Isaiah 6

Chinese TTVR (現代台語譯本羅馬字版)

← Chapter 5 Jump to: Chapter 7 →

1O͘-se-a -ông kè-sin hit-nî, góa khòaⁿ-kìⁿ Chú chē tī chin koân ê pó-chō téng; I ê tn̂g-phàu sûi--lo̍h-lâi, khàm-móa sèng-tiān.

2I ê chiu-ûi ū sat-la-hut thiⁿ-sài khiā-teh sū-hāu; múi chi̍t ê ū la̍k ki si̍t, nn̄g ki jia bīn, nn̄g ki jia kha, nn̄g ki chòe si̍t pe.

3In pí-chhú ho͘-èng: Sèng--chài, sèng--chài, sèng--chài! Siōng Chú — Bān-kun ê Thóng-sòe! I ê êng-kng chhiong-móa choân-tōe!

4Mn̂g-kheng ê kun-ki in-ūi ho͘-èng ê siaⁿ iô-choah, sèng-tiān ū ian móa-móa.

5Hit-sî góa kóng: Góa ū chai-hō, góa bia̍t-bông lah! In-ūi góa sī chhùi-tûn bô chheng-khì ê lâng, koh tòa tī chhùi-tûn bô chheng-khì ê lâng tiong-kan. Góa ê ba̍k-chiu ū khòaⁿ-tio̍h Ông, Siōng Chú — Bān-kun ê Thóng-sòe.

6Jiân-āu, ū chi̍t ê sat-la-hut pe óa-lâi góa chia, i ê chhiú ēng hé-ngoeh tùi chè-tôaⁿ téng ngoeh chi̍t tè jia̍t-jia̍t ê thòaⁿ,

7chiong thòaⁿ ù góa ê chhùi-tûn, kóng: Taⁿ, chit-ê ù-tio̍h lí ê chhùi-tûn, lí ê chōe-kò í-keng tû--khì, lí ê chōe-ok ū tit-tio̍h sià-bián.

8Liáu-āu, góa thiaⁿ-kìⁿ Chú ê siaⁿ, kóng, “Góa thang chhe siáⁿ-lâng? Siáⁿ-lâng beh ūi-tio̍h goán khì?” Góa chiū kóng, “Góa tī chia, chhiáⁿ chhe góa!”

9I koh kóng, “Lí khì kā chit-ê chú-bîn kóng: Lín thiaⁿ koh thiaⁿ, m̄-kú bōe bêng-pe̍k; lín khòaⁿ koh khòaⁿ, m̄-kú bōe liáu-kái.

10Lí tio̍h hō͘ chit-ê chú-bîn ê sim tūn, hī-khang tāng, ba̍k-chiu hoe; chiah bián in ba̍k-chiu khòaⁿ--kìⁿ, hī-á thiaⁿ--kìⁿ, sim bêng-pe̍k, oa̍t tò-tńg lâi tit-tio̍h i-tī.”

11Góa chiū kóng, “Chú ah, tio̍h jōa kú?” I ìn, “Tio̍h kàu siâⁿ-chhī hong-hòe, bô lâng tòa, chhù bô lâng khiā, thó͘-tōe thiat-tóe pha-hng.

12It-ti̍t kàu Siōng Chú chiong chèng-lâng sóa-khì kàu iâu-oán ê só͘-chāi, kéng-lāi chin chōe thó͘-tōe siū khì-sak;

13liân hit só͘-chāi só͘ chhun ê cha̍p-hūn-chi̍t ê lâng, mā ōe koh siū húi-bia̍t. Tān-sī, chhin-chhiūⁿ le̍k-chhiū, siōng-chhiū, sui-jiân hō͘ lâng chhò--khí-lâi, m̄-kú chhiū-thâu iáu lâu--teh; hit-ê chhiū-thâu sī sèng ê cho̍k-lūi.”

← Chapter 5 Jump to: Chapter 7 →