Isaiah 25

Chinese TTVR (現代台語譯本羅馬字版)

← Chapter 24 Jump to: Chapter 26 →

1Siōng Chú ah, lí sī góa ê Siōng-tè; góa beh chun lí chòe tōa, chheng-chàn lí ê miâ; in-ūi lí ū ēng chin-sêng sìn-si̍t si̍t-hiān tùi kó͘-chá chiū kè-ōe kî-biāu ê sū.

2Lí ū hō͘ siâⁿ pìⁿ-chòe pùn-sò-tui, hō͘ siat-hông ê siâⁿ hong-hòe, hō͘ gōa-kok-lâng ê iàu-sài thiat-tóe húi-hoāi, éng-oán bōe-tàng tiông-kiàn.

3Só͘-í ióng-béng ê jîn-bîn beh êng-iāu lí; kiông-pō siâⁿ-chhī ê kok-bîn beh kiaⁿ-ùi lí.

4Lí it-ti̍t sī sàn-chhiah-lâng ê óa-khò, sī khiàm-kheh ê lâng kan-lân tiong ê pó-lúi, sī kông-hong-pō-ú tiong ê pī-lān-só͘, sī iām-jia̍t ê sî ê ìm-ńg; in-ūi kiông-pō ê lâng kong-kek ê sî, ná kông-hong teh phah siâⁿ-chhiûⁿ.

5Gōa-kok-lâng ê soan-hoa chhin-chhiūⁿ khòng-iá ê iām-jia̍t, lí ēng hûn jia-khàm, hō͘ jia̍t-khì siau-sòaⁿ; lí hō͘ kiông-pō ê lâng bô koh chhiùⁿ khái-soân ê koa.

6Tī chit-ê soaⁿ-téng, Siōng Chú — Bān-kun ê Thóng-sòe beh ūi-tio̍h bān-bîn chún-pī hong-sēng ê iàn-se̍k, siōng-hó ê chiú-iàn; ū pûi-bah, ū kut-chhé, ū tîn-nî ê hó-chiú.

7Tī chit-ê soaⁿ-téng, I beh chiong só͘-ū ê jîn-bîn am bīn ê phè, kap lia̍t-kok khàm seng-khu ê pò͘ the̍h-tiāu.

8Chì-koân ê Siōng Chú beh éng-oán thun-bia̍t sí-bông, tùi ta̍k-ê lâng ê bīn chhit-khì in ê ba̍k-sái; I beh tī choân-tōe tû-khì I chú-bîn ê thí-jio̍k. Siōng Chú án-ni soan-pò͘.

9Tī hit-ji̍t ū lâng ōe kóng, “Lín khòaⁿ, chit-ūi sī goán ê Siōng-tè, goán it-ti̍t teh gióng-bōng I, I it-tēng ōe lâi kái-kiù goán. Chit-ūi sī goán it-ti̍t teh thèng-hāu ê Siōng Chú. Lán tio̍h lâi hoaⁿ-hí khèng-chiok I ê chín-kiù.”

10Siōng Chú ê chhiú beh khòa tī Sek-an-soaⁿ téng, m̄-kú Mô͘-ap ōe siū thún-ta̍h, ná be̍h-kó tī pùn-sò-tui hō͘ lâng thún-lâi-thún-khì.

11Tī hia Mô͘-ap ōe thí-khui i ê siang-chhiú, chhin-chhiūⁿ siû-chúi ê lâng chhun-chhiú beh siû. Sui-jiân i ê siang-chhiú khòaⁿ--khí-lâi chin liú-lia̍h, m̄-kú bô-chhái-kang; Siōng-tè beh hō͘ i ê kiau-ngō͘ pìⁿ kiàn-siàu.

12Koân-chhiûⁿ téng ê pó-lúi, I beh kā in chhia-tó húi-hoāi; I beh kā in thiah kah pìⁿ pîⁿ-tōe, pìⁿ thô͘-hún.

← Chapter 24 Jump to: Chapter 26 →