Isaiah 8

Chinese TTVR (現代台語譯本羅馬字版)

← Chapter 7 Jump to: Chapter 9 →

1Siōng Chú tùi góa kóng, “Lí the̍h chi̍t tè tōa tè pang, ēng thong-iōng ê jī siá: Má-he̍k-ní Sa-la-le̍k Hap-si Pā-su.

2Góa beh ēng khó-khò ê kiàn-chèng-jîn, chiū-sī chè-si O͘-lī-a kap Iâ-pí-lī-ka ê kiáⁿ Sat-ka-lī-a, ūi góa choh-chèng.”

3Góa kap góa ê hū-jîn-lâng lú-sian-ti tâng-pâng, i chiū hoâi-īn siⁿ chi̍t ê ta-po͘-kiáⁿ. Siōng Chú kā góa kóng, “Kā i hō-miâ kiò-chòe ‘ Má-he̍k-ní Sa-la-le̍k Hap-si Pā-su.’

4In-ūi gín-á ōe-hiáu kiò ‘A-pa’, ‘A-bú’ í-chêng, Tāi-má-sū-kek ê châi-hù kap Sat-má-lī-a tit--tio̍h ê chiàn-lī-phín lóng ōe hō͘ A-su̍t -ông chhiúⁿ--khì.”

5Siōng Chú koh tùi góa kóng,

6“Kì-jiân chit-ê chú-bîn kū-choa̍t Se-lô-a bān-bān-á lâu ê chúi, tian-tò khì pa-kiat Lī-sìn -ông kap Pí-ka -ông.

7Só͘-í, lí ê Chú beh chhōa A-su̍t -ông kap i hiong-béng ê tāi-kun, chhin-chhiūⁿ Iù-hoat-la-tí-hô kiông-béng ê chúi chhiong-kè hô-kau, móa-kè hô-hōaⁿ,

8lâu-ji̍p Iû-tāi, im kàu ām-kún, chō-sêng hoàn-lām.” Í-má-lōe-lī, Siōng-tè kap lán tông-chāi! I ê si̍t thí-khui, khàm-móa kui-phiàn thó͘-tōe.

9Lia̍t-kok ê jîn-bîn ah, chòe lín liân-ha̍p kiat chòe-tui; lín ōe thiat-tóe siū húi-bia̍t! Tùi iâu-oán ê só͘-chāi lâi--ê, tio̍h chù-ì thiaⁿ! Chòe lín pī-chiàn! Lín ōe thiat-tóe siū húi-bia̍t! Chòe lín pī-chiàn! Lín ōe thiat-tóe siū húi-bia̍t!

10Chòe lín khì kè-ōe, it-tēng lóng bô-chhái-kang! Chòe lín khì siūⁿ kè-chhek, it-tēng bōe sêng-kong! In-ūi Siōng-tè kap goán tông-chāi.

11Siōng Chú ēng tōa khùi-la̍t ê chhiú khan góa, kéng-kò góa m̄-thang tè chit-ê jîn-bîn ê kha-pō͘ kiâⁿ. I kóng,

12“Chit-ê jîn-bîn teh kóng ê im-bô͘, lín m̄-thang tè teh kóng. In teh kiaⁿ--ê, lín m̄-bián kiaⁿ, mā m̄-bián lún.

13Lín tio̍h chun-chông góa Siōng Chú — Bān-kun ê Thóng-sòe chòe sèng, góa chiah sī lín só͘ tio̍h kiaⁿ-ùi, tio̍h chhoah--ê.

14Góa ōe chiâⁿ-chòe sèng-só͘, mā ōe chòe hō͘ Í-sek-lia̍t nn̄g kok poa̍h-tó ê chio̍h, that-gāi ê tōa tè chio̍h, chòe Iâ-lō͘-sat-léng chū-bîn ê oa̍h-tauh kap lô-bāng.

15Chin chōe lâng ōe tī hit téng-bīn tak--tio̍h, poa̍h-tó, siū-siong; in ōe hō͘ lâng bāng--tio̍h, lia̍h--tio̍h.”

16Lín tio̍h kā lu̍t-hoat ê chheh kńg--khí-lâi, tī góa ha̍k-seng ê tiong-kan kā kà-sī hong--khí-lâi.

17Góa beh thèng-hāu Siōng Chú; I oa̍t-thâu bô khòaⁿ-kò͘ Ngá-kok ê hō͘-tāi, m̄-kú góa beh gióng-bōng I.

18Khòaⁿ leh, góa kap Siōng Chú siúⁿ-sù hō͘ góa ê kiáⁿ-jî, lóng sī I hō͘ Í-sek-lia̍t ê tiāu-thâu kap kì-hō; Siōng Chú sī tiàm tī Sek-an-soaⁿ ê Siōng Chú — Bān-kun ê Thóng-sòe.

19Nā ū lâng kā lín kóng, “Lín tio̍h khì mn̄g khan-bông--ê kap tâng-ki toh-thâu; in ki-ki-kiu̍h-kiu̍h, ēng lâng thiaⁿ-bô ê ōe liām-tang-liām-sai. Jîn-bîn kiám bōe-ēng-tit kiû-mn̄g in ê sîn-bêng, á-sī thòe oa̍h-lâng khì mn̄g sí--khì ê lâng?”

20Bōe-ēng--tit! Tio̍h chhéng-sī lu̍t-hoat kap kà-sī! Hiah-ê kóng-ōe bô chiàu lu̍t-hoat kap kà-sī ê lâng, in bōe-tàng khòaⁿ-tio̍h thiⁿ-kng.

21Lâng ōe tī ta̍k só͘-chāi liû-lōng, kan-khó͘, iau-gō; in bô thang chia̍h ê sî ōe khí siū-khì, chiù-chó͘ in ê ông kap in ê Siōng-tè. In gia̍h-thâu khòaⁿ thiⁿ,

22àⁿ-lo̍h khòaⁿ tōe, chí-ū khòaⁿ-tio̍h kan-khó͘, o͘-àm, khó͘-būn, koh siū kóaⁿ ji̍p-khì o͘-o͘-àm-àm lāi-bīn.

← Chapter 7 Jump to: Chapter 9 →