Isaiah 18

Chinese TTVR (現代台語譯本羅馬字版)

← Chapter 17 Jump to: Chapter 19 →

1Tī Kó͘-si̍t ê hô hit-pêng ū chi̍t tè tōe, tī hia ū thiaⁿ-tio̍h chin chōe si̍t teh phia̍t ê siaⁿ;

2hia ū chin chōe sù-chiá chē lô͘-úi chō ê chûn tùi Nî-lô-hô lo̍h--lâi. Lín chiah-ê hêng-tōng bín-chia̍t ê sù-chiá, tio̍h khì, khì chi̍t ê sin-châi koân-tōa, phê-hu kng-ku̍t ê bîn-cho̍k hia, chi̍t ê hn̄g kap kūn ê lâng lóng kiaⁿ-ùi ê kok-ka, chi̍t ê kiông-tāi, ài thún-ta̍h lâng ê kok-ka; in ê thó͘-tōe hō͘ hô-liû hun-khui.

3Lín chiah-ê tòa tī sè-kan, tōe-chiūⁿ só͘-ū ê chū-bîn ah! Tōa-kî tī soaⁿ-téng chhāi--khí-lâi ê sî, tio̍h khòaⁿ, sàu-kak pûn ê sî, tio̍h thiaⁿ!

4Siōng Chú tùi góa kóng, “Góa beh tùi góa khiā-khí ê só͘-chāi tiām-tiām koan-khòaⁿ, chhin-chhiūⁿ ji̍t-kng ê iām-jia̍t, chhin-chhiūⁿ siu-koah ê sî lō͘-chúi cheng-hoat ê hûn-bū.”

5Phû-tô iáu-bē siu-sêng í-chêng, hoe siā, beh kiat-chòe phû-tô ê sî, Siōng Chú ōe ēng liâm-to chiong iù-ki koah-tn̄g, chiong ām-ām ê phû-tô-tîn chián hiat-ka̍k.

6In ōe siū khì-sak, hiat hō͘ soaⁿ-téng ê eng-chiáu, tàn hō͘ tōe-chiūⁿ ê iá-siù; tī hē-thiⁿ, hō͘ eng-chiáu choh-siū, tī tang-thiⁿ, hō͘ iá-siù hioh-khùn.

7Hit-sî, ū chi̍t ê kok-ka, thó͘-tōe hō͘ hô-liû hun-khui; i ê jîn-bîn sin-châi koân-tōa, phê-hu kng-ku̍t, thún-ta̍h lâng, hō͘ hn̄g kap kūn ê lâng lóng kiaⁿ-ùi. In ōe lâi kàu Sek-an-soaⁿ kèng-pài Siōng Chú, hiàn lé-mi̍h hō͘ Siōng Chú — Bān-kun ê Thóng-sòe.

← Chapter 17 Jump to: Chapter 19 →