap iau-gō--ê hun-hióng chia̍h-mi̍h, chiap-thāi bû-ka-khó-kui ê sàn-chhiah-lâng khì lín tau, hō͘ chhiah-sin-lō͘-thé--ê ū saⁿ thang moa, bô siám-pī tùi chhin-lâng ê chek-jīm?

8Án-ni, lín ê kng ōe chhin-chhiūⁿ lê-bêng hoat-chhut ê kng, lín ōe chin kín tit-tio̍h i-tī, lín ê kong-gī ōe chòe sian-hong chhōa lín, Siōng Chú ê êng-kng ōe tī āu-bīn pó-hō͘ lín.

9Hit-sî, lín kiû-kiò, Siōng Chú it-tēng ìn-tap; lín tùi I kiû pang-chān, I ōe kóng: Góa tī chia. Lín nā chiong khi-ap lâng ê taⁿ sóa-khui, chiong chí-chek lâng ê chńg-thâu-á sóa-cháu, bô koh kóng lâng ê pháiⁿ-ōe;

10lín nā chiong chia̍h-mi̍h pun hō͘ iau-gō ê lâng, boán-chiok khùn-khó͘ ê lâng ê su-iàu; án-ni, lín ê kng ōe tī o͘-àm tiong hoat-chhut, àm-mî ōe chhin-chhiūⁿ ji̍t tiong-tàu.

11Siōng Chú ōe kè-sio̍k ín-chhōa lín, hō͘ lín tī khòng-hān ê só͘-chāi ta̍k-hāng lóng boán-chiok, hō͘ lín ê kut-thâu ióng-chòng. Lín ōe chhin-chhiūⁿ ū chúi koàn-ak ê hn̂g, chhin-chhiūⁿ ū chúi ti̍t-ti̍t-lâu ê chúi-chôaⁿ.

12Lín ōe tiông-kiàn chá chiū hong-hòe ê só͘-chāi, siu-kiàn kó͘-chá chiū ū ê tōe-ki. Lín ōe hō͘ lâng chheng-chòe “pó͘ phòa-khiah--ê”, hō͘ lâng kiò-chòe “siu-lí chhù hō͘ lâng khiā-khí--ê”.

13Lín nā bô phò-hoāi An-hioh-ji̍t, bô tī sèng ê ji̍t-chí tui-kiû lī-ek ka-kī ê sū; lín nā khòaⁿ An-hioh-ji̍t chòe thang hoaⁿ-hí ê ji̍t, chun-tiōng i chòe Siōng Chú ê sèng-ji̍t; lín nā chun-tiōng sèng-ji̍t, bô chòe ji̍t-siông ê kang-chok, bô chòe ka-kī hoaⁿ-hí ê sū, bô lām-sám kóng-ōe;

14án-ni, lín chiū ōe tùi Siōng Chú tit-tio̍h hí-lo̍k. Góa beh hō͘ lín tī tōe-chiūⁿ ta̍k só͘-chāi siū chun-tiōng, ēng lín chó͘-sian Ngá-kok lâu hō͘ lín ê sán-gia̍p iúⁿ-chhī lín. Siōng Chú chhin-chhùi án-ni soan-pò͘.

← Chapter 57 Jump to: Chapter 59 →