Isaiah 60

Chinese TTVR (現代台語譯本羅馬字版)

← Chapter 59 Jump to: Chapter 61 →

1Khí--lâi! Hoat-kng! Lí ê kng í-keng lâi kàu! Siōng Chú ê êng-kng í-keng teh chiò lí!

2Khòaⁿ leh, sui-jiân o͘-àm tà-móa tāi-tōe, tōa o͘-àm jia-khàm bān-bîn, m̄-kú Siōng Chú ōe kā lí chiò-kng, I ê êng-kng ōe tī lí sin-chiūⁿ hián-bêng.

3Bān-kok ōe lâi chiū-kūn lí ê kng, lia̍t-ông lâi chhin-kūn lí hoat-chhut ê kong-hui.

4Tio̍h gia̍h-thâu sì-hng koan-khòaⁿ: Lí ê chú-bîn chū-chi̍p lâi kàu lí chia; lí ê kiáⁿ tùi hn̄g-hn̄g tńg--lâi, lí ê cha-bó͘-kiáⁿ ná gín-á hō͘ lâng phō--lâi.

5Hit-sî lí khòaⁿ-tio̍h chiah-ê, chiū chin kong-chhái; sim kek-tōng chin hoaⁿ-hí. Tùi hái ūn--lâi ê châi-hù ōe piàⁿ hō͘ lí; bān-kok ê châi-pó lóng pìⁿ lí ê.

6Kui tōa-tīn ê lo̍k-tô, Bí-tiân kap Í-hoat ê tan-hong lo̍k-tô lóng ōe lâi, tùi Sī-pa lâi--ê mā ōe tòa n̂g-kim kap jú-hiuⁿ; in lóng ōe siōng-chàn soan-iông Siōng Chú.

7Só͘-ū Ki-ta̍t ê iûⁿ-kûn lóng ōe chū-chi̍p khì lí hia, só͘-ū Nî-pài-iok ê mî-iûⁿ-káng ōe chòe lí ê lō͘-ēng; chiah-ê lóng ōe hiàn tī chè-tôaⁿ, chiâⁿ-chòe góa hoaⁿ-hí chiap-la̍p ê chè-mi̍h. Góa Siōng Chú ōe hō͘ góa ê tiān ê êng-iāu koh-khah hui-hông.

8Hiah-ê chhin-chhiūⁿ kui-phìⁿ hûn pe--lâi, chhin-chhiūⁿ hún-chiáu pe tńg-lâi siū--ni̍h-ê sī siáⁿ-lâng?

9In sī tùi hn̄g-hn̄g ê hái-tó chū-chi̍p ê chûn-tūi; Tha-si ê chûn chòe thâu, chhōa lí ê kiáⁿ-jî tùi chin hn̄g ê só͘-chāi tòa kim tòa gûn lâi, lóng sī ūi-tio̍h Siōng Chú — lí ê Siōng-tè, Í-sek-lia̍t sîn-sèng ê Siōng-tè ê miâ. In-ūi I í-keng ū hō͘ lí tit-tio̍h êng-iāu.

10Siōng Chú tùi Iâ-lō͘-sat-léng kóng, “Gōa-kok-lâng ōe tiông-kiàn lí ê siâⁿ-chhiûⁿ, in ê kun-ông ōe ho̍k-sāi lí. Góa bat tī siū-khì tiong hêng-hoa̍t lí, m̄-kú taⁿ beh si-un lîn-bín lí.

11Lí ê siâⁿ-mn̂g lóng ōe put-sî khui-khui, ji̍t--sî mî--sî mn̂g lóng bōe koaiⁿ; án-ni, lia̍t-pang ōe tòa in ê châi-bu̍t lâi, in ê kun-ông chhōa-tūi, pâi-lia̍t chìn-kòng.

12M̄-khéng ho̍k-sāi lí ê lia̍t-pang kap ông-kok lóng ōe bia̍t-bông; hiah-ê pang-kok lóng ōe thiat-tóe hong-hòe.

13“ Lê-pa-lūn ê êng-kng, chiū-sī siông-chhiū, sam-chhiū, n̂g-iông-chhiū, lóng ōe ūn-lâi Iâ-lō͘-sat-léng, chong-sek bí-hòa góa ê sèng-só͘; góa mā beh hō͘ góa kha ta̍h ê só͘-chāi tit-tio̍h êng-kng.

14Ap-pek lí hiah-ê lâng ê hō͘-tāi lóng ōe lâi kiâⁿ-lé piáu kèng-ì; só͘-ū biáu-sī lí ê lâng ōe lâi tī lí ê kha-ē kūi-pài. In beh chheng lí chòe ‘Siōng Chú ê Siâⁿ’, ‘ Í-sek-lia̍t sîn-sèng ê Siōng-tè ê Sek-an ’.

15“Sui-jiân lí bat siū khì-sak, siū iàm-ò͘ⁿ, bô lâng tùi lí hia keng-kè, góa beh hō͘ lí ū éng-oán ê êng-hôa, ū sè-sè-tāi-tāi ê hoaⁿ-hí!

16Lí beh suh lia̍t-kok ê lin, beh lim kun-ông ê lin; lí chiū chai góa Siōng Chú sī lí ê Kiù-chú, lí ê Kiù-sio̍k-chú, Í-sek-lia̍t ê Tāi-lêng-chiá.

17“Góa beh the̍h kim tāi-thòe tâng, the̍h gûn tāi-thòe thih; beh ēng tâng tāi-thòe chhâ, ēng thih tāi-thòe chio̍h-thâu. Góa beh siat-li̍p Hô-pêng chòe lí ê koaⁿ-tiúⁿ, chí-phài Kong-gī chòe lí ê kam-tok.

18Tī lí ê thó͘-tōe bōe koh thiaⁿ-kìⁿ kiông-pō, lí ê kéng-lāi bōe koh ū húi-bia̍t hong-hòe. Lí beh chheng lí ê chhiûⁿ chòe ‘Chín-kiù’, kiò lí ê mn̂g chòe ‘Chàn-bí’.

19“Ji̍t--sî lí bô koh su-iàu ji̍t-thâu ê kng, àm-sî mā bô su-iàu ge̍h-niû ê kng chiò; in-ūi góa Siōng Chú beh chòe lí éng-oán ê kng; lí ê Siōng-tè sī lí ê êng-kng.

20Lí ê ji̍t-thâu bōe koh lo̍h-soaⁿ, lí ê ge̍h-niû bōe bih--khí-lâi. Siōng Chú beh chòe lí éng-oán ê kng; lí pi-siong ê ji̍t-chí ōe soah.

21Lí ê jîn-bîn lóng ōe péng-kong-hêng-gī; in ōe éng-oán kè-sêng èng-ún ê thó͘-tōe. In sī góa chhin-chhiú só͘ chèng só͘ chō, hō͘ góa thang tit-tio̍h êng-kng.

22Siōng-sòe--ê ōe pìⁿ-chòe tōa chong-cho̍k; siōng-jio̍k--ê ōe pìⁿ-chòe kiông-kok. Góa sī Siōng Chú, tī sî-ki sêng-se̍k ê sî góa ōe chin kín chhiok-sêng chit-ê sū.”

← Chapter 59 Jump to: Chapter 61 →