Isaiah 14

Chinese TTVR (現代台語譯本羅馬字版)

← Chapter 13 Jump to: Chapter 15 →

1Siōng Chú beh lîn-bín I ê chú-bîn Í-sek-lia̍t, koh chi̍t piàn kéng-soán Ngá-kok, kā in an-tì tī in ka-kī ê hiong-thó͘. Chin chōe tòa tī in tiong-kan gōa-cho̍k ê lâng ōe kap in liân-ha̍p, kui-sio̍k Ngá-kok ê hō͘-tāi.

2Chin chōe kok-ka ōe hia̍p-chō͘ in tńg-khì in ê chó͘-kok; Í-sek-lia̍t -ke ōe tī Siōng Chú ê tōe tit-tio̍h gōa-cho̍k-lâng chòe lâm-po̍k lú-pī. Í-chêng lia̍h in--ê taⁿ pìⁿ-chòe in ê hu-ló͘, kè-khì koán-hat in--ê taⁿ beh siū in koán-hat.

3Siōng Chú hō͘ lín tùi pi-siong, khó͘-thàng, tùi siū kiông-pek chòe khó͘-kang tit-tio̍h tháu-pàng hit-sî,

4lí ōe tùi Pa-pí-lûn -ông chhiùⁿ chit-siú hong-chhì ê si, kóng: Ap-pek-chiá kèng-jiân bia̍t-bông, i ê kiông-pō siau-sit lah!

5Siōng Chú í-keng kòng-tn̄g siâ-ok-chiá ê kùn, phah-tn̄g thóng-tī-chiá ê koáiⁿ!

6In tī tōa siū-khì ê sî put-toān khi-ap lia̍t-kok, tī hùn-lō͘ tiong chân-khok koán-hat lia̍t-pang.

7Choân-tōe tit-tio̍h an-hioh pêng-chēng, só͘-ū ê lâng lóng hoaⁿ-hí chhiùⁿ-koa.

8Liân siông-chhiū kap Lê-pa-lūn ê pek-hiuⁿ-chhiū to in-ūi lí ê kiat-kio̍k hoaⁿ-hí chhiùⁿ, kóng: Taⁿ lí í-keng tó--lo̍h-khì, bōe koh ū chhò-chhâ ê lâng lâi kā goán chhò.

9Tāi-tōe ē-bīn ê Im-hú hong-tōng, beh gêng-chiap lí ê lâi-lîm. Tōe-chiūⁿ thóng-tī-chiá ê im-hûn lóng siū hoàn-khí, lia̍t-kok kun-ông ê im-hûn tùi in ê pó-chō khí--lâi, hoan-gêng lí kàu-ūi.

10In ōe khui-chhùi tùi lí kóng: Lí kap goán siâng-khoán lóng pìⁿ nńg-chiáⁿ! Lí kap goán lóng sio-siâng lah!

11Lí ê ui-hong kap lí khîm-sek ê siaⁿ lóng lo̍h kàu Im-hú. Lí khùn ê bîn-chhn̂g pho͘--ê sī thâng; lí kah ê phē sī chhu.

12Thiⁿ-kng-chá ê khé-bêng-chhiⁿ ah, lí kèng-jiân tùi thiⁿ lak--lo̍h-lâi! Lí chit-ê lia̍t-kok ê cheng-ho̍k-chiá ah, lí kèng-jiân poa̍h-lo̍h tōe-bīn!

13Lí sim-lāi án-ni kóng: Góa beh peh-chiūⁿ thiⁿ-téng, chiong góa ê pó-chō siat tī Siōng-tè chèng chhiⁿ-sîn ê téng-bīn. Góa beh chē tī chū-hōe ê soaⁿ-téng, tī ke̍k pak-pêng ê só͘-chāi.

14Góa beh peh-chiūⁿ hûn-téng; góa beh kap Chì-koân-chiá pîⁿ koân.

15M̄-kú, lí ōe siū tàn-lo̍h Im-hú, kàu Chhim-khiⁿ siōng-chhim ê só͘-chāi.

16Khòaⁿ--kìⁿ ê lâng lóng ti̍t-ti̍t kā lí siòng, sim-lāi siūⁿ-kóng: Chit-ê kiám m̄-sī hō͘ tāi-tōe iô-choah, hō͘ lia̍t-kok hong-tōng hit-ê lâng?

17Chit-ê kiám m̄-sī hō͘ sè-kài pìⁿ-chòe hong-po͘, húi-hoāi siâⁿ-chhī, m̄ pàng hu-ló͘ tńg-khì in tau hit-ê lâng?

18Lia̍t-kok ê kok-ông ta̍k-ê lóng chin ū chun-êng, an-chòng tī ka-kī ê hûn-bōng.

19M̄-kú lí sí bô chòng-sin-chi-tōe; lí ê sin-si hō͘ lâng thó-ià, siū lâng thún-ta̍h, hō͘ chin chōe siū sat-hāi ê lâng ê si-thé khàm--teh, chòe-hé lak lo̍h-khì Chhim-khiⁿ ê chio̍h-thâu hia.

20Lí bōe-tàng kap hiah-ê kun-ông tâng bâi-chòng, in-ūi lí húi-hoāi lí ê kok, sat-hāi lí ê jîn-bîn. Goān pháiⁿ-lâng ê hō͘-tāi éng-oán hō͘ lâng bōe-kì--tit.

21In-ūi in chó͘-sian ê chōe, lín tio̍h kā in ê kiáⁿ-sun choân-pō͘ tô͘-sat, chiah bián in koh heng-khí, chiàm-iú tāi-tōe, tī sè-kài ta̍k só͘-chāi khí-chō siâⁿ-chhī.

22Siōng Chú — Bān-kun ê Thóng-sòe kóng: Góa beh khí-lâi kong-kek Pa-pí-lûn, beh chhat-siau in ê miâ, châu-bia̍t sí-bô-khì ê lâng, í-ki̍p in ê kiáⁿ-kiáⁿ-sun-sun. Siōng Chú án-ni soan-pò͘.

23Góa beh hō͘ Pa-pí-lûn pìⁿ-chòe hô-ti tòa ê só͘-chāi, pìⁿ-chòe lóng sī lō͘-kô͘-bê-khut ê só͘-chāi. Góa beh ēng húi-bia̍t ê sàu-chhiú kā i sàu. Siōng Chú — Bān-kun ê Thóng-sòe án-ni soan-pò͘.

24Siōng Chú — Bān-kun ê Thóng-sòe án-ni li̍p-sè kóng: Góa só͘ kè-ōe--ê, lóng ōe hoat-seng; góa só͘ koat-tēng--ê, lóng ōe si̍t-hiān.

25Góa beh tī góa ê tōe phah-chhùi A-su̍t, beh tī góa ê chèng-soaⁿ thún-ta̍h i. I khǹg tī góa chú-bîn ê taⁿ, góa ōe kā in sóa-khui; i hē tī in keng-thâu ê tāng-tàⁿ, góa ōe kā in poaⁿ--lo̍h-lâi.

26Che sī ūi-tio̍h choân-tōe só͘ tēng ê kè-ōe; che sī chhun chhut-khì beh kong-kek lia̍t-kok ê chhiú-kut.

27Siōng Chú — Bān-kun ê Thóng-sòe í-keng chòe chit-ê koat-tēng, siáⁿ-lâng ōe-tàng kā I chó͘-tòng? I chhun--chhut-khì ê chhiú-kut, siáⁿ-lâng ōe-tàng hō͘ i koh kiu tò-tńg?

28A-hap-su -ông sí hit-nî, Siōng-tè soan-pò͘ ē-bīn ê sìn-sit:

29Lín só͘-ū ê Hui-lī-sū -lâng ah, m̄-thang in-ūi phah lín ê kùn í-keng tn̄g lâi hoaⁿ-hí, in-ūi chôa it-tēng ōe siⁿ to̍k-chôa, só͘ siⁿ--ê sī ōe pe ê hé-chôa.

30Siōng Chú ōe bo̍k-ióng I ê chú-bîn tiong siōng sàn-chhiah--ê; khiàm-kheh--ê ōe-tàng an-jiân hioh-khùn. M̄-kú, góa beh ēng ki-hng sat-hāi lín Hui-lī-sū ê hō͘-tāi, beh thâi-sí lín só͘ chhun sí-bô-khì ê lâng.

31Siâⁿ-mn̂g ah, tio̍h thî-khàu! Siâⁿ-chhī ah, tio̍h âu-kiò! Hui-lī-sū ah, tio̍h kiaⁿ-hiâⁿ phi̍h-phi̍h-chhoah! Ū o͘-ian tùi pak-hng teh lo̍h--lâi; kun-peng hiòng-chêng chìn-kun, tūi-ngó͘ tiong bô chi̍t ê tè bōe tio̍h tīn.

32Lán beh án-chóaⁿ hôe-tap Hui-lī-sū ê sù-chiá? Lán tio̍h kā in kóng: Siōng Chú siat-li̍p Sek-an, tī hia, I ê chú-bîn tiong khùn-khó͘--ê ōe tit-tio̍h pó-hō͘.

← Chapter 13 Jump to: Chapter 15 →