Isaiah 56

Chinese TTVR (現代台語譯本羅馬字版)

← Chapter 55 Jump to: Chapter 57 →

1Siōng Chú án-ni kóng, “Lín tio̍h ûi-hō͘ kong-pêng, si̍t-chián kong-gī; in-ūi góa ê chín-kiù kūn lah, góa ê kong-gī liâm-piⁿ si̍t-hiān.

2Kian-siú An-hioh-ji̍t, lóng bô ûi-pōe, chhiú bô choh-pháiⁿ, chit-khoán lâng chin ū hok-khì!”

3Í-keng kui-sìn Siōng Chú ê gōa-cho̍k-lâng m̄-thang kóng, “Siōng Chú it-tēng ōe kā góa kap I ê chú-bîn keh-lī.” Thài-kàm mā m̄-thang kóng, “Góa put-kò sī chi̍t châng ta--khì ê chhiū.”

4In-ūi Siōng Chú án-ni kóng, “Hiah-ê chun-siú góa ê An-hioh-ji̍t, chòe góa só͘ hoaⁿ-hí ê sū, chhî-siú góa ê iok ê thài-kàm,

5góa beh hō͘ in tī góa ê sèng-tiān, góa ê chhiûⁿ-ûi lāi ū kì-liām-pi, ū miâ-hō, pí ū chin chōe kiáⁿ, cha-bó͘-kiáⁿ khah hó; góa beh sù in éng-oán bōe hō͘ lâng chhat-siau ê miâ.

6“Hiah-ê kui-sìn Siōng Chú ê gōa-cho̍k-lâng beh sū-hōng góa, kèng-ài góa Siōng Chú ê miâ, koh chòe góa ê po̍k-jîn; in lóng chun-siú An-hioh-ji̍t, bô kan-hoān lām-iōng, khak-si̍t chhî-siú góa ê iok,

7góa beh chhōa in kàu Sek-an — góa ê sèng-soaⁿ, hō͘ in tī góa kî-tó ê tiān lāi-bīn ū hoaⁿ-hí; góa mā beh chiap-la̍p in hiàn tī góa chè-tôaⁿ téng ê sio-hòa-chè kap chè-mi̍h. In-ūi góa ê tiān beh kiò-chòe bān-bîn kî-tó ê tiān.”

8Chì-koân ê Siōng Chú ū chio-chi̍p liû-bông ê Í-sek-lia̍t chú-bîn tò-tńg--lâi, I án-ni kóng, “Í-keng tò-tńg--lâi ê chú-bîn í-gōa, góa mā beh chio-chi̍p koh-khah chōe lâng lâi kui-óa in.”

9Siōng Chú kóng, “Chhân-iá ê cháu-siù ah, lóng lâi! Chhiū-nâ lāi ê iá-siù ah, lóng lâi thun-chia̍h!

10Í-sek-lia̍t ê siú-bōng-chiá lóng chhiⁿ-mî, lóng bô tì-sek; in sī bōe pūi ê káu, kui-ji̍t tó-teh khùn, teh choh-bāng.

11In lóng sī tham-chia̍h ê káu, kui-ji̍t chia̍h bōe pá. Chiah-ê bo̍k-chiá bô tì-sek; ta̍k-ê lâng kiâⁿ ka-kī ê lō͘, tui-kiû ka-kī ê lī-ek.

12In kóng, ‘Lâi! Lán lâi-khì bóe chiú, lim kāu-chiú, lim hō͘ kàu-khùi. Bîn-á-chài ōe kap kin-á-ji̍t siâng-khoán, sīm-chì koh-khah chán!’”

← Chapter 55 Jump to: Chapter 57 →