Isaiah 49

Chinese TTVR (現代台語譯本羅馬字版)

← Chapter 48 Jump to: Chapter 50 →

1Chèng hái-tó ah, tio̍h thiaⁿ góa kóng! Tòa tī chin hn̄g lia̍t-kok ê jîn-bîn ah, tio̍h chù-ì thiaⁿ! Siōng Chú tī góa chhut-sì í-chêng chiū kéng-tiàu góa, góa iáu tī bú-thai chiū kā góa hō-miâ.

2I hō͘ góa ê chhùi chhin-chhiūⁿ lāi-kiàm, ēng I ê chhiú pì-iū góa, pó-hō͘ góa. I hō͘ góa chhin-chhiūⁿ bôa kah kim-sih-sih ê chìⁿ, kā góa chhàng tī I ê chìⁿ-tē lāi-bīn.

3I tùi góa kóng, “ Í-sek-lia̍t ah, lí sī góa ê po̍k-jîn; góa beh thong-kè lí hián-sī góa ê êng-iāu.”

4M̄-kú góa kóng, “Góa ê lô-khó͘ lóng sī khang-khang; góa ēng-chīn khùi-la̍t, lóng bô-chhái-kang.” Iáu-kú, Siōng Chú sī góa ê chhâi-koat-chiá; góa it-tēng ōe tùi Siōng-tè tit-tio̍h pò-siúⁿ.

5Góa tī bú-thai Siōng Chú chiū chō góa, hō͘ góa chòe I ê po̍k-jîn, thang hō͘ Ngá-kok ê hō͘-tāi tò-tńg-lâi I hia, chhōa Í-sek-lia̍t liû-bông ê chú-bîn chū-chi̍p óa--lâi. Án-ni, góa tī Siōng Chú bīn-chêng ōe tit-tio̍h kong-êng; góa ê Siōng-tè mā chiâⁿ-chòe góa ê khùi-la̍t.

6Hiān-chāi Siōng Chú tùi góa kóng, “Góa beh hō͘ lí chòe góa ê po̍k-jîn, hō͘ Ngá-kok ta̍k chi-cho̍k koh ho̍k-heng, kā liû-bông ê Í-sek-lia̍t -lâng chhōa--tńg-lâi. Góa beh koh hō͘ lí chi̍t hāng tiōng-iàu ê jīm-bū, hō͘ lí chòe bān-kok ê kng, hō͘ góa ê chín-kiù phó͘-ki̍p thiⁿ-piⁿ-hái-kak.”

7Siōng Chú — Í-sek-lia̍t ê Kiù-sio̍k-chú, Í-sek-lia̍t sîn-sèng ê Siōng-tè án-ni kóng, “Lí chit-ê siū lâng biáu-sī, hō͘ bān-kok thòng-hūn, chòe thóng-tī-chiá ê lô͘-lē ê lâng, kun-ông khòaⁿ-tio̍h lí ōe khiā--khí-lâi; léng-siù khòaⁿ-tio̍h lí mā ōe phak lo̍h-khì piáu kèng-ì. Chit-ê sū ōe si̍t-hiān, in-ūi Siōng Chú sìn-si̍t, in-ūi Í-sek-lia̍t sîn-sèng ê Siōng-tè ū kéng-soán lí.”

8Siōng Chú án-ni kóng, “Tī góa hoaⁿ-hí chiap-la̍p ê sî, góa ū èng-ún lí; tī chín-kiù ê ji̍t, góa ū pang-chān lí. Góa beh pó-hō͘ lí, koh thong-kè lí kap góa ê chú-bîn li̍p-iok. Góa beh hō͘ lí tī í-keng hong-hòe ê thó͘-tōe tiông-kiàn, koh tēng-ku.

9Góa beh kā siū-lia̍h ê lâng kóng, ‘Lín chū-iû lah!’ Góa beh kā tī o͘-àm tiong ê lâng kóng, ‘Chhut-lâi kìⁿ kng!’ In ōe chhin-chhiūⁿ iûⁿ iân-lō͘ ū chháu thang chia̍h; hong-hòe ê só͘-chāi lóng pìⁿ-chòe bo̍k-tiûⁿ.

10In bōe iau, mā bōe chhùi-ta; ji̍t-thâu kap sio-hong bōe siong-hāi in. Thiàⁿ-sioh in--ê ōe ín-chhōa in, chhōa in kàu chúi-chôaⁿ piⁿ.

11“Góa beh tī só͘-ū ê soaⁿ-niá khui tōa-lō͘, kā tōa-lō͘ lóng thūn koân.

12Khòaⁿ leh, góa ê chú-bîn tùi chin hn̄g ê só͘-chāi lâi; ū-ê tùi pak-pêng, ū-ê tùi sai-pêng, mā ū chi̍t-kóa tùi Hi-nî tōe-hng lâi.”

13Thiⁿ ah, tio̍h hoaⁿ-hí chhiùⁿ-koa! Tōe ah, tio̍h hoan-ho͘! Tōa-soaⁿ sió-soaⁿ ah, tio̍h tōa-siaⁿ chhiùⁿ-koa! Siōng Chú beh an-ùi I ê chú-bîn; I beh lîn-bín I siū-khó͘ ê chú-bîn.

14M̄-kú Iâ-lō͘-sat-léng ê chū-bîn kóng, “Siōng Chú í-keng pàng-sak lán! Chú í-keng bōe-kì-tit lán lah!”

15In-ūi án-ni, Siōng Chú hôe-tap, “Lāu-bú kiám ōe bōe-kì-tit chia̍h-lin ê eⁿ-á, á-sī bōe thiàⁿ-sioh i ê chhin-siⁿ-kiáⁿ? Lāu-bú nā ōe bōe-kì--tit, góa choa̍t-tùi bōe!

16Lí khòaⁿ leh, góa ū chiong lí ê miâ khek tī chhiú-sim! Lí ê siâⁿ-chhiûⁿ put-sî tī góa ba̍k-chiu chêng, góa bô khó-lêng bōe-kì--tit!

17“Kā lí tiông-kiàn ê lâng chin kín chiū lâi; kā lí thiah-húi--ê teh lī-khui lah.

18Lí gia̍h-thâu sì-chiu-ûi khòaⁿ-bāi--leh, lí ê tông-pau lóng chū-chi̍p óa--lâi, teh-beh kàu-ūi lah. Góa kí góa ê sìⁿ-miā li̍p-sè: In ōe chiâⁿ-chòe lí pó-kùi ê chng-thāⁿ, chhin-chhiūⁿ sin-niû seng-khu kòa ê chu-pó. Siōng Chú án-ni soan-pò͘.

19“Hit-ê húi-hoāi, pha-hng, hong-hòe ê kok-thó͘ taⁿ khak-si̍t siuⁿ sòe, bô-kàu hō͘ liû-bông hôe-kok ê tông-pau tòa; kā lí húi-bia̍t--ê ōe lī-khui lí chin hn̄g.

20Lí ōe chhin-hī thiaⁿ-tio̍h lí liû-bông í-āu siⁿ ê kiáⁿ-jî kóng, ‘Chit-ê só͘-chāi siuⁿ oe̍h; tio̍h hō͘ goán khah khoah ê só͘-chāi thang tòa.’

21Hit-sî, lí tī sim-lāi ōe kóng, ‘Siáⁿ-lâng kā góa siⁿ chiah-ê gín-á? Góa í-keng sòng-sit kiáⁿ mā bōe koh siⁿ lah. Góa liû-bông koh tò-chhù liû-lōng, sī siáⁿ-lâng kā góa ióng-io̍k chiah-ê gín-á? Góa ko͘-toaⁿ, ka-kī chi̍t ê; chiah-ê gín-á tùi tó-ūi lâi?’”

22Chì-koân ê Siōng Chú kóng, “Góa beh tùi lia̍t-kok gia̍h-chhiú sī-ì, tùi bān-bîn hoat-chhut sìn-hō. In ōe phō lí ê ta-po͘-kiáⁿ tī heng-chêng, āiⁿ lí ê cha-bó͘-kiáⁿ tī ka-chiah-āu tò-tńg--lâi.

23Lia̍t-ông ōe chòe lí ê kiáⁿ-jî ê iúⁿ-pē, in ê ông-hō͘ ōe chòe lí ê jî-lú ê lin-bú. In ōe phak-lo̍h tōe kā lí kūi-pài, ōe chī lí kha--ni̍h ê thô͘-hún. Án-ni, lí chiū ōe chai góa sī Siōng Chú; thèng-hāu góa ê lâng it-tēng bōe sit-bāng kiàn-siàu.”

24Lí kiám ōe-tàng tùi ióng-sū ê chhiú chhiúⁿ-toa̍t chiàn-lī-phín? Kiám ōe-tàng tùi pō-kun ê chhiú kái-kiù hu-ló͘?

25Siōng Chú án-ni hôe-tap: Ōe-tàng! Ióng-sū ê hu-ló͘ ōe siū chhiúⁿ-toa̍t; pō-kun ê chiàn-lī-phín ōe siū kái-kiù. Góa beh kap te̍k-tùi lí ê lâng te̍k-tùi; góa beh chín-kiù lí ê kiáⁿ-jî.

26Góa beh hō͘ ap-pek lí ê lâng chia̍h in ka-kī ê bah, lim ka-kī ê huih, chhin-chhiūⁿ lim sin-chiú lim kah chùi. Án-ni, choân jîn-lūi chiū ōe chai: Góa Siōng Chú sī lí ê Kiù-chú, lí ê Kiù-sio̍k-chú, sī Í-sek-lia̍t ê Tāi-lêng-chiá.

← Chapter 48 Jump to: Chapter 50 →