Isaiah 9

Chinese TTVR (現代台語譯本羅馬字版)

← Chapter 8 Jump to: Chapter 10 →

1Chóng-sī hit-ê bat siū-kè thòng-khó͘ ê tōe bōe koh-chài ū o͘-àm. Í-chêng, Se-pò͘-lûn ê tōe kap Ná-hut-tha-lī ê tōe siū khòaⁿ-khin, m̄-kú chiong-lâi chit-ê tōe-khu, iân Tōe-tiong-hái ê lō͘, kàu Iok-tàn-hô gōa, sīm-chì kàu gōa-cho̍k ê Ka-lī-lī, lóng ōe tit-tio̍h êng-kng.

2Kiâⁿ tī o͘-àm tiong ê lâng í-keng khòaⁿ-kìⁿ tōa-kng; seng-oa̍h tī sí-ìm ê tōe ê lâng ū kng teh chiò in.

3Lí hō͘ in ê kok-ka kiông-sēng, hō͘ in tōa hoaⁿ-hí. In tī lí ê bīn-chêng hoaⁿ-hí khoài-lo̍k, chhin-chhiūⁿ teh siu-koah ê hoaⁿ-hí, chhin-chhiūⁿ teh pun chiàn-lī-phín ê khoài-lo̍k.

4In-ūi lí ū phah-chhùi in teh pē ê taⁿ, kòng-tn̄g in keng-thâu téng ê kùn, at-chi̍h ap-pek-chiá ê piⁿ, chhin-chhiūⁿ lí húi-bia̍t Bí-tiân ê kun-tūi hit-ji̍t.

5Chiàn-sū tī kau-chiàn tiong chhēng ê kun-ôe, kō-tio̍h huih ê kun-ho̍k, lóng ōe chòe chhâ sio.

6In-ūi ū chi̍t ê eⁿ-á í-keng ūi-tio̍h lán chhut-sì, ū chi̍t ê kiáⁿ sù hō͘ lán. I beh hū-tam kok-chèng; I ê miâ beh chheng-chòe: Hiân-bêng ê Tō-su, Choân-lêng ê Siōng-tè, Éng-chāi ê Thiⁿ-pē, Hô-pêng ê Kun-ông.

7I ê chú-koân bû-kiông; I ê hô-pêng bû-chīn. I beh chē Tāi-pi̍t ê pó-chō, kè-sêng i ê ông-kok. I beh ēng kong-pêng chèng-gī hō͘ kok ún-kò͘ kian-li̍p, tùi chit-sî ti̍t-kàu éng-oán. Siōng Chú — Bān-kun ê Thóng-sòe ê jia̍t-sêng it-tēng ōe sêng-choân chit-ê sū.

8Chú ū soan-kò beh kong-kek Í-sek-lia̍t ông-kok; chit-ê sím-phòaⁿ beh kàng-lo̍h tī Ngá-kok ê hō͘-tāi.

9Só͘-ū Í-hoat-liân ê jîn-bîn kap Sat-má-lī-a ê chū-bîn lóng chai, m̄-kú in iáu chū-ko kiau-ngō͘, kóng,

10“Chng-á-chhù í-keng tó--lo̍h-khì, goán beh ēng phah-hó ê chio̍h têng-khí. Sng-châi-chhiū í-keng hō͘ lâng chhò-liáu, goán ōe ēng pek-hiuⁿ-chhiū tāi-thòe.”

11Só͘-í Siōng Chú kek in ê te̍k-jîn Lī-sìn -ông khí-lâi kong-kek Í-sek-lia̍t.

12Tang ū Sū-lī-a -lâng, sai ū Hui-lī-sū -lâng, in lóng khui tōa-chhùi beh thun-chia̍h Í-sek-lia̍t. Sui-jiân sī án-ni, Siōng Chú ê siū-khì iáu-bē soah; I ê chhiú iáu chhun-tn̂g-tn̂g beh chhú-hoa̍t in.

13M̄-kú, jîn-bîn bô hóe-kái kui-ǹg phah in ê Siōng Chú, mā bô chhē-kiû Siōng Chú — Bān-kun ê Thóng-sòe.

14Só͘-í, Siōng Chú beh chiong Í-sek-lia̍t ê thâu kap bé-liu — chang-chhiū-ki kap lô͘-úi — tī chi̍t ji̍t lāi lóng chām-tn̄g.

15Tiúⁿ-ló kap ū tōe-ūi ê lâng chiū-sī thâu; ēng pe̍h-chha̍t kà lâng ê sian-ti sī bé-liu.

16Chiah-ê léng-siù chhōa chit-ê chú-bîn kiâⁿ m̄-tio̍h ê lō͘; hō͘ in chhōa ê lâng lóng siū thun-bia̍t.

17Só͘-í, Chú bô beh lîn-bín in ê siàu-liân-lâng, mā bô beh thiàⁿ-sioh in ê ko͘-jî kóaⁿ-hū; in-ūi só͘-ū ê lâng lóng bû-hoat-bû-thian, ta̍k-ê chhùi kóng ê ōe lóng sī siâ-ok. Sui-jiân sī án-ni, Siōng Chú ê siū-khì iáu-bē soah; I ê chhiú iáu chhun-tn̂g-tn̂g beh chhú-hoa̍t in.

18Siâ-ok chhin-chhiūⁿ hé teh sio, thun-bia̍t chhì-phè iá-chháu; hé tī ām-ām ê chhiū-nâ teh to̍h, hé-hun ná hûn-thiāu ti̍t-ti̍t chhèng-koân.

19In-ūi Siōng Chú — Bān-kun ê Thóng-sòe ê tōa siū-khì, thó͘-tōe sio kah ta-ta-ta; jîn-bîn lóng chhin-chhiūⁿ thun-bia̍t lâng ê hé, kā ka-kī ê hiaⁿ-tī sio kah chhun bô pòaⁿ-ê.

20Jîn-bîn chiàⁿ-pêng chhiúⁿ, iáu-teh iau, tò-pêng thun-chia̍h, iáu chia̍h bōe pá; ta̍k-ê lâng lóng chia̍h ka-kī kiáⁿ-jî ê bah.

21Má-ná-se thun Í-hoat-liân, Í-hoat-liân chia̍h Má-ná-se; in liân-ha̍p kong-kek Iû-tāi. Sui-jiân sī án-ni, Siōng Chú ê siū-khì iáu-bē soah; I ê chhiú iáu chhun-tn̂g-tn̂g beh chhú-hoa̍t in.

← Chapter 8 Jump to: Chapter 10 →