Isaiah 52

Chinese TTVR (現代台語譯本羅馬字版)

← Chapter 51 Jump to: Chapter 53 →

1Chhíⁿ--khí-lâi, tio̍h chhíⁿ--khí-lâi! Sek-an ah, tio̍h kian-kiông! Tio̍h chhēng súi ê i-ho̍k! Sèng-siâⁿ Iâ-lō͘-sat-léng ah, tùi taⁿ í-āu, bô siū kat-lé, bô chheng-khì--ê bōe koh ji̍p-khì lí lāi-bīn.

2Iâ-lō͘-sat-léng ah, chiong thô͘-hún pōaⁿ hiat-ka̍k! Khí--lâi, chē tī ông-ūi! Lín chiah-ê siū-lia̍h ê Sek-an ê chū-bîn ah, tháu-khui ām-kún ê só-liān!

3Siōng Chú án-ni kóng: Lín hō͘ lâng bōe--khì ê sî, bô siu-tio̍h kè-chîⁿ; siâng-khoán, lín tit-tio̍h chū-iû, mā m̄-bián hù sio̍k-kim.

4Chì-koân ê Siōng Chú koh kóng: Tāi-khí-seng, góa ê chú-bîn lo̍h-khì Ai-ki̍p kià-ku; āu-lâi, A-su̍t -lâng kā in khi-ap.

5Góa ê chú-bîn hō͘ lâng lia̍h-khì chòe hu-ló͘, bô siu-tio̍h kè-chîⁿ; koán-hat in ê lâng kā in hoah-lâi-hoah-khì, kui-ji̍t teh bú-jio̍k góa ê miâ. Taⁿ, góa beh chhái-chhú hêng-tōng.

6In-ūi án-ni, tī hit-ji̍t, góa ê chú-bîn it-tēng ōe bat góa ê miâ, koh chai teh kóng-ōe--ê sī góa Siōng Chú. Lín khòaⁿ, góa tī chia!

7Pôaⁿ-soaⁿ-kè-niá teh soan-kò hô-pêng, thoân hó siau-sit ê sù-chiá, in ê kha-jiah jōa-á-ni̍h súi! In soan-kò chín-kiù, tùi Sek-an kóng: Lí ê Siōng-tè choh-ông thóng-tī lah!

8Thiaⁿ! Lín ê siú-bōng-chiá teh chhut tōa-siaⁿ, chôe-siaⁿ hoaⁿ-hí chhiùⁿ-koa. In-ūi in beh chhin-ba̍k kiàn-chèng: Siōng Chú tò-tńg-lâi Sek-an lah!

9Hong-hòe ê Iâ-lō͘-sat-léng ah, tio̍h tōa-siaⁿ hoaⁿ-hí chhiùⁿ-koa; in-ūi Siōng Chú ū an-ùi I ê chú-bîn, I í-keng kiù-sio̍k Iâ-lō͘-sat-léng.

10Siōng Chú í-keng tī bān-kok ê gán-chêng hián-chhut I sîn-sèng ê khùi-la̍t; phó͘-thiⁿ-ē ê lâng lóng ōe khòaⁿ-kìⁿ lán ê Siōng-tè ê chín-kiù.

11Tio̍h lī-khui, tio̍h lī-khui! Tùi Pa-pí-lûn chhut--lâi! M̄-thang bak-tio̍h bô chheng-khì ê mi̍h. Lín chiah-ê kng Siōng Chú khì-khū ê lâng, tio̍h tùi Pa-pí-lûn chhut--lâi, tio̍h kiat-chēng ka-kī.

12M̄-kú lín m̄-bián kóaⁿ-kín, m̄-bián tio̍h-kip; lín m̄-sī teh tô-miā. Siōng Chú it-tēng ōe tī lín thâu-chêng chhōa-lō͘; Í-sek-lia̍t ê Siōng-tè it-tēng tī lín āu-bīn pó-hō͘.

13Siōng Chú kóng: Khòaⁿ leh, góa ê po̍k-jîn beh chòe--ê it-tēng ōe oân-sêng; i it-tēng ōe siū ko-kú tit-tio̍h êng-iāu, siū ko-seng kàu chì-koân.

14Chin chōe lâng khòaⁿ-tio̍h i, ōe kî-koài gông-ngia̍h; in-ūi i ê bīn-māu siū sún-siong, i ê gōa-piáu bô chhin-chhiūⁿ lâng ê khoán-sit.

15Án-ni, i ōe hō͘ bān-kok tio̍h-kiaⁿ, hō͘ lia̍t-ông ng-chhùi m̄-káⁿ kóng-ōe; kè-khì m̄-bat niá-siū ê lâng, ōe liáu-kái, m̄-bat thiaⁿ--kìⁿ ê lâng, ōe léng-ngō͘.

← Chapter 51 Jump to: Chapter 53 →