Isaiah 19

Chinese TTVR (現代台語譯本羅馬字版)

← Chapter 18 Jump to: Chapter 20 →

1Che sī iú-koan Ai-ki̍p ê sìn-sit. Khòaⁿ leh, Siōng Chú chē khoài-sok ê hûn, pe-lâi Ai-ki̍p. Ai-ki̍p ê ngó͘-siōng ōe tī I bīn-chêng phi̍h-phi̍h-chhoah; Ai-ki̍p -lâng ê sim ōe siau-iûⁿ sit-táⁿ.

2Siōng Chú kóng: Góa beh kek-khí Ai-ki̍p -lâng kong-kek Ai-ki̍p -lâng: Hiaⁿ-tī kong-kek hiaⁿ-tī, chhù-piⁿ kong-kek chhù-piⁿ, siâⁿ kong-kek siâⁿ, kok kong-kek kok.

3Ai-ki̍p -lâng ōe sit-táⁿ bô-la̍t; góa beh phah-loān in ê kè-ōe. In ōe khì chhē in ê ngó͘-siōng kap liām-chiù--ê, khì kiû in ê khan-bông--ê kap tâng-ki toh-thâu.

4Góa beh kā Ai-ki̍p -lâng kau hō͘ chi̍t ê hiong-ok ê kok-ông thóng-tī. Chì-koân Siōng Chú — Bān-kun ê Thóng-sòe án-ni soan-kò.

5Hái-chúi ōe ta--khì, kang-hô ōe ta-khok-khok.

6Ūn-hô ê chúi ōe chhàu, Nî-lô-hô ê chúi ōe kiám-chió soah ta--khì; lô͘-úi kap lô͘-tek lóng ōe lian--khì.

7Nî-lô-hô hô-kháu kap iân-hōaⁿ chai-chèng--ê, ōe ko͘-tâ, hō͘ hong chhe-sòaⁿ soah bô--khì.

8Lia̍h-hî ê lâng ōe ai-khàu; tī Nî-lô-hô tiò-hî--ê ōe pi-siong; tī hô--ni̍h pha-bāng--ê lóng bōe-tàng seng-oa̍h.

9So môa chòe se kap chit môa-se ê lâng lóng ōe sit-bāng kiàn-siàu.

10Chit-pò͘ sai-hū ōe lóe-chì; chhiàⁿ--lâi ê kang-lâng ōe hoân-ló iu-chhiû.

11Só-an ê léng-siù ū-kàu gû-gōng; Hoat-ló siōng ū-tì-hūi ê kò͘-būn bô hó ê kè-chhek. Lín ná ōe-tàng kā Hoat-ló kóng “Góa sī ū-tì-hūi ê lâng ê hō͘-tāi, sī kó͘-chá kun-ông ê kiáⁿ-sun”?

12Ai-ki̍p -ông, lí ū-tì-hūi ê kò͘-būn tī tó-ūi? In hiān-chāi tio̍h kóng hō͘ lí chai Siōng Chú — Bān-kun ê Thóng-sòe beh tùi-hù Ai-ki̍p ê kè-ōe.

13Só-an ê léng-siù ū-kàu gōng, Bēng-húi-su ê léng-siù hō͘ lâng phiàn--khì lah; chiah-ê chi-cho̍k ê tòng-liông kā Ai-ki̍p chhōa bê-lō͘.

14Siōng Chú kā chhò-loān ê sîn koàn-ji̍p in lāi-bīn, hō͘ Ai-ki̍p só͘ chòe it-chhè ê tāi-chì lóng chha-chhò, chhin-chhiūⁿ chiú-chùi ê lâng ná tian ná thò͘.

15Tī Ai-ki̍p, bô chi̍t ê ū lō͘-ēng, bô-lūn sī thâu á-sī bé-liu, chang-chhiū-ki á-sī lô͘-úi, lóng siâng-khoán!

16Tī hit-ji̍t, Ai-ki̍p -lâng ōe chhin-chhiūⁿ hū-jîn-lâng kiaⁿ-hiâⁿ ngia̍uh-ngia̍uh-chhoah, in-ūi Siōng Chú — Bān-kun ê Thóng-sòe gia̍h-chhiú beh chhú-hoa̍t in.

17Iû-tāi -tōe mā ōe hō͘ Ai-ki̍p -lâng kiaⁿ-hiâⁿ; nā ū lâng thê-khí Iû-tāi ê miâ, in chiū phi̍h-phi̍h-chhoah, in-ūi Siōng Chú — Bān-kun ê Thóng-sòe ū kè-ōe beh tùi-hù in.

18Tī hit-ji̍t, Ai-ki̍p ū gō͘ ê siâⁿ-chhī, lâng ōe kóng Hi-pek-lâi-ōe, tùi Siōng Chú — Bān-kun ê Thóng-sòe soan-sè chīn-tiong; kî-tiong ū chi̍t ê siâⁿ kiò-chòe “Thài-iông-siâⁿ”.

19Tī hit-ji̍t, Ai-ki̍p -tōe ê tiong-sim ōe khí-chō chi̍t chō chè-tôaⁿ hiàn hō͘ Siōng Chú, mā ōe tī pian-kài chhāi chi̍t ki hiàn hō͘ Siōng Chú ê thiāu.

20Chiah-ê beh chòe Siōng Chú — Bān-kun ê Thóng-sòe lîm-chāi tī Ai-ki̍p ê kì-hō kap kiàn-chèng. Ai-ki̍p -lâng siū ap-pek kiû-kiò Siōng Chú ê sî, I ōe thòe in chhe chi̍t ê chín-kiù-chiá lâi pó-hō͘ in, tháu-pàng in.

21Siōng Chú ōe tùi Ai-ki̍p -lâng hián-sī I pún-sin. Tī hit-ji̍t, Ai-ki̍p -lâng ōe sêng-jīn Siōng Chú, tùi I hiàn sio-hòa-chè kap sò͘-chè, mā ōe tùi I hē-goān koh siā-goān.

22Siōng Chú it-tēng ōe chek-hoa̍t Ai-ki̍p -lâng, jiân-āu kā in i-tī. In oa̍t-tńg-sin kui-ǹg Siōng Chú ê sî, I ōe thiaⁿ in ê kî-kiû, kā in i-hó.

23Tī hit-ji̍t, tùi Ai-ki̍p kàu A-su̍t ōe khui chi̍t tiâu tōa-lō͘. A-su̍t -lâng ōe khì Ai-ki̍p, Ai-ki̍p -lâng ōe khì A-su̍t; Ai-ki̍p -lâng kap A-su̍t -lâng ōe chòe-hé kèng-pài Siōng Chú.

24Tī hit-ji̍t, Í-sek-lia̍t ōe kap Ai-ki̍p í-ki̍p A-su̍t, saⁿ kok chòe-hé chiâⁿ-chòe choân sè-kài ê chiok-hok.

25Siōng Chú — Bān-kun ê Thóng-sòe beh sù-hok hō͘ in, kóng, “Goān góa ê chú-bîn Ai-ki̍p, góa ê chhiú só͘ chō ê A-su̍t, góa ê soán-bîn Í-sek-lia̍t, lóng siū chiok-hok!”

← Chapter 18 Jump to: Chapter 20 →