Isaiah 45

Chinese TTVR (現代台語譯本羅馬字版)

← Chapter 44 Jump to: Chapter 46 →

1Siōng Chú soán-li̍p Sài-ló͘-sū choh-ông. Siōng Chú hû-chhî i, hō͘ i ū khùi-la̍t cheng-ho̍k lia̍t-pang, pak-toa̍t lia̍t-ông ê koân-sè; siâⁿ-mn̂g lóng ōe tī i ê bīn-chêng phah-khui, bōe koh koaiⁿ--khí-lâi. Siōng Chú tùi Sài-ló͘-sū án-ni kóng:

2Góa Siōng Chú beh chhin-sin thòe lí khui-lō͘, beh siah-pîⁿ tōa-soaⁿ sió-soaⁿ. Góa beh kòng-phòa tâng ê siâⁿ-mn̂g, beh kù-tn̄g thih ê mn̂g-chhòaⁿ.

3Góa beh chiong àm-tiong ê pó-pòe, ún-chông ê châi-hù lóng hō͘ lí; án-ni, lí chiū ōe chai góa sī Siōng Chú, góa kiò lí ê miâ ho͘-tiàu lí. Góa sī Í-sek-lia̍t ê Siōng-tè.

4Sui-jiân lí m̄ bat góa, ūi-tio̍h góa ê po̍k-jîn Ngá-kok, ūi-tio̍h góa kéng-soán ê Í-sek-lia̍t, góa iáu kiò lí ê miâ ho͘-tiàu lí, sù lí miâ-hō.

5Góa sī Siōng Chú, kî-tha bô pa̍t-ê; góa í-gōa, bô pa̍t-ê Siōng-tè. Sui-jiân lí iáu m̄ bat góa, góa beh hō͘ lí khùi-la̍t,

6án-ni, tùi ji̍t chhut kàu ji̍t lo̍h ê só͘-chāi, lâng-lâng lóng ōe chai, góa í-gōa bô pa̍t-ê; góa sī Siōng Chú, í-gōa bô pa̍t-ê.

7Góa chhòng-chō kng, koh chō àm; góa sù pêng-an hoân-êng, mā kàng chai-lān. Góa Siōng Chú beh si̍t-hiān che it-chhè ê tāi-chì.

8Thiⁿ ah, tio̍h kàng-lo̍h sèng-lī, chhin-chhiūⁿ hō͘-chúi tùi téng-bīn piàⁿ-lo̍h. Tōe ah, tio̍h phah-khui, hō͘ chín-kiù khui-hoe, hō͘ sèng-lī kiat-chí. Góa Siōng Chú beh sêng-chiū chit-ê sū!

9Kap Chō-bu̍t-chú cheng-lūn ê lâng chhám ah! I put-kò sī tōe-chiūⁿ hiā-phìⁿ tiong ê chi̍t phìⁿ. Liâm-thô͘ kiám káⁿ tùi sio-hûi sai-hū kóng, “Lí teh chhòng siáⁿ? Lí ê kang-hu bô hó!”

10Káⁿ kā lāu-pē kóng “Lí ná kā góa siⁿ-chòe án-ni”, káⁿ kā lāu-bú kóng “Hô-mi̍h-khó͘ siⁿ góa”, chit-khoán lâng chhám ah!

11Í-sek-lia̍t sîn-sèng ê Siōng-tè — chhòng-chō Í-sek-lia̍t ê Siōng Chú án-ni kóng: Lín bô koân thang chit-būn góa ê kiáⁿ-jî ê chiong-lâi, bô koân chí-sī góa eng-kai tio̍h chòe sím-mi̍h!

12Góa sī tāi-tōe ê Chhòng-chō-chú, koh chhòng-chō tòa tī hit téng-bīn ê jîn-lūi. Góa chhin-chhiú thí-khui kiong-chhong, chí-hui thiⁿ-téng ê chhiⁿ-sîn.

13Góa heng-khí Sài-ló͘-sū hō͘ i tit-tio̍h sèng-lī, siu-ti̍t i só͘ beh kiâⁿ ê tō-lō͘. I beh tiông-kiàn góa ê siâⁿ Iâ-lō͘-sat-léng, beh tháu-pàng góa siū-lia̍h ê chú-bîn; i án-ni chòe m̄-sī beh thàn kang-chîⁿ, mā m̄-sī in-ūi hō͘ lâng bóe-siu. Siōng Chú — Bān-kun ê Thóng-sòe án-ni soan-pò͘.

14Siōng Chú tùi Í-sek-lia̍t án-ni kóng: Ai-ki̍p kap I-soh-phit-a ê châi-hù lóng ōe pìⁿ-chòe lí ê; tōa koh lò ê Se-pa -lâng lóng pìⁿ-chòe lí ê lô͘-lē, in ōe hō͘ só-liān liān--teh, tè lí ê ka-chiah-āu kiâⁿ. In ōe kūi lo̍h-khì pài lí, kiong-kèng tùi lí kóng: Siōng-tè khak-si̍t kap lín tông-chāi, chí-ū I sī Siōng-tè, í-gōa bô pa̍t-ê.

15Kiù-sio̍k-chú — Í-sek-lia̍t ê Siōng-tè, lí chin-chiàⁿ sī ún-ba̍t ka-kī ê Siōng-tè.

16Chè-chō ngó͘-siōng--ê lóng ōe kiàn-siàu làu-khùi; in lóng ōe chòe-hé siū thí-jio̍k.

17M̄-kú Í-sek-lia̍t siū Siōng Chú chín-kiù. Lín tit--tio̍h ê kiù-un ōe sòa kàu éng-oán; lín éng-oán bōe koh siū bú-jio̍k.

18Siōng Chú chhòng-chō thiⁿ; I chiū-sī hit-ūi î-it ê Siōng-tè. I chhòng-chō, hêng-sêng, kiàn-li̍p tāi-tōe. I bô hō͘ tāi-tōe pìⁿ-chòe hūn-tūn hong-hòe, hoán-tńg hō͘ i chiâⁿ-chòe lâng khiā-khí ê só͘-chāi. I kóng: Góa sī Siōng Chú, í-gōa bô pa̍t-ê.

19Góa m̄-bat tī ún-ba̍t ê só͘-chāi kóng-ōe, mā m̄-bat tī o͘-àm ê tōe tâm-lūn. Góa m̄-bat kā Í-sek-lia̍t ê hō͘-tāi kóng: Lín tio̍h tī hūn-tūn tiong chhē-kiû góa. Góa Siōng Chú chí-ū kóng kong-gī, chí-ū soan-kò chèng-ti̍t.

20Siōng Chú kóng: Lâi, lín chiah-ê tùi lia̍t-pang tô-thoat ê lâng, lóng chū-chi̍p óa--lâi, chiap-siū sím-phòaⁿ! Hiah-ê kng chhâ khek ê ngó͘-siōng iû-koe, koh tùi bô-la̍t thang kiù in ê sîn-bêng kî-tó ê lâng sī bû-ti.

21Lâi, lín khì pí-chhú chham-siông, thê-chhut lín ê sò͘-chn̄g. Siáⁿ-lâng tùi kó͘-chá chiū chai chit-ê tāi-chì? Siáⁿ-lâng chin chá í-chêng chiū soan-kò chit-ê sū? Kiám m̄-sī góa Siōng Chú? Góa í-gōa bô pa̍t-ê Siōng-tè. Góa chiah sī kong-gī ê Siōng-tè, góa í-gōa bô pa̍t-ê ōe chín-kiù lâng!

22Thiⁿ-piⁿ-hái-kak ê lâng ah, tio̍h kui-ǹg góa thang tit-tio̍h kiù! Góa chiū-sī Siōng-tè, kî-tha bô pa̍t-ê.

23Góa kí ka-kī li̍p-sè; góa pîn kong-gī kóng-chhut ê ōe choa̍t-tùi bōe siu-hôe: Múi chi̍t ê kha-thâu-u lóng ōe tùi góa kūi-pài; múi chi̍t ê chhùi lóng ōe tùi góa soan-sè.

24Lâng ōe kóng: Chí-ū thong-kè Siōng Chú chiah ōe tit-tio̍h sèng-lī kap khùi-la̍t; só͘-ū tùi I hoat siū-khì ê lâng lóng ōe siū thí-jio̍k.

25Só͘ ū Í-sek-lia̍t ê kiáⁿ-sun lóng ōe tùi Siōng Chú tit-tio̍h sèng-lī kap êng-iāu.

← Chapter 44 Jump to: Chapter 46 →