Isaiah 35

Chinese TTVR (現代台語譯本羅馬字版)

← Chapter 34 Jump to: Chapter 36 →

1Khòng-iá kap ta-sò ê tōe beh hoaⁿ-hí, soa-bô͘ beh khoài-lo̍k, chhin-chhiūⁿ mûi-kùi khui-hoe.

2Mûi-kùi beh khui-hoe bō͘-sēng, beh hoaⁿ-hí hoan-ho͘. I beh ū Lê-pa-lūn ê êng-kng, beh tit-tio̍h Ka-bi̍t kap Sa-lûn ê kong-chhái. In ōe khòaⁿ-kìⁿ Siōng Chú ê êng-iāu, kìⁿ-tio̍h lán Siōng-tè ê kong-chhái.

3Tio̍h hō͘ loán-jio̍k ê chhiú kian-kiông, hō͘ bô-la̍t ê kha-thâu-u khiā-chāi.

4Sim-koaⁿ kiaⁿ-hiâⁿ ê lâng, lín tio̍h tùi in kóng, “Tio̍h kian-kiông, m̄-bián kiaⁿ! Lín khòaⁿ, lín ê Siōng-tè beh lâi sin-oan; Siōng-tè it-tēng ōe si-hêng pò-èng lâi chín-kiù lín.”

5Hit-sî, sit-bêng ê lâng ba̍k-chiu ōe khòaⁿ--kìⁿ; sit-chhong ê lâng hī-khang ōe thiaⁿ--kìⁿ.

6Kha-pái ê lâng ōe chhin-chhiūⁿ lo̍k tiô-thiàu; bōe kóng-ōe ê lâng ōe hoaⁿ-hí chhiùⁿ-koa. Hong-po͘ beh ū chúi chhèng-chhut; soa-bô͘ beh ū kang-hô teh lâu.

7Iām-jia̍t ê soa-tōe ōe pìⁿ-chòe chúi-tî; ta-sò ê thó͘-tōe ōe pìⁿ-chòe chôaⁿ-goân. Chhâi-lông tòa ê só͘-chāi ōe hoat chhiⁿ-chháu, lô͘-úi, kap pô͘-chháu.

8Tī hia beh ū chi̍t tiâu tōa-lō͘, lâng kā i kiò-chòe “Sèng-lō͘”. Bô chheng-khì ê lâng lóng bōe-tàng tùi hia keng-kè; hit-tiâu lō͘ sī ūi-tio̍h Siōng-tè ê chú-bîn chō--ê; kiâⁿ hit-tiâu lō͘--ê, liân gōng-lâng to bōe bê-lō͘.

9Tī hia bô sai, hiong-béng ê iá-siù mā bōe chhut-hiān. Tī hia lâng bōe tú-tio̍h iá-siù; chí-ū siū kiù-sio̍k ê lâng ōe kiâⁿ hit-tiâu lō͘.

10Siōng Chú sio̍k-hôe ê lâng ōe tò-tńg--lâi, chhiùⁿ-koa lâi kàu Sek-an; éng-oán ê hí-lo̍k ōe chòe in ê hoa-koan. In ōe hoaⁿ-hí khoài-lo̍k, bô koh ū pi-siong thó͘-khùi.

← Chapter 34 Jump to: Chapter 36 →