Isaiah 53

Chinese TTVR (現代台語譯本羅馬字版)

← Chapter 52 Jump to: Chapter 54 →

1Lán só͘ thiaⁿ--tio̍h-ê, siáⁿ-lâng ōe siong-sìn? Siōng Chú ê khùi-la̍t bat tùi siáⁿ-lâng hián-sī?

2Siōng Chú hō͘ I ê po̍k-jîn chhin-chhiūⁿ sin ê íⁿ puh--chhut-lâi, chhin-chhiūⁿ kun tùi ta-tōe hoat--chhut-lâi. I bô hó hêng-chōng, bô ui-gî thang khip-ín lán, mā bô hó khòaⁿ ê gōa-māu hō͘ lán thang him-bō͘.

3I hō͘ lâng khòaⁿ-khin, siū lâng khì-sak, koh siū chin chōe khó͘-lān, keng-le̍k ta̍k-khoán pīⁿ-thiàⁿ. Lâng oa̍t-thâu m̄ khòaⁿ i; lán biáu-sī i, bô kā chun-tiōng.

4I khak-si̍t sêng-tam lán ê pīⁿ-thiàⁿ, tam-tng lán ê khó͘-lān. Lán siūⁿ-kóng i siū chek-hoa̍t, hō͘ Siōng-tè phah, siū khó͘-chhó͘.

5M̄-kú i sī ūi-tio̍h lán ê kè-sit siū siong-hāi, ūi-tio̍h lán ê chōe-kò siū teh-chhùi. I tam-tng hêng-hoa̍t, lán tit-tio̍h pêng-an; I siū piⁿ-phah, lán tit-tio̍h i-hó.

6Lán lóng chhin-chhiūⁿ iûⁿ bê-lō͘; ta̍k-ê lâng kiâⁿ ka-kī ê lō͘. Siōng Chú chiong lán chèng-lâng ê chōe lóng kui tī i sin-chiūⁿ.

7I siū ap-pek, siū khó͘-chhó͘, m̄-kú i tiām-tiām bô chhut-siaⁿ; i chhin-chhiūⁿ iûⁿ-ko hō͘ lâng khan-khì thâi, chhin-chhiūⁿ iûⁿ-bú hō͘ lâng chián-mn̂g, i lóng bô chhut-siaⁿ.

8I siū bô kong-tō ê sím-phòaⁿ, hō͘ lâng lia̍h--khì; kiám ū lâng koan-sim i ê cho-gū? I ūi-tio̍h góa chú-bîn ê chōe-kò siū piⁿ-phah; i siū chhú-sí, tùi jîn-kan siau-sit.

9Sui-jiân i bô ēng pō-le̍k, bô kóng khúi-chà ê ōe, lâng chiong i kap pháiⁿ-lâng tâi chòe-tui, kap hó-gia̍h-lâng tâi chòe-hé.

10Chóng-sī Siōng Chú koat-ì hō͘ i siū teh-chhùi, siū khó͘-chhó͘, hō͘ i thang hiàn sìⁿ-miā sio̍k lâng ê chōe. I ōe tn̂g-hè-siū, khòaⁿ-tio̍h kiáⁿ-kiáⁿ-sun-sun, hō͘ Siōng Chú ê chí-ì thong-kè i lâi si̍t-hiān.

11Keng-le̍k siū-khó͘, i ōe khòaⁿ-kìⁿ kng. Tùi i ê thé-giām, i ōe sim-móa-ì-chiok. Góa gī ê po̍k-jîn ōe hō͘ chin chōe lâng chiâⁿ-chòe gī-lâng; i beh tam-tng in ê chōe-kò.

12Só͘-í, góa beh hō͘ i kap ū tōe-ūi ê lâng pun só͘ tit--tio̍h ê hūn-gia̍h, kap kiông-béng ê lâng pun chiàn-lī-phín. In-ūi i kam-goān pàng-sak sìⁿ-miā kàu sí, hō͘ lâng lia̍t-ji̍p chōe-hoān ê miâ-toaⁿ. Chóng-sī i tam-tng chin chōe lâng ê chōe, koh thòe chōe-hoān kî-tó.

← Chapter 52 Jump to: Chapter 54 →