Isaiah 29

Chinese TTVR (現代台語譯本羅馬字版)

← Chapter 28 Jump to: Chapter 30 →

1A-lī-i-le̍k, A-lī-i-le̍k, lí chhám ah! Tāi-pi̍t an-iâⁿ khiā-khí ê siâⁿ, lí chhám ah! Lín chi̍t-nî koh chi̍t-nî, choeh-kî chiàu-sî khèng-chiok.

2M̄-kú, góa beh hō͘ A-lī-i-le̍k tú-tio̍h chai-lān; i ōe pi-siong, thó͘-khùi, ōe chhin-chhiūⁿ teh sio ê chè-tôaⁿ ê lô͘.

3Góa beh sì-ûi chat-iâⁿ ûi-khùn lí, beh khí thô͘-tui kong-kek lí, khí koân-tâi kong-táⁿ lí.

4Lí ōe tó-hoāi, tùi thô͘-tóe kóng-ōe, tùi tîn-ai chhut sòe-sòe ê siaⁿ; lí ê siaⁿ ōe chhin-chhiūⁿ khan-bông--ê ê siaⁿ tùi thô͘-kha-tóe chhut--lâi, chhin-chhiūⁿ chiáu-á chiu̍h-chiu̍h-kiò ê siaⁿ tùi tîn-ai chhut--lâi.

5Lí ê te̍k-jîn ōe chhin-chhiūⁿ iù ê thô͘-hún, kiông-pō ê peng-sū ōe chhin-chhiūⁿ hō͘ hong chhe ê chho͘-khng hiah chōe. Chi̍t-sî-á-kú, hut-jiân-kan,

6Siōng Chú — Bān-kun ê Thóng-sòe ōe ēng lûi-kong-sih-nà, tōe-tāng, kông-hong-pō-ú, kap thun-bia̍t ê hé hêng-hoa̍t te̍k-jîn.

7Hit-sî, kong-kek A-lī-i-le̍k lia̍t-kok ê peng-sū, só͘-ū teh kong-kek i ê siâⁿ-pó, ûi-khùn i--ê, ōe pìⁿ-chòe chi̍t ê bāng, chhin-chhiūⁿ iā-kan ê īⁿ-siōng siau-sit.

8In chhin-chhiūⁿ iau-gō ê lâng bāng-kìⁿ teh chia̍h mi̍h-kiāⁿ, khùn-chhíⁿ iáu-teh iau; chhin-chhiūⁿ chhùi-ta ê lâng bāng-kìⁿ teh lim-chúi, khùn-chhíⁿ iáu ià-siān, chhùi-ta. Só͘-ū kong-kek Sek-an-soaⁿ lia̍t-kok ê peng-sū lóng ōe án-ni.

9Lín ài chòe gōng-lâng, chhut-chāi lín tòng-gōng! Lín ài chhiⁿ-mî, chhut-chāi lín chhiⁿ-mî! Lín chùi-bâng-bâng, m̄-sī in-ūi lim-chiú; lín tian-lâi-tian-khì, m̄-sī in-ūi kāu-chiú.

10Siōng Chú ū kā lín koàn-ji̍p tāng-bîn ê sîn, kā lín ê ba̍k-chiu, chiū-sī sian-ti, am--khí-lâi, kā lín ê thâu-khak, chiū-sī sian-kiàn, khàm--khí-lâi.

11In-ūi án-ni, só͘-ū ê be̍k-sī tùi lín khòaⁿ--khí-lâi sī hong-ba̍t ê chheh. Chit-pún chheh the̍h hō͘ bat-jī ê lâng chhiáⁿ i tha̍k, i ōe kóng, “Góa bōe-tàng tha̍k, in-ūi chheh hong--teh.”

12The̍h hō͘ m̄-bat-jī ê lâng chhiáⁿ i tha̍k, i ōe kóng, “Góa m̄ bat jī.”

13Chú kóng, “Chit-ê chú-bîn ēng chhùi chhin-kūn góa, ēng chhùi-tûn chun-kèng góa; m̄-kú in ê sim lī-khui góa hn̄g-hn̄g, in kèng-ùi góa put-kò sī chiàu lâng lâu--lo̍h-lâi ê kà-sī.

14Só͘-í, góa beh tī jîn-bîn tiong-kan chòe chi̍t hāng kî-īⁿ koh kî-biāu ê sū: In tì-hūi ê lâng ê tì-hūi ōe siau-bô, chhong-bêng ê lâng ê chhong-bêng ōe siau-sit.”

15Chhám ah, hiah-ê siūⁿ-beh tùi Siōng Chú am-khàm in ê im-bô͘ ê lâng! In tī àm-tiong chòe tāi-chì, kóng, “Siáⁿ-lâng khòaⁿ ōe tio̍h lán, siáⁿ-lâng ōe chai?”

16Lín tian-tò sī-hui! Lín beh kā sio-hûi sai-hū khòaⁿ-chòe liâm-thô͘ sī--bô? Siū-chō--ê kiám ōe-tàng tùi chō i--ê kóng “Lí bô chō góa”? Hûi kiám ōe-tàng tùi sio-hûi sai-hū kóng “Lí lóng m̄ bat”?

17Koh bô-jōa-kú, Lê-pa-lūn ōe pìⁿ-chòe pûi ê chhân-hn̂g, pûi ê chhân-hn̂g ōe chhin-chhiūⁿ chhiū-nâ.

18Tī hit-ji̍t, sit-chhong ê lâng ōe thiaⁿ-kìⁿ chheh lāi-bīn ê ōe; sit-bêng ê lâng tī bông-bū o͘-àm tiong ōe khòaⁿ--kìⁿ.

19Pi-bî ê lâng ōe in-ūi Siōng Chú ke-thiⁿ hí-lo̍k; sàn-chhiah ê lâng ōe ko-kú Í-sek-lia̍t sîn-sèng ê Siōng-tè.

20In-ūi kiông-pō ê lâng ōe siau-sit, biáu-sī Siōng-tè ê lâng ōe bô--khì, tng-tán beh chòe pháiⁿ ê lâng ōe bia̍t-bông.

21In ēng bô sū-si̍t ê ōe hāi lâng siū tēng-chōe, kā tī siâⁿ-mn̂g-kháu phòaⁿ-àn ê lâng siat lô-bāng, koh ēng ké kiàn-chèng hām-hāi chèng-ti̍t ê lâng.

22Só͘-í, hit-ūi bat kiù-sio̍k A-pek-la-hán ê Siōng Chú tùi Í-sek-lia̍t jîn-bîn án-ni kóng, “ Í-sek-lia̍t bōe koh siū thí-jio̍k; in ê bīn-iông bōe koh-chài chhiⁿ-sún-sún.

23Tng in ê kiáⁿ-sun khòaⁿ-tio̍h góa tī in tiong-kan ê só͘-chòe, in ōe chun góa ê miâ chòe sèng, ōe chun Ngá-kok sîn-sèng ê Siōng-tè chòe sèng, ōe kèng-ùi Í-sek-lia̍t ê Siōng-tè.

24Gû-gōng ê lâng ōe hiáu-ngō͘; nga̍uh-nga̍uh-liām ê lâng ōe chiap-siū kà-sī.”

← Chapter 28 Jump to: Chapter 30 →