Isaiah 63

Chinese TTVR (現代台語譯本羅馬字版)

← Chapter 62 Jump to: Chapter 64 →

1Tùi Í-tong ê Pho-su-la -siâⁿ teh lâi, chhēng âng-sek gōa-phàu Hit-ūi sī siáⁿ-lâng? Chhēng-chhah hôa-bí, chhiong-móa ui-le̍k, tōa-pō͘ hiòng-chêng māi-chìn Hit-ūi sī siáⁿ-lâng? “Sī góa — ū tōa khùi-la̍t chín-kiù ê Siōng Chú; góa lâi soan-kò sèng-lī.”

2Sī-án-chóaⁿ lí ê gōa-phàu sī âng-sek, chhin-chhiūⁿ teh ta̍h chiú-khut ê lâng ê saⁿ?

3Siōng Chú kóng: Góa ka-kī chi̍t ê tī chiú-khut ta̍h phû-tô, góa ê chú-bîn bô lâng kap góa chòe-hé. Góa tī siū-khì tiong ta̍h lia̍t-kok, tī tōa siū-khì tiong thún-ta̍h in; in ê huih phùn-tio̍h góa ê gōa-phàu, phah lâ-sâm góa só͘-ū ê saⁿ.

4Sin-oan ê ji̍t, góa í-keng tiāⁿ-tio̍h, góa kiù-sio̍k ê nî mā í-keng kàu.

5Góa sì-kòe khòaⁿ, m̄-kú bô chi̍t ê lâi pang-chān; góa chù-ì khòaⁿ, kèng-jiân bô lâng lâi hia̍p-chō͘. Só͘-í, góa khò ka-kī ê khùi-la̍t si-hêng chín-kiù; góa ê tōa siū-khì ka-kiông góa ê koat-sim.

6Góa tī siū-khì tiong thún-ta̍h lia̍t-kok ê jîn-bîn, tī tōa siū-khì tiong phah-chhùi in; góa kā in ê huih piàⁿ tī tōe--ni̍h.

7Góa beh kóng-khí Siōng Chú put-piàn ê thiàⁿ, beh chheng-chàn I ūi-tio̍h lán só͘ chòe it-chhè ê chok-ûi. Siōng Chú ū chiàu I ê un-hūi kap hong-sēng ê chû-ài tōa-tōa sù-hok hō͘ Í-sek-lia̍t -ke.

8Siōng Chú kóng, “In khak-si̍t sī góa ê chú-bîn, sī bōe kiâⁿ khúi-chà ê kiáⁿ-jî.” Án-ni, I chiū chòe in ê Kiù-chú.

9Tī in it-chhè ê khó͘-lān tiong, I mā tâng siū khó͘; I chhe I bīn-chêng ê sù-chiá kái-kiù in. I ēng I ê thiàⁿ, I ê lîn-bín kiù-sio̍k in; tī kó͘-chá ê sî-ji̍t, I lóng kā in phō, kā in āiⁿ.

10In kèng-jiân pōe-poān, hō͘ I sèng ê sîn iu-siong; só͘-í Siōng Chú pìⁿ-chòe in ê te̍k-jîn, kap in choh-tùi.

11Hit-sî, in chiah siūⁿ-khí kó͘-chá I ê po̍k-jîn Mô͘-se ê ji̍t-chí. In mn̄g, “Taⁿ, hit-ūi chiong I ê chú-bîn kap in ê léng-siù tùi hái-tiong kiù--chhut-lâi ê Siōng Chú tī tó-ūi? Hit-ūi chiong sèng ê sîn sù hō͘ in ê Siōng Chú tī tó-ūi?

12Hit-ūi kiâⁿ tī Mô͘-se ê chiàⁿ-pêng, ēng tōa khùi-la̍t ê chhiú-kut kā hái-chúi pun-chòe nn̄g pêng, ūi ka-kī kiàn-li̍p éng-oán ê miâ ê Siōng Chú tī tó-ūi?

13Hit-ūi chhōa I ê chú-bîn kè chhim-hái, hō͘ in chhin-chhiūⁿ bé tī khòng-iá teh cháu bōe poa̍h-tó ê Siōng Chú tī tó-ūi?”

14Siōng Chú ê sîn hō͘ I ê chú-bîn tit-tio̍h an-hioh, chhin-chhiūⁿ gû-kûn lo̍h-khì soaⁿ-kok; lí chiū-sī án-ni ín-chhōa lí ê chú-bîn, ūi ka-kī kiàn-li̍p êng-iāu ê miâ.

15Kiû lí tùi thiⁿ-téng àⁿ lo̍h-lâi khòaⁿ, tùi lí sèng koh êng-iāu ê só͘-chāi khòaⁿ. Lí ê jia̍t-sêng kap lí ê khùi-la̍t tī tó-ūi? Lí jia̍t-chêng ê thiàⁿ kap lîn-bín tī tó-ūi? M̄-thang m̄ chhap goán!

16Sui-jiân A-pek-la-hán m̄ bat goán, Ngá-kok m̄ sêng-jīn goán, m̄-kú lí sī goán ê lāu-pē. Siōng Chú ah, lí sī goán ê lāu-pē; tùi kó͘-chá lí ê chheng-ho͘ sī “goán ê Kiù-sio̍k-chú”.

17Siōng Chú ah, sī-án-chóaⁿ lí hō͘ goán phian-lī lí ê tō-lō͘? Sī-án-chóaⁿ hō͘ goán ngī-sim m̄ kèng-ùi lí? In-ūi lí po̍k-jîn ê iân-kò͘, kiû lí hôe-sim-tńg-ì; ūi-tio̍h lí ê chú-bîn, lí ê sán-gia̍p, kiû lí tńg--lâi!

18Lí sèng ê chú-bîn put-kò chiām-sî tit-tio̍h lí èng-ún ê thó͘-tōe, m̄-kú goán ê tùi-te̍k í-keng thún-ta̍h lí ê sèng-só͘.

19Goán ká-ná m̄-bat siū lí thóng-tī, ká-ná m̄-bat chòe lí ê chú-bîn.

← Chapter 62 Jump to: Chapter 64 →