Isaiah 41

Chinese TTVR (現代台語譯本羅馬字版)

← Chapter 40 Jump to: Chapter 42 →

1Siōng-tè kóng: Chèng hái-sū ah, tio̍h tī góa ê bīn-chêng chēng-chēng; chèng jîn-bîn ah, tio̍h têng-sin tit-tio̍h khùi-la̍t. Tio̍h hō͘ in chìn-chêng lâi sin-sò͘; lán chòe-hé khiā chìn-chêng lâi piān-lūn.

2Siáⁿ-lâng tùi tang-hng heng-khí chi̍t ê sèng-lī-chiá, hō͘ i pek-chiàn-pek-sèng? Siáⁿ-lâng chiong bān-kok kau hō͘ i, hō͘ i thún-ta̍h chu-ông, hō͘ i ēng to kā in kóaⁿ-sòaⁿ, chhin-chhiūⁿ teh sàu thô͘-hún, ēng chìⁿ kā in siau-bia̍t, chhin-chhiūⁿ tōa-hong chhe-cháu be̍h-kó?

3I tui-kóaⁿ in hui-siông sūn-lī, chi̍t-kú-á chiū jip-tio̍h in, kín kah ná-chún kha bô ta̍h-tio̍h tōe.

4Sī siáⁿ-lâng hō͘ chit-hāng tāi-chì hoat-seng? Siáⁿ-lâng tùi khí-chho͘ chiū koat-tēng le̍k-sú ê tōng-hiòng? Chiū sī góa Siōng Chú, siōng khí-thâu góa chiū tī hia, it-ti̍t kàu siōng lō͘-bé góa mā ōe tī hia.

5Chèng hái-sū ū khòaⁿ--tio̍h, chin kiaⁿ-hiâⁿ; tōe ê ke̍k-thâu mā lóng kiaⁿ kah phi̍h-phi̍h-chhoah. In lóng chòe-chi̍t-ē chū-chi̍p óa--lâi.

6Ta̍k-ê lâng lóng hō͘-siōng pang-chān, pí-chhú kó͘-lē kóng, “Tio̍h ióng-kám!”

7Ba̍k-chhiūⁿ bián-lē gûn-chhiūⁿ; chù-chō ngó͘-siōng ê sai-hū kó͘-lē tèng teng-á ê ba̍k-chhiūⁿ. In tùi phah thih--ê kóng, “Phah-liáu chin hó!” Tèng teng-á--ê chiong ngó͘-siōng chhāi hō͘ ún-kò͘.

8M̄-kú, lí Í-sek-lia̍t — góa ê po̍k-jîn, góa só͘ soán-li̍p ê Ngá-kok ah, lí sī góa ê pêng-iú A-pek-la-hán ê hō͘-tāi;

9lí sī góa tùi tōe ê ke̍k-thâu chhōa--lâi-ê, tùi siōng hn̄g ê kak-lo̍h tiàu--lâi-ê. Góa ū tùi lí kóng “Lí sī góa ê po̍k-jîn”; góa ū kéng-soán lí, bōe khì-sak lí.

10M̄-bián kiaⁿ, góa put-sî kap lí tông-chāi; m̄-bián kiaⁿ, góa sī lí ê Siōng-tè. Góa beh hō͘ lí kian-kiông, beh pang-chān lí; góa beh ēng sèng-lī ê chiàⁿ-chhiú pó-hō͘ lí.

11Khòaⁿ leh, só͘-ū tùi lí hoat tōa siū-khì ê lâng ōe làu-khùi, kiàn-siàu; kap lí saⁿ-chiⁿ ê lâng lóng ōe bô--khì, bia̍t-bông.

12Tùi-khòng lí--ê, lí beh chhē in mā chhē bô; thiau-chiàn lí--ê, in lóng ōe siau-bia̍t.

13In-ūi góa Siōng Chú — lí ê Siōng-tè hû-chhî lí ê chiàⁿ-chhiú; “M̄-bián kiaⁿ, góa beh pang-chān lí.” Kóng chit-kù ōe--ê sī góa!

14Lí chit-ê ná thâng ê Í-sek-lia̍t ah, m̄-bián kiaⁿ! Siōng Chú kóng, “Góa beh pang-chān lí. Lí ê Kiù-sio̍k-chú sī Í-sek-lia̍t sîn-sèng ê Siōng-tè.”

15Lí khòaⁿ, góa beh hō͘ lí chòe siak ngó͘-kok ê khì-khū, sī sin koh lāi, ū khí ê khì-khū. Lí beh kā tōa-soaⁿ thún kah chhùi-chhùi, hō͘ sió-soaⁿ pìⁿ-chòe ná chho͘-khng.

16Lí beh kā in pòa, hō͘ hong chhe-sòaⁿ, kông-hong kā in sàu-cháu. Chóng-sī lín ōe in-ūi Siōng Chú lâi hoaⁿ-hí, ōe ēng Í-sek-lia̍t sîn-sèng ê Siōng-tè chòe khoa-iāu.

17Sàn-chhiah khùn-khó͘ ê lâng chhē chúi, chhē lóng bô; in ê nâ-âu ta, chhùi-chi̍h khoah; hit-sî góa Siōng Chú ōe thiaⁿ in ê kî-tó, góa Í-sek-lia̍t ê Siōng-tè choa̍t-tùi bōe pàng-sak in.

18Góa beh tī chhàu-ta ê soaⁿ-téng khui kang-hô, hō͘ soaⁿ-kok chhèng-chhut chúi-chôaⁿ; góa beh hō͘ soa-bô͘ pìⁿ-chòe chúi-tî, hō͘ ta-sò ê tōe pìⁿ-chòe chôaⁿ-goân.

19Góa beh tī khòng-iá chèng pek-hiuⁿ-chhiū, kim-ha̍p-hoan-chhiū, tiông-chheng-chhiū, kaⁿ-ná-chhiū; góa mā beh tī hong-po͘ chai-chèng siông-chhiū, sam-chhiū, n̂g-iông-chhiū, hō͘ i pìⁿ-chòe chhiū-nâ.

20Án-ni, jîn-bîn khòaⁿ--tio̍h chiū ōe bêng-pe̍k, che sī góa Siōng Chú ê chok-ûi; in ōe thé-hōe, ōe liáu-kái, che sī góa Í-sek-lia̍t sîn-sèng ê Siōng-tè chhòng-chō--ê.

21Siōng Chú tùi ngó͘-siōng kóng, “Thê-chhut lín ê sin-sò͘!” Í-sek-lia̍t ê Kun-ông kóng, “Pâi-lia̍t lín iú-le̍k ê chèng-kù!”

22Tio̍h tùi goán kóng teh-beh hoat-seng ê sū, kā goán soat-bêng í-chêng hoat-seng ê tāi-chì, hō͘ goán thang chim-chiok siūⁿ, ū-chhek teh-beh lâi ê sū, chai tāi-chì ê kiat-kio̍k.

23Tio̍h hō͘ goán chai chiong-lâi beh hoat-seng ê tāi-chì, goán chiah thang chai lín sī sîn-bêng. Tio̍h sù hok-khì á-sī kàng chai-hō, thang hō͘ goán kiaⁿ-ùi, khióng-hông.

24Lín kap lín chòe ê it-chhè lóng bô sǹg sím-mi̍h; soán-te̍k lín--ê si̍t-chāi thang iàm-ò͘ⁿ!

25Góa í-keng tùi pak-hng heng-khí chi̍t ê lâng; i tùi tang-pêng lâi, beh kiû-kiò góa ê miâ. I thún-ta̍h chiáng-koân-chiá chhin-chhiūⁿ teh ta̍h thô͘-bê, chhin-chhiūⁿ sio-hûi sai-hū teh ta̍h liâm-thô͘.

26Siáⁿ-lâng tī khí-thâu chiū soan-pò͘ chit-ê tāi-chì hō͘ goán chai, tī khí-thâu chiū kóng-bêng, hō͘ goán thang kóng “I bô m̄-tio̍h”? Kî-si̍t, bô lâng soan-pò͘, bô lâng soat-bêng, mā bô lâng thiaⁿ-tio̍h lín ê ōe.

27Góa tāi-seng tùi Sek-an soan-pò͘; góa phài chi̍t ê pò hó siau-sit ê sù-chiá khì Iâ-lō͘-sat-léng.

28Góa tī chèng sîn-bêng tiong-kan chhē, chhē bô chi̍t ê tō-su ōe-tàng ìn-tap góa ê būn-tôe.

29Só͘-ū ê sîn-bêng lóng bô lō͘-ēng; in ê só͘-chòe sī khang-khang; in ê siōng put-kò sī hong.

← Chapter 40 Jump to: Chapter 42 →