Isaiah 48

Chinese TTVR (現代台語譯本羅馬字版)

← Chapter 47 Jump to: Chapter 49 →

1Ngá-kok ê hō͘-tāi, tio̍h chù-ì thiaⁿ! Lín siū chheng chòe Í-sek-lia̍t -lâng, sī Iû-tāi ê kiáⁿ-sun. Lín kí Siōng Chú ê miâ chiù-chōa, kiû-kiò Í-sek-lia̍t ê Siōng-tè, m̄-kú m̄-sī chhut tī sêng-sim-si̍t-ì.

2Lín chū-khoa sī Sèng-siâⁿ ê jîn-bîn, só͘ óa-khò--ê sī Í-sek-lia̍t ê Siōng-tè; I ê chheng-ho͘ sī Siōng Chú — Bān-kun ê Thóng-sòe.

3Siōng Chú kóng: Góa chin kú í-chêng chiū soan-kò, chhin-chhùi kóng hō͘ lín chai chiong-lâi ōe hoat-seng ê sū. Tī lín bô phah-sǹg ê sî, góa hêng-tōng, tāi-chì chiū sêng-chiū.

4In-ūi góa chai, lín ê sim ngī, ām-kún ná thih, thâu-hia̍h ná tâng,

5só͘-í, góa tùi kó͘-chá chiū ū kā lín kóng, tī tāi-chì hoat-seng í-chêng chiū ū kā lín soan-kò, hō͘ lín bōe-tàng kóng: Chiah-ê sī goán ê ngó͘-siōng só͘ chòe, sī goán khek ê ngó͘-siōng, chō ê sîn-bêng chù-tiāⁿ--ê.

6Góa só͘ ū-giân ê sū taⁿ í-keng lóng hoat-seng; chit-ê sū-si̍t lín kiám bô beh sêng-jīn? Tùi chit-chūn khí, góa beh hō͘ lín chai chiong-lâi sin ê sū, sī lín í-chêng m̄ chai, tùi lín ún-chông ê tāi-chì.

7Chiah-ê tāi-chì hiān-chāi chiah hoat-seng, kè-khì lín lóng m̄-bat thiaⁿ--tio̍h, hō͘ lín bōe-tàng kóng: Goán láu-chá chiū chai.

8Lín m̄-bat thiaⁿ--tio̍h, mā m̄ chai; lín ê hī-á lóng m̄-bat thiaⁿ--kè. Góa chai lín hui-siông khúi-chà, tùi chhut-sì, lâng chiū kiò lín chòe pōe-poān-chiá.

9Góa ūi-tio̍h pó-chhî góa ê miâ ê êng-ū, jím-nāi, bô hoat siū-khì; góa it-ti̍t jím--teh, bô kā lín húi-bia̍t.

10Góa ū kā lín thê-liān, put-kò bô chhin-chhiūⁿ teh thê-liān gûn, sī ēng thòng-khó͘ ê hé kā lín thoàn-liān.

11Góa khak-si̍t sī ūi-tio̍h ka-kī ê iân-kò͘; góa bô ài hō͘ góa ê êng-ū siū-jio̍k. Góa ê miâ ná thang siū siat-to̍k? Góa bô ài pa̍t-ê sîn-bêng hun-hióng góa ê êng-iāu!

12Ngá-kok ah, tio̍h thiaⁿ! Góa só͘ ho͘-tiàu ê Í-sek-lia̍t ah, tio̍h thiaⁿ góa kóng! Góa sī Siōng-tè, sī siōng tāi-seng--ê, mā-sī siōng lō͘-bé--ê.

13Góa chhin-chhiú hē tāi-tōe ê tōe-ki; góa ēng chiàⁿ-chhiú thí-khui thiⁿ. Góa chi̍t-ē bēng-lēng, thiⁿ kap tōe chiū chòe-hé khiā--chhut-lâi.

14Lín tāi-ke lóng tio̍h chū-chi̍p, chū-chi̍p óa-lâi thiaⁿ! Kiám ū sîn-bêng bat ū-chhek góa Siōng Chú só͘ soán-li̍p ê lâng ōe kong-kek Pa-pí-lûn, ōe chiàu góa ê chí-ì tùi-hù Ka-le̍k-tí -lâng?

15Tùi i kóng-ōe, ho͘-tiàu i--ê sī góa; góa kā i chhōa--chhut-lâi, hō͘ i heng-ōng.

16Taⁿ, kiâⁿ óa--lâi, thiaⁿ góa kóng: Tùi khí-thâu, góa it-ti̍t ū kong-khai kā lín kóng, tāi-chì hoat-seng hit-sî, góa chiū tī hia. Taⁿ, Chì-koân ê Siōng Chú í-keng chhe-khián góa, sù góa I ê khùi-la̍t.

17Í-sek-lia̍t sîn-sèng ê Siōng-tè — lín ê Kiù-sio̍k-chú án-ni kóng: Góa sī Siōng Chú — lín ê Siōng-tè. Góa kà-sī lín sī ūi-tio̍h lín hó; góa chhōa lín kiâⁿ eng-kai kiâⁿ ê lō͘.

18Góa jōa-á-ni̍h kî-thāi lín thiaⁿ góa ê bēng-lēng! Nā ū thiaⁿ, lín ê pêng-an chiū ná hô-liû, lín ê kong-gī ōe ná hái-éng;

19lín ê hō͘-tāi ōe chhin-chhiūⁿ hái-soa, lín ê kiáⁿ-sun chhin-chhiūⁿ soa hiah chōe. Góa bōe hō͘ in ê miâ siū chián-tn̄g bia̍t-choa̍t!

20Tio̍h tùi Pa-pí-lûn chhut--lâi, thoat-lī Ka-le̍k-tí -lâng! Tio̍h hoaⁿ-hí chhut-siaⁿ, tōa-siaⁿ soan-pò͘! Chiong siau-sit thoân kàu thiⁿ-piⁿ-hái-kak, kóng: Siōng Chú í-keng kiù-sio̍k I ê po̍k-jîn Í-sek-lia̍t!

21Siōng Chú chhōa in keng-kè khòng-iá, in lóng bô chhùi-ta. I hō͘ chúi tùi chio̍h-pôaⁿ chhèng--chhut-lâi; I hō͘ chio̍h-pôaⁿ piak-li̍h, hō͘ chúi ek--chhut-lâi.

22Siōng Chú kóng: Siâ-ok ê lâng bô pêng-an!

← Chapter 47 Jump to: Chapter 49 →