Isaiah 65

Chinese TTVR (現代台語譯本羅馬字版)

← Chapter 64 Jump to: Chapter 66 →

1Siōng Chú kóng: Bô tui-kiû góa--ê, góa beh hō͘ in chhē--tio̍h. Bô chhē góa--ê, góa beh hō͘ in tú--tio̍h. Góa tùi bô kiû-kiò góa ê miâ ê kok-ka kóng, “Góa tī chia, góa tī chia!”

2Góa kui-ji̍t chhun-chhiú thèng-hāu pōe-ge̍k ê chú-bîn; in chiàu ka-kī ê siâ-liām kiâⁿ pháiⁿ-lō͘.

3Chiah-ê jîn-bîn tng góa ê bīn it-ti̍t jiá góa siū-khì, tī hn̂g-lāi tùi ngó͘-siōng hiàn-chè, tī tôaⁿ-téng kā sîn-bêng sio-hiuⁿ.

4In ēng bōng-khòng-khang chòe bîn-chhn̂g, tī chio̍h-tōng lāi kè-mî. In chia̍h ti-bah, kui-tiáⁿ lóng sī bô chheng-khì ê mi̍h chú ê thng.

5In kóng, “Siám-khui, m̄-thang óa--lâi! Góa sîn-sèng, bōe-kha̍p--tit.” Chiah-ê lâng hō͘ góa phīⁿ-khang chhèng-ian, kui-ji̍t kui pak-tó͘ hé.

6Khòaⁿ leh, chiah-ê góa lóng í-keng siá--khí-lâi; góa it-tēng bōe tiām-tiām, góa beh pò-èng, thiat-tóe kā in pò-èng;

7in-ūi in kap in ê lia̍t-chó͘ hoān kâng-khoán ê chōe, tī soaⁿ-téng sio-hiuⁿ, tī soaⁿ-lûn-á siat-to̍k góa. Góa beh chiàu in èng-tit--ê kā in pò-èng, chiàu in ê hêng-ûi hêng-hoa̍t in. Siōng Chú án-ni soan-kò.

8Siōng Chú án-ni kóng: Lâng chhē-tio̍h kui-pha phû-tô ōe-tàng chòe sin-chiú, i ōe kóng, “M̄-thang kā i húi-hoāi, in-ūi lāi-bīn ū chiok-hok.” Só͘-í, ūi-tio̍h góa ê po̍k-jîn ê iân-kò͘, góa bōe kā in choân-pō͘ siau-bia̍t.

9Góa beh hō͘ Ngá-kok ū hō͘-tāi, tùi Iû-tāi chhut kiáⁿ-sun kè-sêng góa ê chèng-soaⁿ; góa kéng-soán ê chú-bîn ōe sêng-chiap chit-tè thó͘-tōe, góa ê po̍k-jîn ōe tī hia khiā-khí.

10Sa-lûn pêng-goân ōe pìⁿ-chòe iûⁿ-kûn ê bo̍k-tiûⁿ, A-kat Soaⁿ-kok pìⁿ-chòe gû-kûn hioh-khùn ê só͘-chāi. Chiah-ê lóng beh sù hō͘ chhē-kiû góa ê chú-bîn.

11M̄-kú, lín chiah-ê pàng-sak Siōng Chú ê lâng, lín bōe-kì-tit góa ê sèng-soaⁿ Sek-an, ūi-tio̍h “Hó-ūn ê sîn” pān-toh, koh ūi-tio̍h “Miā-ūn ê sîn” tò-móa tiâu-hô ê chiú.

12Góa it-tēng beh hō͘ lín sí tī to-ē, hō͘ lín kūi-teh siū thâi-sí; in-ūi góa kiò, lín m̄ ìn, góa kóng, lín m̄ thiaⁿ. Lín tian-tò chòe góa khòaⁿ-chòe pháiⁿ ê tāi-chì, ì-ài góa bô ài ê sū.

13Só͘-í, Chì-koân ê Siōng Chú án-ni kóng: Góa ê po̍k-jîn it-tēng ū thang chia̍h, m̄-kú lín ōe iau-gō; góa ê po̍k-jîn ū thang lim, m̄-kú lín ōe chhùi-ta; góa ê po̍k-jîn ōe hoaⁿ-hí, m̄-kú lín ōe kiàn-siàu;

14góa ê po̍k-jîn ōe hoaⁿ-hí chhiùⁿ-koa, m̄-kú lín ōe iu-siong ai-khàu, in-ūi sim-sîn iu-khó͘ tōa-siaⁿ háu.

15Lín ê miâ ōe lâu--teh, hō͘ góa ê soán-bîn ēng lâi chiù-chó͘. Chì-koân ê Siōng Chú ōe kā lín siau-bia̍t, m̄-kú ōe hō͘ I ê po̍k-jîn lēng-gōa chi̍t ê miâ.

16Án-ni, só͘-ū tī chit-ê tōe ūi ka-kī kiû hok-khì ê lâng, ōe tùi sìn-si̍t ê Siōng-tè tit-tio̍h hok-khì; só͘-ū tī chit-ê tōe chiù-chōa ê lâng, ōe kí sìn-si̍t ê Siōng-tè chiù-chōa; in-ūi chá-chêng ê hoān-lān ōe hō͘ lâng bōe-kì--tit, ōe tùi góa ê ba̍k-chiu chêng siau-sit.

17Siōng Chú kóng: Lín khòaⁿ, góa beh chhòng-chō sin ê thiⁿ, sin ê tōe; kè-khì ê tāi-chì lâng bōe koh kì--tit, bōe koh hoâi-liām.

18Lín tio̍h in-ūi góa teh chhòng-chō ê it-chhè éng-oán hoaⁿ-hí khoài-lo̍k, ūi-tio̍h góa beh chhòng-chō ê Iâ-lō͘-sat-léng chhiong-móa hoaⁿ-hí, ūi-tio̍h siâⁿ-lāi ê chū-bîn chhiong-móa khoài-lo̍k.

19Góa in-ūi Iâ-lō͘-sat-léng lâi hoaⁿ-hí, beh in-ūi góa ê chú-bîn lâi khoài-lo̍k. Siâⁿ-lāi bōe koh thiaⁿ-tio̍h thî-khàu ê siaⁿ, mā bōe koh thiaⁿ-kìⁿ ai-khàu ê siaⁿ.

20Tī hia bōe koh ū kan-ta oa̍h kúi-ji̍t-á ê eⁿ-á, mā bōe ū hè-siū bē móa chiū sí ê lāu-lâng. Chia̍h chi̍t-pah-hè sí--khì-ê, lâng mā siūⁿ-kóng i iáu siàu-liân; chia̍h bô-kàu chi̍t-pah-hè--ê, lâng ōe siūⁿ-kóng i sī siū chiù-chó͘.

21In ōe khí-chhù, ka-kī tòa tī lāi-bīn; in ōe chai-chèng phû-tô-hn̂g, chia̍h hn̂g--ni̍h ê ké-chí.

22In khí-chhù, bōe hō͘ pa̍t-lâng chiàm-khì tòa; in chai-chèng, bōe hō͘ pa̍t-lâng chhiúⁿ-khì chia̍h. Chhiū oa̍h jōa kú, góa ê chú-bîn mā ōe oa̍h hiah kú; góa ê soán-bîn ōe kú-tn̂g hióng-siū lô-khó͘ tit--lâi ê sêng-kó.

23In ê lô-lo̍k bōe lo̍k-khong, in siⁿ ê kiáⁿ-jî bōe tú-tio̍h chai-lān; in-ūi in sī Siōng Chú sù-hok ê lâng ê kiáⁿ-sun, in ê hō͘-tāi mā-sī án-ni.

24In iáu-bē kiû-kiò, góa chiū èng-ún; in iáu-teh kóng, góa chiū ìn-tap.

25Chhâi-lông kap iûⁿ-ko ōe chòe-hé chia̍h, sai ōe chhin-chhiūⁿ gû chia̍h-chháu; chôa ê chia̍h-mi̍h iáu-kú sī thô͘-hún! Tī góa sèng-soaⁿ ê ta̍k só͘-chāi, it-tēng bô ū siong-hāi, mā bô phò-hoāi. Siōng Chú án-ni soan-pò͘.

← Chapter 64 Jump to: Chapter 66 →