Isaiah 33

Chinese TTVR (現代台語譯本羅馬字版)

← Chapter 32 Jump to: Chapter 34 →

1Chhám ah, lí chit-ê iáu-bē siū húi-bia̍t ê húi-bia̍t-chiá, lí chit-ê m̄-bat siū pōe-poān ê pōe-poān-chiá! Lí húi-bia̍t lâng liáu-āu, lí mā ōe siū húi-bia̍t; lí pōe-poān lâng liáu-āu, lí mā ōe siū pōe-poān.

2Siōng Chú ah, lîn-bín goán; goán teh thèng-hāu lí. Kiû lí ta̍k chá-khí chòe goán ê khùi-la̍t, tī goán tú-tio̍h hoān-lān ê sî chòe goán ê chín-kiù.

3Lí chi̍t-ē hoah-siaⁿ, bān-bîn lóng tô-cháu; lí chi̍t-ē tián-ui, bān-kok lóng sì-sòaⁿ.

4Lâng ōe lâi siu-si̍p chiàn-lī-phín, ná-chún chháu-meh-kong chi̍p óa--lâi; chhin-chhiūⁿ chháu-meh chiⁿ óa--khì, lâng ōe án-ni saⁿ-chiⁿ chhiúⁿ.

5Siōng Chú siū chun chòe tōa, I tòa tī ke̍k-koân ê só͘-chāi; I beh chiong kong-pêng chèng-gī chhiong-móa Sek-an.

6I beh hō͘ lí it-seng it-sè an-ún, ū hong-sēng ê kiù-un, tì-hūi, kap tì-sek; kèng-ùi Siōng Chú sī lí ê chì-pó.

7Lín khòaⁿ, ióng-sū tī koe-lō͘ teh ai-kiò; kiû-hô ê chhe-sài ai-chhám thî-khàu.

8Tōa-lō͘ chhiⁿ-chhìn, bô lâng teh kiâⁿ. Khè-iok phò-lia̍t, chèng-jîn siū khòaⁿ-khin; lâng bô siū chun-tiōng.

9Tāi-tōe ai-siong soe-pāi; Lê-pa-lūn kiàn-siàu ko͘-tâ; Sa-lûn pìⁿ-chòe chhin-chhiūⁿ khòng-iá; Pa-san kap Ka-bi̍t ê chhiū-hio̍h lak-liáu-liáu.

10Siōng Chú án-ni kóng, “Chit-chūn góa beh khiā--khí-lâi, beh ko-kú ka-kī, hián-bêng góa ê tōa khùi-la̍t.

11Lín hoâi-īn--ê sī chho͘-khng, seng-sán--ê sī be̍h-kó; góa ê khùi beh ná hé thun-bia̍t lín.

12Bān-bîn ōe hō͘ hé sio kah pìⁿ-chòe chio̍h-he, chhin-chhiūⁿ chām--khí-lâi ê chhì-phè hō͘ hé sio-bia̍t.

13Lín tī hn̄g-hn̄g ê lâng, tio̍h thiaⁿ góa só͘ chòe ê sū; lín tī kūn-kūn ê lâng, tio̍h sêng-jīn góa ê tāi-lêng.”

14Sek-an ê chōe-jîn lóng kiaⁿ-hiâⁿ; bô kèng-khiân ê lâng phi̍h-phi̍h-chhoah; in kóng, “Lán kiám ū lâng ōe-tàng kap thun-bia̍t ê hé khiā-khí? Kiám ū lâng ōe-tàng kap éng-oán bōe hoa ê hé chòe-hé tòa?”

15Hiah-ê hêng-ûi kong-gī, kóng-ōe chèng-ti̍t, iàm-ò͘ⁿ khi-ap tit--lâi ê châi-lī, iô-chhiú kū-choa̍t hóe-lō͘, that hī-khang m̄ thiaⁿ hāi-lâng ê kè-bô͘, ng ba̍k-chiu bô khòaⁿ siâ-ok,

16chit-khoán lâng ōe tòa tī koân ê só͘-chāi, ēng soaⁿ-giâm ê pó-lúi chòe i ê pī-lān-só͘, bí-niû kiong-kip chhiong-chiok, chúi-goân put-toān.

17Lín ōe chhin-ba̍k khòaⁿ-tio̍h ông ê kong-chhái, khòaⁿ-kìⁿ khui-khoah ê thó͘-tōe.

18Lín ōe hôe-sióng chá-chêng khióng-pò͘ ê sū, sim-lāi kóng, “Taⁿ, hiah-ê khioh-sè--ê tī tó-ūi? Teh chhìn chìn-kòng ê kim-gûn--ê tī tó-ūi? Tī siú-bōng-tâi teh kàm-sī lán--ê tī tó-ūi?”

19Lín bōe koh khòaⁿ-kìⁿ áu-bân ê jîn-bîn; in kóng lâng thiaⁿ-bô ê ōe, kóng-ōe thi̍h-thi̍h-thu̍h-thu̍h, lâng bōe liáu-kái.

20Tio̍h chù-ba̍k khòaⁿ Sek-an, lín siú-choeh ê siâⁿ. Lín ê ba̍k-chiu ōe khòaⁿ-kìⁿ Iâ-lō͘-sat-léng, chi̍t ê chheng-chēng an-ún ê chū-the̍h, bōe hō͘ lâng î-sóa ê pò͘-pîⁿ; i ê khi̍t-á bōe koh pu̍ih--khí-lâi, i ê soh bōe tn̄g--khì.

21Tī hia Siōng Chú beh tùi lán hián-chhut ui-giâm. Hia ū khui-khoah ê kang-hô kap khoe, bô chiàn-chûn keng-kè, bô tōa chiah chûn óng-lâi.

22In-ūi Siōng Chú sī lán ê sím-phòaⁿ-koaⁿ, sī lán ê chí-hui-koaⁿ, sī lán ê kun-ông, I ōe kái-kiù lán.

23Chûn ê soh lóng lēng--khì, phâng-thiāu khiā bōe chāi, chûn-phâng thí bōe khui; hit-sî, ū chin chōe chiàn-lī-phín thang pun, liân kha-pái ê lâng to ū hūn.

24Tī hia khiā-khí ê lâng bô lâng ōe kóng “Góa phòa-pīⁿ”; chū-bîn ê chōe lóng ōe tit-tio̍h sià-bián.

← Chapter 32 Jump to: Chapter 34 →