Isaiah 7

Chinese TTVR (現代台語譯本羅馬字版)

← Chapter 6 Jump to: Chapter 8 →

1O͘-se-a ê sun, Iok-thán ê kiáⁿ, A-hap-su chòe Iû-tāi -ông ê sî, Sū-lī-a -ông Lī-sìn kap Lī-má-lī ê kiáⁿ Í-sek-lia̍t -ông Pí-ka chìn-kun kong-kek Iâ-lō͘-sat-léng, m̄-kú kong bōe phòa.

2Ū lâng kā Tāi-pi̍t -ke kóng, Sū-lī-a kap Í-hoat-liân liân-bêng; A-hap-su ê sim kap jîn-bîn ê sim lóng kiaⁿ-hiâⁿ phi̍h-phi̍h-chhoah, chhin-chhiūⁿ chhiū-nâ lāi ê chhiū hō͘ tōa-hong chhe tín-tāng.

3Siōng Chú tùi Í-sài-a kóng, “Lí kap lí ê kiáⁿ Si-a-ngá-su̍t chhut-khì gêng-chiap A-hap-su, tī Siōng-tî ê chúi-kau-kháu, thàng kàu Phiò-pò͘-tiûⁿ ê tōa-lō͘ kìⁿ i,

4kā i kóng, ‘Tio̍h kín-sīn, tio̍h tìn-chēng, m̄-bián kiaⁿ. M̄-thang ūi-tio̍h chit nn̄g ki teh chhèng-ian ê hé-pé, chiū-sī teh tōa hoat siū-khì ê Lī-sìn kap in Sū-lī-a -lâng, í-ki̍p Lī-má-lī ê kiáⁿ, lâi kiaⁿ-hiâⁿ sit-táⁿ.

5In-ūi Sū-lī-a kap Í-hoat-liân, í-ki̍p Lī-má-lī ê kiáⁿ kè-bô͘ kong-kek lí, kóng:

6Goán beh chiūⁿ-khì kong-kek Iû-tāi, chhim-chiàm, cheng-ho̍k i; goán beh siat-li̍p Tha-pí-le̍k ê kiáⁿ choh-ông.

7Só͘-í, Chì-koân ê Siōng Chú án-ni kóng: Chit-ê tāi-chì bōe sêng-kong, it-tēng bōe si̍t-hiān,

8in-ūi Sū-lī-a ê siú-to͘ sī Tāi-má-sū-kek, Tāi-má-sū-kek ê siú-léng sī Lī-sìn; Í-hoat-liân ê siú-to͘ sī Sat-má-lī-a, Sat-má-lī-a ê siú-léng sī Lī-má-lī ê kiáⁿ. (La̍k-cha̍p-gō͘ nî lāi Í-hoat-liân it-tēng bia̍t-bông.) Lín ê sìn-sim nā bô chāi, lín choa̍t-tùi khiā bōe ún.’”

10Siōng Chú koh tùi A-hap-su kóng,

11“Tio̍h tùi Siōng Chú — lí ê Siōng-tè kiû chi̍t ê kì-hō, bô-lūn tùi siōng-kē ê Chhim-ian á-sī siōng-koân ê thiⁿ-téng lâi”.

12M̄-kú A-hap-su hôe-tap, “M̄, góa m̄ kiû, góa bô beh chhì-thàm Siōng Chú.”

13Sian-ti chiū kóng, “ Tāi-pi̍t -ke ah, tio̍h thiaⁿ! Lín hō͘ lâng iàm-ò͘ⁿ, kiám sǹg sió-khóa sū? Lín kiám mā beh hō͘ góa ê Siōng-tè iàm-ò͘ⁿ?

14In-ūi án-ni, Chú beh chhin-chū hō͘ lín chi̍t ê kì-hō: Khòaⁿ leh, ū chi̍t ê siàu-liân lú-chú ōe hoâi-īn siⁿ-kiáⁿ; i beh kiò-chòe ‘Í-má-lōe-lī’.

15Kàu i o̍h ōe-hiáu kū-choa̍t ok, soán-te̍k siān ê sî, i beh ū chhì-jù kap phang-bi̍t thang chia̍h.

16In-ūi chit-ê gín-á ōe-hiáu kū-choa̍t ok, soán-te̍k siān í-chêng, lín só͘ teh kiaⁿ hit nn̄g ê ông ê kok-thó͘ lóng ōe thiat-tóe hong-hòe.

17Siōng Chú ōe hō͘ A-su̍t -ông tòa--lâi ê hoān-lān lîm-kàu lí, lí ê jîn-bîn, kap lín lāu-pē ê ke; che sī Í-hoat-liân tùi Iû-tāi hun-lia̍t í-lâi m̄-bat ū ê hoān-lān!

18“Tī hit-ji̍t Siōng Chú ōe hoat-lēng, tùi Nî-lô-hô ê goân-thâu tiàu-chi̍p hô͘-sîn, koh tùi A-su̍t -tōe tiàu-chi̍p bi̍t-phang lâi.

19In lóng ōe pe-lâi hioh tī kiā ê soaⁿ-kok, chio̍h-piah phāng, í-ki̍p it-chhè ê chhì-phè kap chháu-po͘.

20“Hit-sî, A-su̍t -ông chhin-chhiūⁿ Chú tùi Iù-hoat-la-tí-hô tùi-hōaⁿ cho͘--lâi ê thì-thâu-to, Chú beh ēng i kā lín ê thâu-mn̂g kap kha-mn̂g, sīm-chì lín ê chhùi-chhiu lóng thì-tiāu.

21“Hit-sî, chi̍t ê lâng ōe chhī chi̍t chiah bú ê gû-á, nn̄g chiah bú ê mî-iûⁿ;

22in-ūi ū chhiong-chiok ê lin, kok-lāi só͘-ū chhun--lo̍h-lâi ê lâng lóng ōe-tàng chia̍h chhì-jù kap phang-bi̍t.

23“Hit-sî, chèng chi̍t-chheng châng phû-tô, ta̍t gûn chi̍t-chheng ê só͘-chāi, lóng ōe hoat chhì-phè cha̍p-chháu.

24Lâng tio̍h tòa chìⁿ kap keng chiah káⁿ khì hia; in-ūi só͘-ū ê thó͘-tōe lóng hō͘ chhì-phè cha̍p-chháu khàm-móa.

25Só͘-ū ēng tî-thâu chèng-choh--kè ê soaⁿ-tōe, in-ūi ū cha̍p-chháu chhì-phè, lâng m̄-káⁿ koh khì, pìⁿ-chòe pàng gû khì chia̍h-chháu, chhut-chāi iûⁿ thún-ta̍h ê só͘-chāi.”

← Chapter 6 Jump to: Chapter 8 →