Isaiah 5

Chinese TTVR (現代台語譯本羅馬字版)

← Chapter 4 Jump to: Chapter 6 →

1Góa ūi-tio̍h góa só͘ chhin-ài--ê chhiùⁿ-koa, chhiùⁿ chi̍t siú iú-koan i ê phû-tô-hn̂g ê koa: Góa só͘ chhin-ài--ê ū chi̍t khu phû-tô-hn̂g tī chi̍t ê pûi-súi ê soaⁿ-thâu.

2I ku̍t thô͘, chiong chio̍h-thâu lóng khioh hiat-ka̍k, jiân-āu chèng chin chōe siōng-hó ê phû-tô-chhiū. I tī hn̂g-lāi chō chi̍t ê siú-bōng-tâi, koh ó͘ chi̍t ê ta̍h phû-tô ê khut-á. I kî-thāi ōe chhut-sán chin chōe hó ê phû-tô, m̄-kú só͘ kiat--ê lóng sī bái--ê.

3Taⁿ, Iâ-lō͘-sat-léng ê chū-bîn kap Iû-tāi -lâng ah, chhiáⁿ lín tī góa kap góa ê phû-tô-hn̂g tiong-kan chú-chhî kong-tō.

4Góa tio̍h koh ūi-tio̍h góa ê phû-tô-hn̂g chòe sím-mi̍h? Kiám ū sím-mi̍h góa iáu chòe bô-kàu? Góa kî-thāi chhut-sán hó phû-tô, sī-án-chóaⁿ só͘ kiat--ê lóng sī bái--ê?

5Taⁿ, góa kā lín kóng, góa beh án-chóaⁿ chhú-lí góa ê phû-tô-hn̂g. Góa beh chiong hn̂g ê lî-pa thiah--khí-lâi, hō͘ i siū phò-hoāi. Góa beh thiah-húi hn̂g ê ûi-chhiûⁿ, hō͘ i siū thún-ta̍h.

6Góa bô beh koh siu-chián, bô beh koh thóaⁿ-chháu, beh hō͘ hn̂g hong-hòe, hō͘ chhì-á cha̍p-chháu hoat kah móa-sì-kòe; góa mā beh bēng-lēng hûn bô lo̍h-hō͘ tī hia.

7Siōng Chú — Bān-kun ê Thóng-sòe ê phû-tô-hn̂g chiū-sī Í-sek-lia̍t -ke; I sòe-jī chai-chèng ê phû-tô-chhiū sī Iû-tāi ê jîn-bîn. I só͘ kî-thāi--ê sī kong-pêng, m̄-kú só͘ khòaⁿ--tio̍h-ê sī thâi-lâng lâu-huih; I só͘ ǹg-bāng ê sī kong-gī, m̄-kú chí-ū thiaⁿ-tio̍h lâng hoah oan-óng.

8Chhám ah, lín chiah-ê lâng, lín ê chhù chi̍t-keng koh chi̍t-keng, thó͘-tōe chi̍t-tè koh chi̍t-tè; lín chiàm kah pa̍t-lâng soah bô ūi thang khiā, kéng-lāi chhun lín teh tòa.

9Góa ū thiaⁿ-kìⁿ Siōng Chú — Bān-kun ê Thóng-sòe án-ni kóng: It-tēng ū chin chōe tōa keng chhù ōe hong-hòe, chin chōe khoah koh súi ê chhù-the̍h bô lâng khiā-khí.

10Nn̄g kah ê phû-tô-hn̂g chiah seng-sán jī-cha̍p kong-seng ê chiú; iā cha̍p láng ê chéng-chí siu bô kah chi̍t láng be̍h-á.

11Chhám ah, hiah-ê tùi thàu-chá chiū teh jip kāu-chiú lim ê lâng! In lim-chiú lim kàu pòaⁿ-mî, lim kah chùi-bâng-bâng hoat-kông.

12In tī iàn-se̍k tôaⁿ-khîm, tôaⁿ-sek, phah-kó͘, pûn phín-á, lim-chiú, m̄-kú bô teh siūⁿ Siōng Chú ê kè-ōe, m̄-bat chù-ì Siōng Chú ê chok-ûi.

13In-ūi góa ê chú-bîn bōe-hiáu siūⁿ, in ōe siū hòng-tio̍k chòe hu-ló͘; in tiong-kan ū tōe-ūi ê lâng ōe iau kah teh-beh sí, in ê kûn-chiòng mā ōe chhùi-ta kah beh sí.

14Só͘-í, Im-hú ūi-kháu tōa khui, bû-hān-liōng khui tōa-chhùi beh thun-chia̍h; tī in tiong-kan teh iàn-lo̍k ê kùi-cho̍k, chháu-nāu ê pêng-bîn, lóng chòe-chi̍t-ē hō͘ i thun--lo̍h-khì.

15Lâng siū khut-jio̍k, sè-kan-lâng siū kàng-kē, ba̍k-thâu-koân ê lâng kàng-chòe pi-bî.

16M̄-kú, Siōng Chú — Bān-kun ê Thóng-sòe in-ūi kong-pêng siū ko-kú; Chì-sèng ê Siōng-tè in-ūi kong-gī hián-bêng ka-kī sī sèng.

17Iûⁿ-á ōe ná-chún tī ka-kī ê bo̍k-tiûⁿ teh chia̍h-chháu; sòe-chiah iûⁿ-á ōe tī hó-gia̍h-lâng pha-hng--khì ê thó͘-tōe chhē-chia̍h.

18Chhám ah, hiah-ê ēng khi-chà chòe soh khiú chōe-kò, ēng thoa-chhia ê soh thoa chōe-ok ê lâng!

19In kóng, “Siōng Chú tio̍h kóaⁿ-kín, khah kín oân-sêng I ê kang-chok, hō͘ goán ōe-tàng khòaⁿ--tio̍h. Í-sek-lia̍t sîn-sèng ê Siōng-tè tio̍h kóaⁿ-kín si̍t-hêng I ê kè-ōe, hō͘ goán ōe-tàng chai-iáⁿ.”

20Chhám ah, hiah-ê kā siān kóng-chòe ok, kā ok kóng-chòe siān ê lâng! In ēng àm chòe kng, ēng kng chòe àm; in ēng khó͘ chòe tiⁿ, ēng tiⁿ chòe khó͘.

21Chhám ah, hiah-ê siūⁿ-kóng ka-kī ū tì-hūi, ka-kī chin khiáu ê lâng!

22Chhám ah, hiah-ê lim-chiú tián eng-hiông, tiâu-chiú piàⁿ thâu-miâ ê lâng!

23In siu hóe-lō͘ phòaⁿ ū-chōe--ê chòe bô-chōe, pak-siah bû-ko͘ ê lâng eng-kai ū ê koân-ek.

24Só͘-í, in ōe chhin-chhiūⁿ be̍h-kó hō͘ hé-chi̍h thun-chia̍h, chhin-chhiūⁿ ta-chháu hō͘ hé sio-liáu-liáu; in ê kun ōe nōa--khì, in ê hoe ná tîn-ai hō͘ hong chhe-sòaⁿ; in-ūi in kū-choa̍t Siōng Chú — Bān-kun ê Thóng-sòe ê lu̍t-hoat, bû-sī Í-sek-lia̍t sîn-sèng ê Siōng-tè ê ōe.

25Só͘-í, Siōng Chú tùi I ê chú-bîn hoat siū-khì; I chhun-chhut I ê chhiú tùi-hù in, phah in; in-ūi án-ni, chèng-soaⁿ iô-choah, koe-thâu-hāng-bé sin-si ná pùn-sò tàn kah móa-sì-kòe. Sui-jiân sī án-ni, I ê siū-khì iáu-bē soah; I ê chhiú iáu chhun-tn̂g-tn̂g beh chhú-hoa̍t in.

26Siōng Chú chhāi tōa-kî chòe sìn-hō, tiàu chin hn̄g ê kok-ka lâi; I chhut hō-lēng kiò lâng tùi thiⁿ-piⁿ-hái-kak lâi. Khòaⁿ leh, in chin kín chiū lâi!

27Lâi ê lâng bô ià-siān--ê, bô poa̍h-tó--ê, bô tuh-ku--ê, bô ài-khùn--ê; ta̍k-ê io-tòa lóng hâ hó-sè, bô chi̍t ê ôe-tòa tn̄g--khì.

28In ê chìⁿ bôa-lāi-lāi, keng lóng tiuⁿ-ân-ân; in ê chiàn-bé ê tôe chhin-chhiūⁿ tēng ê chio̍h, chiàn-chhia ê lián chhin-chhiūⁿ kńg-lê-á-hong.

29In âu-kiò chhin-chhiūⁿ sai teh háu, âu-kiò chhin-chhiūⁿ siàu-chòng ê sai teh háu. In kā-tio̍h la̍h-bu̍t hm̄-hm̄-háu, chiong la̍h-bu̍t thoa lī-khui, bô lâng ōe-tàng kā i kiù--chhut-lâi.

30Tī hit-ji̍t, in ōe tùi Í-sek-lia̍t hm̄-hm̄-háu, chhin-chhiūⁿ tōa-hái hōa-hōa-háu. Lâng nā khòaⁿ chit-ê kok-ka, chí-ū khòaⁿ-tio̍h o͘-àm kap chai-lān; ba̍t-hûn jia-khàm, kng-bêng lóng pìⁿ o͘-àm.

← Chapter 4 Jump to: Chapter 6 →