Isaiah 23

Chinese TTVR (現代台語譯本羅馬字版)

← Chapter 22 Jump to: Chapter 24 →

1Che sī iú-koan Thài-ní ê sìn-sit. Tha-si ê chûn-chiah ah, tio̍h pi-siong thî-khàu, in-ūi Thài-ní siū húi-hoāi, bô chhù mā bô káng-kháu lah! Tùi Ki-thê ê tōe ū ōe thoân kàu in hia.

2Iân-hái ê chū-bîn, Se-tùn ê seng-lí-lâng ah, tio̍h ai-khàu! Lín kè-hái thàn chin chōe chîⁿ;

3keng-kè tōa-hái, chài Se-hat ê ngó͘-kok, Nî-lô-hô nn̄g hōaⁿ ê siu-sêng; Thài-ní chiâⁿ-chòe bān-kok ê chhī-tiûⁿ.

4Se-tùn, hái-iûⁿ ê iàu-sài ah, tio̍h kiàn-siàu, in-ūi tōa-hái ū kóng, “Góa m̄-bat hoâi-īn, mā m̄-bat siⁿ lí. Góa m̄-bat iúⁿ-chhī hāu-siⁿ, mā m̄-bat ióng-io̍k cha-bó͘-kiáⁿ.”

5Siau-sit thoân kàu Ai-ki̍p ê sî, in ōe ūi-tio̍h iú-koan Thài-ní ê hong-siaⁿ hui-siông thòng-sim.

6Iân-hái ê chū-bîn ah, tio̍h kè-khì Tha-si! Tio̍h ai-khàu!

7Che kiám sī kó͘-chá chiū kiàn-li̍p, hoân-êng ê siâⁿ-chhī? Ū chin chōe lâng tùi chia khì kàu chin hn̄g ê só͘-chāi chòe seng-lí.

8Thài-ní bat chí-phài lâng chòe pa̍t-kok ê ông, i ê seng-lí-lâng chin chōe sī ông-chhin, i ê siong-jîn sī kok-chhek. Siáⁿ-lâng koat-tēng beh kong-kek Thài-ní?

9Che sī Siōng Chú — Bān-kun ê Thóng-sòe ê koat-tēng, beh lêng-jio̍k Thài-ní só͘ khoa-kháu ê êng-kng, hō͘ sè-chiūⁿ it-chhè ê kùi-cho̍k kiàn-siàu.

10Tha-si ê chū-bîn ah, tio̍h tòa-móa lín ê thó͘-tōe, chhin-chhiūⁿ Nî-lô-hô ê chúi hoàn-lām, bô siū hān-chè.

11Siōng Chú í-keng chhun-chhiú tī tōa-hái ê téng-bīn, beh hō͘ lia̍t-kok phi̍h-phi̍h-chhoah. I hā-lēng beh húi-hoāi Hui-nî-ki ê iàu-sài.

12I kóng, “Siū lêng-jio̍k ê chāi-sek-lú Se-tùn ah, lí bōe koh ū khoài-lo̍k! Khí--lâi! Kè-khì Ki-thê, tī hia lí mā bōe-tàng tit-tio̍h an-hioh.”

13Lín khòaⁿ Ka-le̍k-tí -lâng ê tōe, i ê jîn-bîn bô koh chûn-chāi. A-su̍t -lâng hō͘ i chiâⁿ-chòe iá-siù tòa ê só͘-chāi; in khí-chō kong-siâⁿ ê thah, thiah-húi i ê kiong-tiān, hō͘ chit-tè tōe pha-hng.

14Tha-si ê chûn-chiah ah, lín tio̍h pi-siong thî-khàu! Lín ê pó-lúi í-keng siū phò-hoāi lah.

15Tī hit-ji̍t, Thài-ní ōe hō͘ lâng bōe-kì-tit chhit-cha̍p nî kú, kap chi̍t ê ông ê nî-hè pîⁿ tn̂g. Chhit-cha̍p nî liáu-āu, Thài-ní ê kéng-hóng ōe chhin-chhiūⁿ koa só͘ teh biô-siá ê ki-lú:

16Lí chit-ê hō͘ lâng bōe-kì--tit ê ki-lú ah, the̍h khiā-khîm tī siâⁿ-lāi sì-kòe kiâⁿ, tôaⁿ hó-thiaⁿ ê koa, gîm chin chōe si, hō͘ lâng koh ōe-kì-tit lí.

17Chhit-cha̍p nî kè-liáu, Siōng Chú ōe koh koàn-kò͘ Thài-ní, Thài-ní ōe hôe-ho̍k i ê pún-gia̍p, kap sè-kài ta̍k-kok bō͘-e̍k.

18M̄-kú i ê êng-lī kap só͘ thàn ê chîⁿ lóng beh hiàn hō͘ Siōng Chú; bô beh khǹg--teh, mā bô beh tún--khí-lâi. I ê êng-lī beh kui hō͘ kèng-pài Siōng Chú ê lâng, hō͘ in chia̍h chhēng lóng hù-chiok.

← Chapter 22 Jump to: Chapter 24 →