Isaiah 34

Chinese TTVR (現代台語譯本羅馬字版)

← Chapter 33 Jump to: Chapter 35 →

1Lia̍t-kok ah, óa-lâi thiaⁿ! Bān-bîn ah, chù-ì thiaⁿ! Choân-tōe kap tōe-chiūⁿ ê bān-mi̍h, sè-kài kap tòa tī hit lāi-bīn--ê, lóng tio̍h thiaⁿ!

2In-ūi Siōng Chú tùi bān-kok hoat siū-khì, tùi bān-kun hoat tōa siū-khì. I beh kā in siau-bia̍t, hō͘ in chhut-chāi lâng thâi.

3Siū thâi-sí--ê ōe hō͘ lâng hìⁿ-sak; sin-si ê chhàu-bī chhèng-koân. Chèng-soaⁿ ōe in-ūi in ê huih hoán âng.

4Thiⁿ-téng ê bān-siōng ōe siau-sit; thiⁿ ōe chhin-chhiūⁿ chheh kńg--khí-lâi. Thiⁿ-téng ê chhiⁿ-sîn ōe lak--lo̍h-lâi, chhin-chhiūⁿ phû-tô-chhiū-hio̍h lian--khì, chhin-chhiūⁿ bû-hoa-kó-chhiū ta--khì.

5Góa ê kiàm í-keng tī thiⁿ-téng chhut-hiān. Khòaⁿ leh, chit-ki kiàm beh kàng-lo̍h tī Í-tong, lîm-kàu hiah-ê góa phòaⁿ-chòe eng-kai bia̍t-bông ê jîn-bîn.

6Siōng Chú ê kiàm kui-ki lóng huih kap iû, chiū-sī iûⁿ-ko kap soaⁿ-iûⁿ ê huih, í-ki̍p iûⁿ-káng io-chí ê iû. In-ūi tī Pho-su-la ū chè-mi̍h beh hiàn hō͘ Siōng Chú, tī Í-tong ū tōa tô͘-sat.

7Iá-gû ōe kap in chòe-hé siū thâi, gû-á-kiáⁿ kap gû-káng mā ōe án-ni. In ê thó͘-tōe ōe hō͘ huih bak âng; in ê thô͘ kui-ê lóng iû.

8In-ūi Siōng Chú ū pò-siû ê ji̍t, ūi-tio̍h Sek-an ê àn-kiāⁿ ū sin-oan ê nî.

9Í-tong ê khoe-chúi lóng pìⁿ táⁿ-má-ka, thô͘ pìⁿ-chòe liû-hông, thó͘-tōe pìⁿ-chòe teh sio ê táⁿ-má-ka.

10Mî-ji̍t hé lóng bōe sit, hé-ian éng-oán teh chhèng. Thó͘-tōe ōe tāi-tāi pha-hng, éng-oán bô lâng tùi hia keng-kè.

11M̄-kú thê-ô͘ kap hô-ti ōe chiàm hia, niau-thâu-chiáu kap o͘-a ōe tī hia choh-siū. Siōng Chú beh ēng hūn-tūn chòe chîn-sòaⁿ kā i niû, ēng khang-hu chòe tūi-chîn kā i chhek.

12In ê ông-kok ōe bia̍t-bông; in ê kùi-cho̍k kap koaⁿ-tiúⁿ ōe lóng siau-sit.

13Kiong-tiān ōe hoat chhì-phè, chi̍t-lê kap cha̍p-chháu ōe khàm-móa iàu-sài; hia ōe chiâⁿ-chòe chhâi-lông tòa ê só͘-chāi, tô-chiáu tī hia choh-siū.

14Khòng-iá ê cháu-siù kap chhâi-lông ōe tòa tī hia, iá-soaⁿ-iûⁿ ōe kap i ê tâng-phōaⁿ saⁿ tùi-kiò; iā-kan ê kúi-koài ōe tī hia hioh-khùn, tī hia chhē-tio̍h an-hioh ê só͘-chāi.

15Tī hia ū chìⁿ-thâu-chôa choh-siū, siⁿ-nn̄g, pū chôa-kiáⁿ, chiàu-kò͘ chôa-kiáⁿ; bā-hio̍h tī hia chū-chi̍p, kang--ê bú--ê lóng chi̍p chòe-hé.

16Lín tio̍h chhâ-khó, tio̍h tha̍k Siōng Chú ê chheh; bô chi̍t hāng tōng-bu̍t bô tī hit lāi-bīn, kang--ê bú--ê tùi-tùi lóng ū. In-ūi Siōng Chú ê chhùi ū bēng-lēng, I ê khùi kā in chū-chi̍p.

17I ūi-tio̍h in thiu-chhiam, chhin-chhiú ēng soh kā in pun tōe-kài; in ōe éng-oán tit-tio̍h só͘ pun ê tōe-khu, sè-sè-tāi-tāi tòa tī hia.

← Chapter 33 Jump to: Chapter 35 →